படைப்பாளிகள் மக்கள் இயக்கம் சார்பில் சென்னை அடையாறு பகுதியில், ‘வளர்க்கப்படுகின்ற வெறுப்பு அரசியல்’ என்ற தலைப்பில் கருத்தரங்கம் நடைபெற்றது. இதில் பாமக நிறுவனர் ராமதாஸ் சிறப்பு அழைப்பாளராக கலந்துகொண்டார்.
அப்போது பேசிய அவர், பத்திரிகையாளர்களை கழிசடை என்றும், இன்னும் குறிப்பிட முடியாத அருவருக்கத்தக்க வார்த்தைகளை உபயோகித்தும் மிக இழிவாகப் பேசினார்.
அதேபோல், தன்னை மரம் வெட்டி என்று அழைப்பவர்களை வெட்டுவேன் என பகிரங்கமாக மிரட்டல் விடுத்த ராமதாஸ், சில பத்திரிகையாளர்களால் தன்னை ஒன்னும் செய்ய முடியாது எனவும் தனது பேச்சில் குறிப்பிட்டார்.
மேலும், பாமக இளைஞர்கள் எழுச்சி கண்டால் ஊடகங்கள் மாண்டு போய்விடும் என்றும் செய்தியாளர்களுக்கு பகிரங்கமாக மிரட்டல் விடுக்கும் தொணியில் ராமதாஸ் பேசியுள்ளார்.
தமிழ்நாட்டின் குறிப்பிடத்தக்க அரசியல்வாதிகளில் ஒருவராக விளங்கும் ராமதாஸின், இதுபோன்ற அருவருக்கத்தக்க பேச்சு பொதுமக்களிடையே அதிருப்தியையும், அதிர்ச்சியையும் ஏற்படுத்தியுள்ளது.
