சென்னை: 2023-24 ஆம் ஆண்டிற்கான தமிழக அரசின் நிதி நிலை அறிக்கையில் பெண்களுக்கு ஆயிரம் ரூபாய் உரிமைத் தொகை வழங்குவது தொடர்பாக முக்கிய அறிவிப்பு வெளியாகும் என தகவல் வெளியாகி உள்ளது. வரும் நிதியாண்டுக்கான நிதி நிலை அறிக்கை தயாரிப்பு பணிகள் கடந்த சில வாரங்களாகவே தீவிரமாக நடந்து வருகின்றன.
2023-24ஆம் நிதியாண்டுக்கான நிதிநிலை அறிக்கையில் இடம்பெற வேண்டிய முக்கிய அம்சங்கள், திட்டங்கள் ஆகியன குறித்து துறை வாரியாக ஆலோசனைகள் நடைபெற்று வருவதாக தகவல் வெளியாகி உள்ளன. மேலும் மார்ச் மாதம் முதல் வாரத்தில் இருந்து துறை வாரியான ஆய்வு கூட்டத்தை முதலமைச்சர் நடத்த உள்ளதாகவும் அதில் ஏற்கனவே அறிவிக்கப்பட்ட திட்டங்களின் நிலை மற்றும் புதிய அறிவிப்புகள் தொடர்பான ஆலோசனைகள் மற்றும் நிதி ஒதுக்கீடு தொடர்பான முக்கிய முடிவுகள் எடுக்கப்பட உள்ளதாகவும் தெரிவிக்கப்பட்டுள்ளது.
இந்த ஆலோசனைகள் முடிக்கப்பட்டு, பட்ஜெட் அறிக்கையை தயாரிக்கும் பணிகளில் நிதித் துறை அதிகாரிகள் ஈடுபட உள்ளனர். நிதிநிலை அறிக்கை தாக்கலுக்கு முன்பாக, தமிழ்நாடு அரசின் அமைச்சரவைக் கூட்டம் விரைவில் நடக்க உள்ளதாக தகவல் வெளியாகி உள்ளது. மார்ச் முதல் வாரத்தில் அமைச்சரவை கூடி, நிதிநிலை அறிக்கைக்கு ஒப்புதல் அளிக்கப்படும் என தெரிவிக்கப்பட்டுள்ளது.
இதைத் தொடர்ந்து, மார்ச் இரண்டாவது வாரத்தில் சட்டப் பேரவையில் நிதிநிலை அறிக்கையை நிதியமைச்சர் பழனிவேல் தியாகராஜன் தாக்கல் செய்வார் என தெரிவிக்கப்பட்டுள்ளது. தொடர்ந்து வேளாண்மை மற்றும் உழவர் நலத்துறை பட்ஜெட்டை அமைச்சர் எம்.ஆர்.கே பன்னீர்செல்வம் தாக்கல் செய்வார் என தெரிவிக்கப்பட்டுள்ளது.
2024ஆம் ஆண்டு மக்களவைத் தேர்தல் நடைபெறவுள்ள நிலையில், பொது மக்களைக் கவரும் வகையிலான அறிவிப்புகள் நிதிநிலை அறிக்கையில் இடம்பெற வாய்ப்புள்ளதாக நிதித் துறை வட்டாரங்கள் தெரிவிக்கின்றன. மேலும், மகளிருக்கான ஆயிரம் ரூபாய் உரிமைத் தொகை வழங்கும் திட்டம் எப்போது நடைமுறைக்கு வரும் என்பது குறித்தும் இந்த நிதி அறிக்கையில் தெரிவிக்கப்படும் என கூறப்படுகிறது.
இதையும் படிங்க: எடப்பாடி பழனிசாமி வசமான அதிமுக.. உச்சநீதிமன்ற தீர்ப்பால் ஓபிஎஸ் தரப்பு அதிர்ச்சி
