நேற்று இணையவழியில் நடைபெற்ற தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழுக் கூட்டத்தைத் தொடர்ந்து செய்தியாளர்களை சந்தித்துப் பேசிய பி.ஆர்.பாண்டியன், "மத்திய அரசு கொண்டு வந்த வேளாண் மசோதாக்களை திரும்பப் பெறவேண்டுமென்று பல்வேறு இடங்களில் போராட்டம் நடைபெற்றுக் கொண்டிருக்கிறது. இந்த மசோதாக்களின் மூலம் விவசாயிகளுக்கு பல அதிகாரங்கள் கிடைக்கும் எனவும், விளைபொருள்களுக்கு நல்ல விலை கிடைக்கும் எனவும் பொய் பிரச்சாரம் செய்து வருகிறார் பிரதமர்.
இச்சட்டத்தால் வருகிற ஆண்டில் தமிழ்நாடு அரசு நெல் கொள்முதலையே கைவிடும் அளவிற்கு நெருக்கடி ஏற்படும். இதை தமிழ்நாடு முதலமைச்சர் ஆதரிப்பது நியாயமற்றது. அதனால் உடனடியாக இந்த மசோதாவை திரும்பப் பெற தமிழ்நாடு முதலமைச்சர் வலியுறுத்த வேண்டும். அக்டோபர் 2ஆம் தேதியன்று தமிழ்நாடு முழுவதும் நடக்கவிருக்கும் கிராம சபைக் கூட்டங்களில் இந்த மசோதாக்களை எதிர்த்து தீர்மானம் நிறைவேற்றப்படும். இதை மத்திய, மாநில அரசுகள் அங்கீகரிக்க வேண்டும். காவிரி டெல்டா பகுதிகளில் சம்பா சாகுபடியும், குருவை சாகுபடியும் தீவிரமாக நடைபெற்று வருகிறது.
அதேபோல், சம்பா சாகுபடிக்குத் தேவையான யூரியாவில் மிகப்பெரிய அளவில் தட்டுப்பாடு ஏற்பட்டுள்ளது. இதுபோன்று பல்வேறு இன்னல்களுக்கு இடையே விவசாயம் செய்து கொண்டிருக்கும் விவசாயிகளுக்கு, உரம் கிடைக்க அரசு உதவி செய்ய வேண்டும். ஒரு கிராமத்துக்கு இரண்டு அல்லது மூன்று கொள்முதல் நிலையங்களை தமிழ்நாடு அரசு நிறுவ வேண்டும். கூட்டுறவு வங்கிகளில் கடன் பெற முடியாமல் பல விவசாயிகள் விவசாயத்தைத் தொடங்காமல் இருக்கின்றனர். விரைவில் கூட்டுறவு வங்கிகளில் கடன் கிடைக்கும் வகையில் தமிழ்நாடு அரசு நடவடிக்கை எடுக்க வேண்டும்.
திராவிட முன்னேற்றக் கழகம் இன்று (செப்.27) நடத்தவுள்ள போராட்டத்தில் தமிழ்நாட்டில் உள்ள 40 லட்சம் விவசாயக் குடும்பங்கள் கலந்து கொள்கிறார்கள். ஒப்பந்த சாகுபடி முறையின் கீழ் பல ஆண்டுகளாக கார்ப்பரேடிடம் விவசாயிகள் அடிமையாக உள்ளார்கள். கார்ப்பரேட் எடுக்கும் முடிவில் நீதிமன்றம் தலையிட முடியாது என்று இச்சட்டம் சொல்கிறது” எனத் தெரிவித்தார்.
