சென்னை : சென்ட்ரல் மற்றும் எழும்பூர் ரயில் நிலையங்களில் இருந்து வெளிமாவட்டம் மற்றும் வெளிமாநிலங்களுக்கு நாளொன்றுக்கு ஆயிரக்கணக்கான மக்கள் செல்கின்றனர். தமிழகத்தில் இருந்து வடமாநிலத் தொழிலாளர்கள் பலர் முக்கிய பண்டிகை நாட்களில் சொந்த மாநிலங்களுக்கு செல்வதற்காக ரயில்களில் முன்பதிவு செய்வார்கள். அவ்வாறு முன்பதிவு செய்தாலும் பலருக்கு வெய்டிங் லிஸ்டிலே பெயர் இருக்கும், சிலர் முன்பதிவு இல்லாத பெட்டியில் ஏறிச் செல்வார்கள்.
இவ்வாறு வெளிமாநிலங்களுக்கு செல்ல வரும் வடமாநிலத்தவர்களை குறிவைத்து டிக்கெட் கவுன்ட்டர் அருகே ரயில்வே அதிகாரி போல ஒருவர் வெள்ளைத்தாளில் பயணிகளுக்கு போலி டிக்கெட்களை கொடுத்து பணம் பறித்து ஏமாற்றும் சம்பவங்கள் தொடர்கதையாக இருந்து வருகிறது.
குறிப்பாக ரயிலில் டிக்கெட் பரிசோதகர்கள் வரும்போது தாங்கள் வைத்திருக்கும் டிக்கெட் போலி எனத் தெரிவித்து அவர்களுக்கு அபராதம் விதிப்பதால், கஷ்டப்பட்டு உழைத்து சொந்த ஊருக்கு தங்களது குடும்பத்தை பார்க்க செல்வோர் பணத்தை இழக்க நேரிடுவதாக வந்த புகார்களின் அடிப்படையில் ரயில்வே போலீசார் முன்பதிவு செய்யும் டிக்கெட் கவுன்ட்டர்கள் முன்பாக தொடர் கண்காணிப்பில் ஈடுபட்டனர்.
இந்த நிலையில் நேற்று மதியம் சென்ட்ரல் புறநகர் முன்பதிவு மையம் முன்பாக கையில் நோட்பேடு உடன் ஒருவர் நின்று ரயில் பயணிகளுக்கு போலி டிக்கெட் கொடுக்க முயன்ற போது கையும் களவுமாக ரயில்வே போலீசார், அந்த நபரை பிடித்தனர். அவரிடம் நடத்தப்பட்ட விசாரணையில் அவர் ராஜஸ்தான் மாநிலத்தை பூர்வீகமாகக் கொண்ட ஜிதேந்திர் ஷா(38) என்பதும், இவர் தற்போது கொடுங்கையூரில் வசித்து வருவதும் விசாரணையில் தெரியவந்தது.
10ஆம் வகுப்பு வரை படித்த இவர் அவரது தந்தையின் நகைக்கடையில் கணக்கு எழுதும் வேலை பார்த்து, அவரது இறப்பிற்கு பின் எளிதாக பணம் சம்பாதிப்பது எப்படி என்பதை யோசித்ததும்; அப்போது ரயில் நிலைய முன்பதிவு மையங்களில் டிக்கெட்டிற்காக வடமாநிலத்தவர்கள் அலைந்து திரிவதை பார்த்ததாக கூறும் ஜிதேந்தர், தனக்கு இந்தி தெரியும் என்பதால் அவர்களுக்கு முன்பதிவு மையத்தில் டிக்கெட் வாங்கி கொடுத்ததாகவும், அதற்கு கூடுதலாக பயணிகளிடம் பணம் பெற்றதாக விசாரணையில் தெரிவித்துள்ளார்.
அதன் பிறகே முன்பதிவு மையத்திற்கு சென்று டிக்கெட் கேட்டு அலையும் வடமாநிலத் தொழிலாளர்களிடம் தான் ரயில்வே அதிகாரி எனக்கூறி டிக்கெட் ஏற்பாடு செய்து தரும் வேலைகளில் ஈடுபட்டதாக தெரிவித்துள்ளார். குறிப்பாக வெள்ளை தாளில் பயணியின் பெயர், வயது, விரைவு ரயிலின் பெயர் சீட் எண் போன்றவற்றை குறிப்பிட்டு, அதில் Executive officer ஹைதராபாத், தெலங்கானா, ஆந்திரா எனக்குறிப்பிட்ட ஸ்டாம்பை பதிந்து அவர்களிடம் டிக்கெட் விலையை விட இருமடங்காக பெற்று கொண்டதும், இதனை டிக்கெட் பரிசோதகரிடம் காட்டினால் போதும் என அனுப்பி வைத்துள்ளார்.
கடந்த ஒரு வருடகாலமாக சென்ட்ரல், தாம்பரம், எழும்பூர் போன்ற ரயில் நிலையங்களில் ஒடிசா மற்றும் பீகார் செல்லும் வடமாநிலத் தொழிலாளர்களை குறிவைத்து மோசடியில் ஈடுபட்டு வந்துள்ளதும் தெரியவந்துள்ளது.
10 ரூபாய் நோட்பேட், ரப்பர் ஸ்டாம்ப், பேனா வைத்து லட்சக்கணக்கில் பயணிகளிடம் ஏமாற்றியதாக விசாரணையில் தெரிவித்துள்ளார். பின்னர் கைது செய்யப்பட்ட அவரிடம் இருந்து ரப்பர் ஸ்டாம்ப் போன்றவற்றை கைப்பற்றி நீதிமன்றத்தில் ஆஜர்படுத்தி சிறையில் அடைத்தனர்.
போலியான டிக்கெட்களை வாங்கி ஏமாற வேண்டாம் எனவும்; ரயில்வே காவல் உதவிக்கு 1512 மற்றும் வாட்ஸ்அப் எண் 9962500500 தொடர்பு கொள்ளலாம் எனவும் ரயில்வே நிர்வாகம் சார்பாக அறிவுறுத்தப்பட்டுள்ளது.
இதையும் படிங்க : CCTV - செயினை பறிக்க முயன்ற இளைஞர் - சினிமா பாணியில் துரத்திப் பிடித்த போலீஸ்..!
