சென்னை: சென்னை ஐஐடி ஆய்வாளர்கள் காவிரி ஆற்றில் மேற்கொண்ட ஆய்வில் மருந்து தயாரிக்க பயன்படும் ரசாயன பொருள்கள், அழகு சாதன பொருட்கள், பிளாஸ்டிக், தீ அணைப்பான்கள், கன உலோகங்கள், பூச்சிக்கொல்லிகள் போன்றவை கலந்திருப்பதாக கண்டறிந்துள்ளனர்.
இவற்றில், மருந்து பொருள்களால் ஏற்படும் மாசு மிக அதிகம். இந்தியா, உலகின் இரண்டாவது பெரிய மருந்து உற்பத்தி நாடாகும். மருந்துசார் மாசு பொருள்கள் சிறிய அளவுகளில் நீர்நிலைகளில் கலந்தாலும் நீண்ட காலத்திற்கு மனிதர்களுக்கும், சுற்றுச்சூழலுக்கும் தீங்கு விளைவிக்கும்.
டாக்டர் லிகி பிலிப், நிதா மற்றும் சென்னை ஐஐடி சிவில் இன்ஜினியரிங் துறை பேராசிரியரும், நிறுவனத் தலைவருமான கே.ஜி. கணபதி தலைமையிலான ஐஐடி ஆராய்ச்சியாளர்கள் குழு, காவிரி ஆற்றில் அதிகரித்து வரும் மாசு பொருள்களின் பருவகால பரவலை அளவிடும் ஆய்வை மேற்கொண்டது. நதி நீரின் தரத்தை மதிப்பிடுவது மாசு பொருள்களின் பரவலையும் அதற்கான காரணிகளையும் சுற்றுச்சூழல் அமைப்பில் அவற்றின் தாக்கத்தையும் புரிந்துகொள்ள உதவுகிறது.
காவிரி ஆற்றில் மருந்துப் பொருள்களால் மாசுபடுவதைத் தொடர்ந்து கண்காணிப்பது அவசியம். மாசு பொருள்கள் தஞ்சமடையும் நீர்நிலைகளில் மாசின் அளவை குறைக்க, கழிவு நீரை சுத்திகரிப்பு செய்ய வேண்டியதன் தேவையையும் ஆய்வு குறிப்பிடுகிறது.
இந்திய அரசின் அறிவியல் தொழில்நுட்ப துறையின் நீர் தொழில்நுட்ப முன்னெடுப்பு மற்றும் இங்கிலாந்தின் சுற்றுச்சூழல் ஆராய்ச்சி கவுன்சில் ஆகியவற்றின் ஒருங்கிணைந்த நிதி உதவியுடன் இந்த அய்வு மேற்கொள்ளப்பட்டுள்ளது.
ஆய்வின் முடிவுகள் Science of the Total Environment இதழில் கட்டுரையாக வெளியாகியுள்ளது. இந்த ஆராய்ச்சியின் முக்கிய கண்டுபிடிப்புகளைச் சுட்டிக்காட்டிய குழு, காவிரி ஆற்றுடைய நீரின் தரத்தை இரண்டு வருடங்களாக கண்காணித்து, புதிதாக அதிகரித்து வரும் மாசுகள், குறிப்பாக, மருத்துவ மாசுகளின் பருவகால மாறுபாட்டை மதிப்பிட்டோம் என்றனர்.
செய்தியாளர்களிடம் பேசிய பேராசிரியர் லிகி பிலிப், “ இந்த ஆய்விற்காக காவிரி ஆற்றின் 22 இடங்களில் இருந்து தண்ணீர் சேகரித்தது. நீர்ப்பிடிப்புத் தளங்களில் உள்ள நீரின் தரமும் கண்காணிக்கப்பட்டது.
எங்கள் கண்டுபிடிப்புகள் அச்சுறுத்துவதாக உள்ளன. இதுவரை, மருந்து கழிவுகள் மனித ஆரோக்கியத்தையும் காலப்போக்கில் சுற்றுச்சூழலையும் எவ்வாறு பாதிக்கின்றன என்பது பற்றி அதிகம் அறியப்படவில்லை. இந்தக் குழுவின் சுற்றுச்சூழல் இடர் மதிப்பீடு, நதிநீர் அமைப்பின் தேர்ந்தெடுக்கப்பட்ட நீர்வாழ் உயிரினங்களுக்கு மருத்துவ மாசுகள் நடுத்தரத்திலிருந்து அதிக ஆபத்தை ஏற்படுத்துகின்றன என்பதைக் காட்டுகிறது" என்றார்.
ஆர்சனிக், குரோமியம், ஈயம் மற்றும் நிக்கல் போன்ற உலோகங்களால் குறிப்பிடத்தக்க மாசு ஏற்பட்டிருந்தது. தண்ணீர் உள்வாங்கும் இடங்களில் கூட அதிக அளவு மருத்துவ மாசுகள் நிறைந்திருப்பது கண்டறியப்பட்டுள்ளது என்று அறிக்கையில் குறிப்பிடப்பட்டுள்ளது.
இதையும் படிங்க: பெங்களூருவில் தொடரும் துயரம்: மூன்றுமாடிக் கட்டடம் இடிந்து தரைமட்டம்
