டாக்டர் எம்ஜிஆர் மருத்துவப் பல்கலைக்கழகத்தின் மருத்துவர்கள் மக்களுடன் சந்திப்பு!

சென்னை: தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தில் மக்களுடன் மருத்துவர்கள் சந்திப்பு என்ற நிகழ்ச்சி இன்று தொடங்கப்பட்டது.

தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தில் நீரிழிவு நோய் குறித்த விழிப்புணர்வு நிகழ்ச்சி நடைபெற்றது. இதில் பல்கலைக்கழக துணைவேந்தர் சுதா சேஷய்யன் தலைமை தாங்க, முன்னாள் துணை வேந்தரும் நீரிழிவு துறை சிறப்பு மருத்துவருமான சாந்தாராம் கருத்தரங்கை தொடக்கி வைத்தார். ராஜீவ் காந்தி அரசு பொது மருத்துவமனையில் நீரியல் துறை பேராசிரியர் தர்மராஜன் பெரியாண்டவர் உள்ளிட்டோர், பொதுமக்களின் சந்தேகங்களுக்கு ஆலோசனை வழங்கினர்.

சுதா சேஷய்யன் நிகழ்ச்சி பற்றிய விரிவுரை

பல்கலைக்கழக துணைவேந்தர் சுதா சேஷய்யன்னுடன் ராஜீவ் காந்தி அரசு பொது மருத்துவமனையில் நீரியல் துறை பேராசிரியர் தர்மராஜன்ஆகியோர்

பல்கலைக்கழக துணைவேந்தர் சுதா சேஷய்யன் நிகழ்த்திய உரையில், தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தில் மக்களுடன் சந்திப்பு என்ற நிகழ்ச்சியை தொடக்கி உள்ளோம். மருத்துவப் பல்கலைக் கழகத்திற்கு ஆரோக்கியத்தை மேம்படுத்தும் மற்றும் ஊக்கப்படுத்தும் பொறுப்பு இருப்பதாக கருதுகிறோம். எனவே ஆரோக்கியத்தை மேம்படுத்தும் வகையிலும், அனைத்து தரப்பு மக்களுக்கும் ஆரோக்கியத்தின் மீது பல்வேறு சந்தேகங்கள் இருக்கும். புதிது புதிதாக பல்வேறு நோய்கள் குறித்து கூறுகிறார்களே? நாம் என்ன உணவு உண்ணலாம், குழந்தைகளுக்கு என்ன உணவினை அளிக்கலாம் போன்ற பல்வேறு சந்தேகங்கள் அவர்களுக்கு இருக்கும். அதே நேரத்தில் மக்கள் தங்கள் ஆரோக்கியத்தை சரியாக வைத்துக் கொள்ள கூடிய வகையில் தெளிவான மருத்துவ முறைகளை அவர்களுக்கு கூறுவதற்கான நிகழ்ச்சிதான் மக்களுடன் சந்திப்பு ஆகும்.

மக்களுடன் சந்திப்பு நிகழ்ச்சியின் நோக்கம்

இன்றைய நிகழ்ச்சியில் நீரிழிவு நோய் குறித்து மக்களுக்கு விழிப்புணர்வு மற்றும் ஆலோசனை வழங்கப்படுகிறது. இதை தொடர்ந்து புற்றுநோய், மஞ்சள் காமாலை, உடல் பருமன், கல்லிரல் நோய், இருதய நோய் உள்ளிட்ட நோய்களுக்கும் ஆலோசனை மற்றும் விழிப்புணர்வு ஏற்படுத்த திட்டமிடப்பட்டுள்ளது. இந்த கருத்தரங்கில் நோயின் தன்மை மற்றும் பாதிப்புகள் குறித்து 40 நிமிடம் மருத்துவர்கள் விளக்கம் அளிப்பார்கள். அதனைத் தொடர்ந்து பொதுமக்கள் தங்களின் சந்தேகங்களை மருத்துவரிடம் கேட்டு தெரிந்து கொள்ளலாம்.

இந்நிகழ்ச்சியும் மக்களின் ஆதரவும்

இந்த நிகழ்ச்சிக்கு மக்களின் ஆதரவு அதிக அளவில் இருக்கும் என எதிர்பார்க்கிறோம். மக்களின் ஆதரவினை பொருத்து வரும் நாட்களில் தமிழகத்தில் உள்ள மருத்துவக் கல்லூரிகள் மூலம் இந்தத் திட்டத்தினை செயல்படுத்துவது குறித்து ஆலோசிக்க உள்ளோம் என்று, சுதா சேஷய்யன் கூறினார்.

பல்கலைக்கழக துணைவேந்தர் சுதா சேஷய்யன்னுடன் ராஜீவ் காந்தி அரசு பொது மருத்துவமனையில் நீரியல் துறை பேராசிரியர் தர்மராஜன் ஆகியோர் பங்கேற்றனர்.