'பறவைகளின் தாகத்தை தீர்க்க ரயில்வே காவல் துறை புதுமுயற்சி'

சென்னை: ரயில் நிலையங்களில் சுற்றித்திரியும் பறவை, செல்லப்பிராணிகளின் தாகத்தை தீர்க்கும் வகையில்,ரயில்வே காவல் துறை சார்பில் சென்னை எம்ஜிஆர் ரயில்நிலையத்தில் தண்ணீருடன் கூடிய பெரிய குவளைகள் வைக்கப்பட்டது.

கோடை காலங்களில் பறவைகள் மற்றும் விலங்குகளின் தாகம் தீர்க்கும் வகையில் சென்னை, திருவள்ளூர், காஞ்சிபுரம் மாவட்ட காவல் நிலையங்களில், விலங்கு நல ஆர்வலர்கள் மூலம் தண்ணீர் நிரப்பப்பட்ட குவளைகள் வைக்கப்பட்டது.

மேலும், ரயில் நிலையங்களிலும் பறவைகள் மற்றும் செல்லப்பிராணிகள் சுற்றித்திரிவதால், அவை தங்களுக்கு தாகம் ஏற்படும் போது ரயில் நிலையத்திலும், அதன் சுற்றுப்புறத்திலும் தேங்கியுள்ள தண்ணீரை குடித்து வருகின்றன.

தண்ணீர் வைக்கும் காவல்துறையினர்

இந்நிலையில், விலங்குகள் நல ஆர்வலர்கள், அவற்றிற்கும் சுத்தமான குடிநீர் கிடைக்க வேண்டும் என்பதற்காக ரயில்வே டி.ஜி.பி. சைலேந்திரபாபு ஆலோசனையின் பேரில் தமிழ்நாட்டில் 58 ரயில்வே காவல் நிலையங்களில் பறவைகள் மற்றும் செல்லப்பிராணிகளுக்கு தண்ணீர் நிரப்பப்பட்ட குவளைகள் வைக்க முடிவு செய்தனர்.

அதன்படி நேற்று எம்ஜிஆர் சென்ட்ரல் ரயில் நிலையத்தில் உள்ள காவல் நிலையத்தில் தண்ணீர் குவளைகள் வைத்தனர். இதில் எம்ஜிஆர் ரயில்நிலைய துணை கண்காணிப்பாளர் முருகன், ஆய்வாளர்கள் தாமஸ் ஏசுதாசன், வேலு, சிவனேசன் ஆகியோர் கலந்து கொண்டு, பறவைகள் மற்றும் செல்லப்பிராணிகளுக்காக தண்ணீர் நிரப்பிய குவளைகளை ரயில்வே காவல் நிலையத்தில் வைத்தனர்.

தண்ணீர் வைக்கப்பட்டுள்ள குவளைகள்

மேலும் பெரம்பூர், அரக்கோணம் உள்ளிட்ட ரயில்வே காவல் நிலையங்களுக்கும் தண்ணீர் குவளைகளை வழங்கினர். பின்னர் ரயில்வே டி.எஸ்.பி முருகன் நிருபர்களிடம் கூறுகையில், ‘‘பறவைகள் மற்றும் செல்லப்பிராணிகளின் தாகத்தை தீர்க்க விலங்குகள் நல ஆர்வலர் சாய் விக்னேஷூடன் இணைந்து சுத்தமான தண்ணீர் நிரப்பிய குவளைகளை ரயில் நிலையத்தில் வைத்துள்ளோம்.

இந்த தண்ணீரில் கொசுக்குகள் தேங்காத அளவுக்கு பார்த்துக் கொள்ளப்படும். மேலும் பறவைகள் மற்றும் விலங்குகள் தண்ணீர் குடித்து செல்ல தேவையான ஏற்பாடுகள் செய்யப்படும்,’’ என்றார்.

இதையும் படிங்க:தாகம் தீர்க்க குடிநீரின்றி 15 குரங்குகள் உயிரிழந்த சோகம்!