சென்னை: மிக்ஜாம் புயல் தாக்குதல் தலை நகரைத் திண்டாட வைத்து விட்டது. புயல் கடந்து சென்ற நிலையில் மக்களும் மெல்ல மெல்ல இயல்பு நிலைக்குத் திரும்பி வருகின்றனர். இந்த இயற்கை பேரிடரால் ஏற்பட்ட பாதிப்புகள் மனிதர்கள் மட்டுமல்ல இயற்கை வளங்களையும் விட்டு வைக்கவில்லை.
அப்படி இந்த மிக்ஜாம் புயலில் சிக்கித் தான் காத்து வந்த மிச்ச சொச்ச இயற்கை அழகையும் இழக்கும் நிலையை அடைந்துள்ளது பள்ளிக்கரணை சதுப்புநில பகுதி. நகரமயமாதல் என்னும் கொடிய கரங்களின் பிடியிலிருந்து தப்பி மிதமிஞ்சி இருக்கும் பள்ளிக்கரணை சதுப்புநில பகுதியானது 700 ஹெக்டேர் பரப்பளவைக் கொண்டது. இது 176 வகையான பறவை இனங்கள், 10 வகையான பாலூட்டிகள், 21 வகையான ஊர்வனங்கள், 50 வகையான மீன் இனங்கள், 14 வகையான வண்ணத்துப் பூச்சிகளின் வாழ்விடமாகவும், 459 வகையான தாவர இனங்களையும் கொண்டுள்ளது.
ஒவ்வொரு ஆண்டும் கணக்கெடுப்பின்படி 2 லட்சத்துக்கும் மேற்பட்ட பறவைகள் இந்த சதுப்புநிலப் பகுதியில் கண்டறியப்படுவதாக சமூக ஆர்வலர்களின் தரப்பிலிருந்து கூறப்படுகிறது. இந்நிலையில், கடந்த சில தினங்களுக்கு முன்பு சென்னையைத் தாக்கிய மிக்ஜாம் (Michaung) புயலால் சென்னை பெரிது பாதிக்கப்பட்டது.
குறிப்பாக பள்ளிக்கரணை, வேளச்சேரி, ஆதம்பாக்கம் பகுதிகள் மிகவும் பாதிப்படைந்தது. இந்நிலையில், அந்த பகுதியில், தொடர்ந்து பணிகள் நடைபெற்று மக்களின் வாழ்க்கை இயல்பை நோக்கித் திரும்பினாலும் பறவைகளின் வாழ்விடமான சதுப்புநிலம் தன் நிலைக்குத் திரும்பாமல் தான் உள்ளது.
வேளச்சேரி, ஆதம்பாக்கம் ஏரியிலிருந்து வெளியேறும் உபரி நீர் மற்றும் அதன் சுற்றுவட்டாரப் பகுதி வடிகால்களிலிருந்து வடியும் மழைநீர், மற்றும் வெள்ள நீரானது வீராங்கால் ஓடை வழியாகச் செல்லும் போது நெகிழி, மற்றும் வீட்டு உபயோக குப்பைகளைச் சுமந்து செல்கிறது. இதனால் அந்த சதுப்புநிலத்தில் இருக்கும் பறவைகளின் வாழ்க்கையானது பாதிப்புக்கு உள்ளாகி உள்ளது.
இது குறித்து சமூக ஆர்வலரான வெற்றிச்செல்வன் கூறுகையில், “தற்போது சதுப்புநிலம் சார்ந்த பகுதிகளில், கால்வாய்களை பொக்லைன் இயந்திரங்களைக் கொண்டு சுத்தம் செய்யக் கூடாது. ஏனென்றால், அது அங்கு இருக்கும் சுற்றுச்சுழலுக்கு மிகவும் ஆபத்தானது.
மேலும், சம்பந்தப்பட்ட துறைசார்ந்த அதிகாரிகள் தொடர்ந்து கண்காணிக்க வேண்டும். சென்னையில் தற்போது ஏற்பட்ட பாதிப்புகளை மனதில் கொண்டு, பள்ளிக்கரணையை ஆக்கிரமித்துள்ள பெரிய கட்டிடங்களை அகற்றினால் தான் தென் சென்னையைக் காப்பாற்ற முடியுமெனில் அதைச் செய்யவேண்டும்.
மேலும், கால்வாயின் போக்கை அவர்கள் மாற்றி அமைக்க வேண்டும். பள்ளிக்கரணை சதுப்புநிலத்தைப் பொருத்த வரை எப்போதும் அங்கு நீர் தேங்கி இருந்தால் மட்டுமே அங்குப் பறவைகளின் வாழ்வாதாரத்தைப் பாதுகாக்க முடியும். அங்கு நீர் தேங்கி இருந்து ஏப்ரல் - ஜூலை காலத்தில் பறவைகளுக்கு உதவியாக இருக்கும்.
ஆனால் தற்போது வேளச்சேரி, ஆதம்பாக்கம் ஏரியிலிருந்து வெளியேறும் உபரி நீர் மற்றும் அதன் சுற்றுவட்டாரப் பகுதி வடிகால்களிலிருந்து வடியும் மழைநீர், மற்றும் வெள்ள நீரானது வீராங்கால் கால்வாய் வழியாக வருவதால், தொடர்ந்து இப்பகுதியில் நீர் தேங்காமல் ஓடிக்கொண்டிருக்கிறது. இது சதுப்புநிலத்தின் தன்மையைப் பாதிக்கும் அபாயம் உள்ளது. சதுப்புநிலத்தின் நலனைக் கருத்தில் கொண்டு அரசு நடவடிக்கை எடுக்க வேண்டும்” எனத் தெரிவித்தார்.
இது குறித்து பறவை ஆர்வலர் ஒருவர் கூறுகையில், “சென்னையில் அக்டோபர் மாதம் தொடக்கத்தில், மழை தொடர்ந்து பெய்தது. இதனால் அக்டோபர் மாத தொடக்கத்தில் பள்ளிக்கரணை சதுப்புநிலப்பகுதிக்கு சாம்பல்தலை, மஞ்சள் வால்பறவை, நீல சிறகு வாத்து, தட்டைவாயன் உள்ளிட்ட அரிய வகை பறவைகள் வரத்தொடங்கிப் பரவலாகக் காணப்பட்டது.
தற்போது புயலின் தாக்குதல் மற்றும் வீராங்கால் கால்வாய் வழியாக, கழிவுகள் மற்றும் நெகிழி ஆகியவை பள்ளிக்கரணை சதுப்புநிலத்தை அடைவதால், தொடர்ந்து அங்குப் பறவைகளின் வாழ்வாதாரம் கேள்விக் குறியாகி உள்ளது” எனத் தெரிவித்தார்.
இது குறித்து வனத்துறை அதிகாரிகளிடம் கேட்டபோது, “வீராங்கல் ஓடையில், கழிவுகள் மற்றும் நெகிழிகள் சேராமல் இருப்பதற்காக வலை ஒன்று இருக்கும். அதில், கழிவுகள் தடுத்து நிறுத்தப்பட்டு, தண்ணீர் மட்டும் அதில் செல்லும். அதில் தேங்கும் கழிவுகள் பெருநகர சென்னை மாநகராட்சி சார்பில் தினமும் அப்புறப்படுத்தப்படும்.
ஆனால், கடந்த சில தினங்களுக்கு முன் வந்த வெள்ளத்தால், தண்ணீர் வேகத்திற்கு அந்த வலையானது சேதமடைந்துள்ளது. மேலும், இந்த சம்பவம் குறித்து விரைவில் நடவடிக்கை எடுக்கப்படும். இதுகுறித்து தற்போது மாநகராட்சி அதிகாரிகளிடமும் தெரிவித்துள்ளோம். விரைவில் அது சுத்தம் செய்யப்படும்” என அதிகாரிகள் தெரிவித்தனர்.
