ஆர்.கே.நகரில் இடைத்தேர்தலின் போது சுகாதாரத்துறை அமைச்சர் விஜயபாஸ்கரின் வீடு உள்ளிட்ட 32 இடங்களில் வருமான வரித்துறையினர் அதிரடி சோதனை நடத்தினர். இதில் ரூ.89 கோடியே 60 லட்சம் ரூபாய் சிக்கியது.
பணப்பட்டுவாடா தொடர்பாக வருமானவரித்துறையினர் தாக்கல் செய்த அறிக்கையில், அமைச்சர் விஜயபாஸ்கர், சிட்லபாக்கம் ராஜேந்திரன், எம்ஜிஆர் மருத்துவப் பல்கலைக்கழக துணைவேந்தர் கீதாலட்சுமி, சமத்துவ மக்கள் கட்சித் தலைவர் சரத்குமார் ஆகியோரின் பெயர்கள் இடம்பெற்றிருந்தன.
பணப்பட்டுவாடா தொடர்பாக விரைந்து நடவடிக்கை எடுக்கவும், விசாரணையை சிபிஐக்கு மாற்றவும் உத்தரவிடக்கோரி திமுக வைரக்கண்ணன், மருது கணேஷ், அருண் நடராஜன் ஆகியோர் உயர்நீதிமன்றத்தில் வழக்கு தொடர்ந்தனர்.
வழக்கை விசாரித்த உயர்நீதிமன்ற நீதிபதிகள் சிபிஐ விசாரணை கேட்டு, திமுக தொடர்ந்த வழக்கின் தீர்ப்பை மட்டும் தேதி குறிப்பிடாமல் ஒத்திவைத்தனர்.
நிலுவையிலிருந்த இந்த வழக்கு இன்று, நீதிபதிகள் சத்யநாராயணன், சேஷசாயி அமர்வில் மீண்டும் விசாரணைக்கு வந்தது. அதில் தேர்தல் ஆணையம் சார்பில் ஆஜரான வழக்கறிஞர், பணப்பட்டுவாடா புகார்களில் எடுக்கப்பட்ட நடவடிக்கை குறித்த அறிக்கையை சீலிட்ட கவரில் தாக்கல் செய்தார்.
இதையடுத்து நீதிபதிகள், வழக்கின் தேவை கருதி விசாரித்து, தமிழ்நாடு அரசு விரிவான அறிக்கை தாக்கல் செய்ய வேண்டுமென உத்தரவிட்டு வழக்கை வரும் 30ஆம் தேதிக்கு ஒத்திவைத்தனர்.
இதையும் படிங்க: ப. சிதம்பரத்திற்கு ஜாமின்
