பயணிகளின் உயிருக்குப் பாதுகாப்பு வழங்க வேண்டியது ரயில்வேயின் கடமை - நீதிமன்றம்

சென்னை: ரயில் பயணிகளின் உயிருக்குப் போதுமான பாதுகாப்பு வசதிகளை ஏற்படுத்த வேண்டியது ரயில்வே அலுவலர்களின் கடமை என்றும் தவறுகளில் இருந்து ரயில்வே அலுவலர்கள் எந்தப் பாடத்தையும் கற்றுக் கொள்ளவில்லை எனவும் உயர் நீதிமன்றம் வேதனை தெரிவித்துள்ளது.

சென்னையில் வசிக்கும் தனது தாயைச் சந்திக்க திண்டுக்கல்லிலிருந்து வந்த இந்துராணி என்ற 38 வயது பெண், புறநகர் ரயிலில் கோடம்பாக்கம் - நுங்கம்பாக்கம் ரயில் நிலையங்களுக்கு இடையில் பயணித்தபோது, ரயிலிலிருந்து தவறி விழுந்து சம்பவ இடத்திலேயே உயிரிழந்தார்.

அவரது மரணத்துக்கு இழப்பீடு கோரி, ரயில்வே தீர்ப்பாயத்தில் வழக்குத் தொடரப்பட்டது. ஆனால், பயணச்சீட்டு தொலைந்துவிட்டதால், அவர் பயணி அல்ல எனக் கூறி கோரிக்கையைத் தீர்ப்பாயம் நிராகரித்துவிட்டது.

பயணிகளின் உயிருக்குப் பாதுகாப்பு வழங்க வேண்டியது ரயில்வேயின் கடமை

இதை எதிர்த்துத் தாக்கல்செய்யப்பட்ட மனுவை விசாரித்த நீதிபதி எஸ்.எம். சுப்பிரமணியம், ரயில்களில் பயணிக்கும் பயணிகளின் உயிருக்குப் பாதுகாப்பு வழங்க வேண்டியது ரயில்வே அலுவலர்களின் கடமை எனவும், கதவுகள் இல்லாததால் புறநகர் ரயில்களில் இதுபோன்ற அசம்பாவித சம்பவங்கள் நடப்பதாகவும், அவற்றிலிருந்து அலுவலர்கள் எந்தப் பாடத்தையும் கற்றுக் கொள்ளவில்லை எனவும் வேதனை தெரிவித்துள்ளார்.

தவறுகளிலிருந்து ரயில்வே அலுவலர்கள் எந்தப் பாடத்தையும் கற்றுக் கொள்ளவில்லை - நீதிமன்றம் அதிரடி

அஜாக்கிரதையாகவும், கவனக்குறைவாகவும் இருந்ததாகக் கூறி இழப்பீடு வழங்க மறுக்க முடியாது எனக் குறிப்பிட்ட நீதிபதி சுப்பிரமணியம், போதிய பாதுகாப்பு வசதிகளை ஏற்படுத்தாத ரயில்வே நிர்வாகத்துக்கும் இந்த அசம்பாவித சம்பவத்தில் பங்கு இருப்பதாகக் கூறி, பலியான பெண்ணின் குடும்பத்துக்கு 8 லட்சம் ரூபாய் இழப்பீட்டை ஆறு விழுக்காடு வட்டியுடன் டெபாசிட் செய்ய உத்தரவிட்டார்.