சென்னை அண்ணா நூற்றாண்டு நூலகத்தில் பள்ளிக்கல்வித்துறை அமைச்சர் அன்பில் மகேஷ் பொய்யாமொழி, பள்ளிக் கல்வித் துறை சார்பில் வழங்கப்படும் 23 வகை சான்றிதழ்களை இணையதளம் வழியாக வழங்கும் திட்டத்தை தொடங்கி வைத்தார். மேலும், எதிர்வரும் 2022 - 2023 கல்வியாண்டிற்கான நாள்காட்டியையும் அவர் வெளியிட்டார்.
இதனைத் தொடர்ந்து செய்தியாளர்களிடம் பேசிய அன்பில் மகேஷ், “1 முதல் 10 ஆம் வகுப்பு வரையிலான மாணவர்களுக்கு திட்டமிட்டபடி ஜூன் 13 ஆம் தேதி வகுப்புகள் தொடங்கப்படும். அதேபோல், ஜூன் 20 ஆம் தேதி 12 ஆம் வகுப்பிற்கும், ஜுன் 27 ஆம் தேதி 11 ஆம் வகுப்பிற்கும் வகுப்புகள் தொடங்கப்படும்.
மேலும், அடுத்த கல்வியாண்டிற்கான பொதுத் தேர்வுகள், அடுத்த ஆண்டு (2023) மார்ச் 13 ஆம் தேதி 12 ஆம் வகுப்பிற்கும், மார்ச் 14 ஆம் தேதி 11 ஆம் வகுப்பிற்கும், ஏப்ரல் 3 ஆம் தேதி பத்தாம் வகுப்பிற்கும் தொடங்கப்படும். மேலும், வருகின்ற கல்வியாண்டில் சனிக்கிழமைகளிலும் வகுப்புகளை நடத்த வேண்டிய தேவை உள்ளது. மாணவர்களுக்கு உரிய மனநல ஆலோசனைகள் பள்ளி துவங்கிய பின் வழங்கப்படும்.
நேற்று நடைபெற்று முடிந்த பத்தாம் வகுப்பு பொதுத்தேர்வில் கணித பாடத்தில் பாடத்திட்டத்தை தாண்டிய கேள்விகள் கேட்கப்பட்டது தொடர்பாக மாணவர்களுக்கு கருணை மதிப்பெண் வழங்குவது குறித்து பரிசீலிக்கப்படும். ஒன்று முதல் ஐந்தாம் வகுப்பு வரையிலான மாணவர்களுக்கு காலை சிற்றுண்டி வழங்கும் திட்டம் தொடங்கப்படவுள்ளது.
எனவே, இந்த காலை சிற்றுண்டி திட்டம் செயல்பாட்டுக்கு வந்த பின்னர், பள்ளி வேலை நேரத்தில் மாற்றம் இருக்கும். அந்த வகையில் மாணவர்கள் காலையில் 8.30 மணிக்கு பள்ளிக்கு வரவேண்டும். இதனால், 9 மணிக்கு வகுப்புகள் தொடங்கப்படும். மாணவர்களுக்கு வழங்கப்படும் சீருடை, பாடப்புத்தகங்கள் உள்ளிட்ட இலவச திட்டங்கள் பள்ளி துவங்கிய ஒரு மாத காலத்திற்குள் வழங்கப்படும்” என கூறினார்.
இதையும் படிங்க: பத்தாம் வகுப்பு கணித தேர்வு கடினம் - நடத்தாத பாடத்தில் இருந்து கேள்விகள்?
