இதுகுறித்து அக்கட்சியின் நிறுவனத் தலைவர் எஸ். இசக்கிமுத்து தாக்கல் செய்துள்ள மனுவில், அரசியலமைப்புச் சட்டம் உருவாக்கப்பட்டபோது, வகுப்புவாரி இடஒதுக்கீடு மட்டுமே இருக்க வேண்டும் என்றும், சாதிவாரி இடஒதுக்கீடு இருக்கக்கூடாது என்றும் குறிப்பிடப்பட்டுள்ளது. தமிழ்நாட்டில் 2 கோடி மக்கள் தொகை கொண்ட தேவர் சமூகத்திற்கு இட ஒதுக்கீடு வழங்காமல், அதே அளவு மக்கள் தொகை கொண்ட வன்னியர் சமூகத்திற்கு மட்டும் 10.5 விழுக்காடு இட ஒதுக்கீடு வழங்கப்பட்டுள்ளது.
அம்பாசங்கர் ஆணையம் அளித்த தகவலின் அடிப்படையில், 8.5 விழுக்காடு வன்னியர்கள் இருப்பதாக கூறியதே தவறானது என்றும், மனுவில் அவர் குறிப்பிட்டுள்ளார். மக்கள் தொகை அளவை மீறும் வகையில் 10.5% இட ஒதுக்கீடு அறிவிக்கப்பட்டிருப்பது சட்டவிரோதம் என்றும், மிகவும் பிற்படுத்தப்பட்ட பிரிவில் உள்ள மற்ற சாதியினரிடையே பாகுபாடு காட்டுவதாக அமைந்துள்ளதாகவும் அவர் மனுவில் குறிப்பிட்டுள்ளார்.
பாமக நிறுவனர் டாக்டர் ராமதாஸ் எழுதியுள்ள புத்தகத்திலேயே அரசு பணியில் ஒரு லட்சம் பேர், அமைப்பு சார்ந்த பணிகளில் ஒரு லட்சம் பேர் என 2 லட்சம் வன்னியர்கள் இருப்பதாக எழுதியுள்ளதையும் சுட்டிக்காட்டியுள்ளார். இது மொத்த ஊழியர்களில் 10 விழுக்காட்டிற்கும் அதிகமானதாக உள்ளதாகவும் குறிப்பிட்டுள்ளார்.
அதேபோல் 2012ஆம் ஆண்டு தமிழ்நாடு பிற்படுத்தப்பட்டோர் ஆணையத்தின் விசாரணை வரம்பு திருத்தி அமைக்கப்பட்ட பிறகு, தமிழ்நாடு அரசிற்கு எந்த பரிந்துரைகளும் வழங்கப்படாத நிலையில், வன்னியர்களுக்கு மட்டும் தற்போது 10.5 விழுக்காடு உள் ஒதுக்கீடு என்பது சட்டத்தின்படி அனுமதிக்க தக்கதல்ல எனவும் அவர் தெரிவித்துள்ளார். எனவே இட ஒதுக்கீடு தொடர்பான சட்டத்தை ரத்து செய்ய உத்தரவிட வேண்டும் என்று இசக்கிமுத்து கோரிக்கை வைத்துள்ளார்.
இதையும் படிங்க: சென்னையில் பெண் தற்கொலை செய்துகொண்ட நிலையில் சடலமாக மீட்பு
