'2 பாம்புகள், 16 மரப்பல்லிகள், உடும்புகள்' - பயணி கூடையைத் திறந்து அதிர்ந்த சுங்கத்துறையினர்!

சென்னை: மலேசியாவிலிருந்து சென்னைக்கு வந்த விமானத்தில் 2 விஷப்பாம்புகள்,  உடும்புகள்,16 மரப்பல்லிகள் உள்ளிட்டவை கடத்தி வரப்பட்ட நிலையில், அதனை பறிமுதல் செய்து இரண்டு பேரை சுங்கத் துறையினர் கைது செய்துள்ளனர்.

மலேசியாவிலிருந்து சென்னைக்கு வந்த விமானத்தில் 2 விஷப்பாம்புகள், உடும்புகள், 16 மரப்பல்லிகளைக் கூடைக்குள் வைத்து கடத்தி வந்த ராமநாதபுரத்தைச் சோ்ந்த முகுமது பா்வேஸ் (36), சிவகங்கையைச் சோ்ந்த முகமது அக்பா் (28) ஆகிய 2 பேரையும் சுங்கத்துறை கைது செய்து விசாரணை நடத்தினர்.

பாம்புகள் மற்றும் உடும்புகளை மலேசியாவிற்கே திருப்பி அனுப்புவதா? அல்லது வனத்துறையிடம் ஒப்படைத்து கிண்டி பாம்பு பண்ணையில் விடுவதா என்று சுங்கத்துறை அலுவலர்கள், வண்டலூா் உயிரியல் பூங்கா விலங்கியல் மருத்துவா்கள் ஆகியோர் ஆலோசனை நடத்தினா்.

பின்னர் மலேசியாவிற்கே திருப்பி அனுப்ப முடிவு செய்தனா். அதன்படி நாளை அதிகாலை ஒரு மணிக்கு விமானத்தின் மூலம், இவையனைத்தும் மலேசியாவிற்கு திருப்பி அனுப்பப்படுகிறது. தங்கக் கட்டிகளை மறைத்து வைத்திருக்கலாம் என்று நினைத்து கூடைகளை திறந்து பாா்த்து சோதனையிட்ட போது, சீறிக்கொண்டு எழும்பிய பாம்புகளைக் கண்டு சுங்கத்துறையினா் அலறியடித்துக் கொண்டு ஓடியுள்ளனர்.

இதையும் படிங்க: விமான நிலையத்தில் ரூ.30.90 லட்சம் மதிப்புள்ள தங்கம் பறிமுதல்!