ஐக்கிய அமீரகத்தில் உள்ள துபாய் நகரிலிருந்து 359 பயணிகளுடன் இரண்டு சிறப்பு விமானங்கள் இன்று (மே. 9) அதிகாலை 1 மணியளவில் சென்னை சர்வதேச விமான நிலையத்தை வந்தடைந்தன.
கரோனா வைரஸ் நோய்த் தொற்றைத் தடுக்கும் வகையில், வெளிநாடுகளிலிருந்து திரும்பிய பயணிகளைப் பரிசோதித்து அவர்களை 14 நாள்களுக்குத் தனிமைப்படுத்திக்கொள்ள பொது சுகாதாரத்துறை அறிவுறுத்தியுள்ளது.
அதன்படி, துபாயிலிருந்து வந்த 359 பயணிகளிடமும் பெருநகர சென்னை மாநகராட்சி சார்பில் சென்னை சர்வதேச விமானநிலையத்தில் அமைக்கப்பட்டிருந்த மாதிரி சேகரிப்பு மையத்தில் தடவல் மாதிரிகள் சேகரிக்கப்பட்டன.
இதையடுத்து, பயணிகள் அனைவரும் பெருநகர சென்னை மாநகராட்சி துணை ஆணையர் (வருவாய் மற்றும் நிதி) ஜெ.மேகநாத ரெட்டி மேற்பார்வையில் பேருந்துகளில் சமூக இடைவெளியுடன் பொது சுகாதாரத்துறையின் பாதுகாப்பு நடைமுறையின்படி, அழைத்துச் செல்லப்பட்டு, விடுதிகளில் தனிமைப்படுத்தித் தங்க வைக்கப்பட்டுள்ளனர்.
இவர்களில், 82 பயணிகள் ராயல் ரீஜென்சி ஓட்டலிலும், 24 பயணிகள் ஹில்டன் ஓட்டலிலும், மீதமுள்ள நபர்கள் செங்கல்பட்டு மாவட்ட நிர்வாகத்தின் கண்காணிப்பில் விஐடி பல்கலைக்கழக விடுதியிலும் தங்க வைக்கப்பட்டுள்ளனர்.
இந்நிலையில், பூந்தமல்லி நெடுஞ்சாலையில் உள்ள ராயல் ரீஜென்சி ஓட்டலில் தங்கவைக்கப்பட்டுள்ள பயணிகளுக்கு வழங்கப்படும் உணவு, குடிநீர், அடிப்படை வசதிகள் குறித்து கரோனா நோய்த் தடுப்பு சிறப்பு அலுவலர் மருத்துவர் ராதாகிருஷ்ணன், சென்னை மாநகராட்சி ஆணையர் பிரகாஷ் ஆகியோர் நேரில் சென்று விடுதி மேலாளர்களிடம் கேட்டறிந்தனர்.
பின்னர், பயணிகளின் உடல் நலன் குறித்து நாள்தோறும் மாநகராட்சி சுகாதாரத்துறை அலுவலர்கள் கேட்டறிந்து கண்காணிக்க வேண்டும் என உத்தரவிட்டனர். இந்த ஆய்வின் போது துணை ஆணையர் (வருவாய் மற்றும் நிதி) மேகநாத ரெட்டி உள்ளிட்ட அலுவலர்கள் உடனிருந்தனர்.
இதையும் படிங்க : ரசாயன தொழிற்சாலைக்களுக்கான ஆலோசனைகள் வெளியீடு
