சென்னை: திருமணம் செய்து கொள்வதாக கூறி ஏமாற்றியதாக, நடிகை விஜயலட்சுமி, நாம் தமிழர் கட்சி ஒருங்கிணைப்பாளர் சீமானுக்கு எதிராக கடந்த 2011 ஆம் ஆண்டு வளசரவாக்கம் போலீசில் புகார் அளித்திருந்தார். நடிகை விஜயலட்சுமி கொடுத்த பாலியல் புகாரின் அடிப்படையில் பாலியல் வன்கொடுமை, பெண் வன்கொடுமை உள்ளிட்ட 6 பிரிவின் கீழ் வழக்கு பதிவு செய்யப்பட்டது.
பின்னர் சீமானுக்கும், விஜயலட்சுமிக்கும் இடையே பேச்சுவார்த்தை நடந்ததாகக் கூறி, இந்த வழக்கு தொடர்பாக மேல் நடவடிக்கை எடுக்க வேண்டாம் என விஜயலட்சுமி எழுதிக் கொடுத்த கடிதத்தின் அடிப்படையில் காவல்துறை அந்த வழக்கை கைவிட்டது. அதன் பிறகு தனக்கு எதிராக பதியப்பட்ட வழக்கை ரத்து செய்யக் கோரி நாம் தமிழர் கட்சி ஒருங்கிணைப்பாளர் சீமான், சென்னை உயர் நீதிமன்றத்தில் மனுத்தாக்கல் செய்துள்ளார்.
அதில், கடந்த 2011ஆம் ஆண்டு நடிகை விஜயலட்சுமி தன்னை திருமணம் செய்து கொள்ளுவதாகக் கூறி ஏமாற்றியதாக நாம் தமிழர் கட்சி ஒருங்கிணைப்பாளர் சீமான் மீது சென்னை வளசரவாக்கம் காவல் நிலையத்தில் புகார் அளித்தார். அதன் பேரில், காவல் துறையினர் சீமான் மீது வழக்குப் பதிவு செய்தனர். இந்த வழக்கை ரத்து செய்து உத்தரவிட வேண்டும்." என மனுவில் கூறியிருந்தார்.
கடந்த முறை நீதிமன்ற விசாரணையின் போது சீமான் தரப்பில், 2011ஆம் ஆண்டு அளித்த புகாரைத் திரும்பப் பெற்றுக் கொள்வதாக நடிகை விஜயலட்சுமி கொடுத்த கடிதத்தின் அடிப்படையிலும், விசாரணையின் அடிப்படையிலும், காவல்துறை வழக்கை முடித்து வைத்த நிலையில், தற்போது இந்த வழக்கு மீண்டும் விசாரணைக்கு எடுக்கப்பட்டு சம்மன் அனுப்பப்பட்டுள்ளது என தெரிவிக்கப்பட்டது.
மேலும், திமுக அரசுக்கு எதிராகவும், திராவிட கொள்கைக்கு எதிராகவும் அரசியல் ரீதியாகக் கருத்துக்களைக் கூறி வருவதால் இந்த நடவடிக்கை எடுக்கப்பட்டுள்ளதாகவும், 2011ஆம் ஆண்டில், முடிக்கப்பட்ட வழக்கை, 12 ஆண்டுகளுக்குப் பின், அரசியல் உள்நோக்கத்துடன் மீண்டும் விசாரிப்பதால், வழக்கின் விசாரணைக்குத் தடை விதிக்க வேண்டும் எனவும் தெரிவிக்கப்பட்டது.
இந்த வழக்கை விசாரித்த உயர் நீதிமன்றம், 2011ஆம் ஆண்டில் அளித்த புகாரை விஜயலட்சுமி திரும்பப் பெற்ற நிலையில், வழக்கை காவல் துறை நிலுவையில் வைத்திருந்தது ஏன்? என காவல் துறை பதிலளிக்க உத்தரவிட்டு இருந்தது. இந்த வழக்கு கடந்த முறை விசாரணைக்கு வந்தபோது, காவல் துறை தரப்பில் அறிக்கை தாக்கல் செய்யப்பட்டது.
வழக்கை ரத்து செய்வது தொடர்பாக விளக்கம் பெறுவதற்காக நடிகை விஜயலட்சுமி இன்று (செப் - 29) ஆஜராகவும் உத்தரவிடப்பட்டிருந்தது. இந்த வழக்கு, உயர் நீதிமன்ற நீதிபதி என். ஆனந்த் வெங்கடேஷ் முன் விசாரணைக்கு வரவிருந்தது. ஆனால், இன்று நீதிபதி விடுமுறை என்பதால், அவரது பட்டியலில் இருந்த இந்த வழக்கின் விசாரணை அக்டோபர் 6 ஆம் தேதிக்கு தள்ளி வைக்கப்பட்டது.
இதையும் படிங்க: ‘சிறையில் தாக்கப்பட்ட கைதிகளுக்கு மருத்துவ சிகிச்சை அளிக்க வேண்டும்’ - உயர் நீதிமன்றம் உத்தரவு!
