சென்னை ஐஐடியில் முதுகலை முதலாமாண்டு படித்துவந்த கேரளாவைச் சேர்ந்த மாணவி ஃபாத்திமா லத்தீப், நவம்பர் 8ஆம் தேதி, ஐஐடி வளாகத்தின் விடுதி அறையில் தற்கொலை செய்து கொண்டது நாடு முழுவதும் அதிர்வலைகளை ஏற்படுத்தியுள்ளது.
பெற்றோரிடம் இருந்து பிரிந்து இருந்த நிலையில் மன அழுத்தத்தால் ஃபாத்திமா இருந்ததாக, சக மாணவிகள் தெரிவித்ததாகக் கூறி விடுதி காப்பாளர் லலிதா தேவி, கொடுத்த புகாரில் அடிப்படையில் கோட்டூர்புரம் காவல்நிலையத்தில் வழக்குப் பதிவு செய்யப்பட்டது.
ஆனால், மாணவி ஃபாத்திமாவின் தந்தை அப்துல் லத்தீப், பேராசிரியர்கள் சிலர் அளித்த மத ரீதியான துன்புறுத்தலால்தான் தற்கொலை முடிவுக்கு வந்ததாகவும், ஃபாத்திமா தன் செல்போனில் குறிப்பு எழுதி வைத்துள்ளதால், தனது மகளது தற்கொலையில் சந்தேகம் இருப்பது குறித்து விசாரிக்க தமிழ்நாடு முதலமைச்சர் காவல்துறை இயக்குநரிடம் புகாரளித்தார். தற்போது இந்த வழக்கு விசாரணையானது மத்திய குற்றப்பிரிவு விசாரணைக்கு மாற்றப்பட்டுள்ளது.
இந்நிலையில், ஃபாத்திமா லத்தீப் மரணம் தொடர்பாக சிபிஐ விசாரணைக்கு உத்தரவிடக் கோரி தேசிய மாணவர்கள் கூட்டமைப்பு உயர்நீதிமன்றத்தில் மனுத்தாக்கல் செய்துள்ளது.
அதில், சென்னை ஐஐடியில் கடந்த 2018ஆம் ஆண்டு முதல் தற்போது வரை 5 மாணவர்கள் சந்தேகமான முறையில் உயிரிழந்துள்ளதாகவும், இத்தகைய மரணங்கள் தொடரும் நிலையில் மாணவி ஃபாத்திமாவின் மரணத்தில் சந்தேகம் உள்ளது. எனவே, மத்திய குற்றப்பிரிவு காவல்துறையினர் விசாரணை மேற்கொண்டுள்ள இந்த வழக்கை சிபிஐ விசாரணைக்கோ அல்லது தனி விசாரணை அமைப்புக்கோ மாற்ற வேண்டுமென மனுவில் குறிப்பிடப்பட்டுள்ளது.
இந்த வழக்கு விரைவில் விசாரணைக்கு வரவுள்ளதாகத் தெரிவிக்கப்பட்டுள்ளது.
இதையும் படிங்க:ஐஐடி மாணவி ஃபாத்திமா மரணம் - இந்திய மாணவர் சங்கத்தினர் மனு!
