மாநகராட்சிக்குச் சொந்தமான நிலங்களில் மட்டுமே விளம்பர பலகைகள் வைக்கும் வகையில், தமிழ்நாடு மாநகராட்சிகள் சட்டத்தில் 2018ஆம் ஆண்டு திருத்தம் கொண்டுவரப்பட்டது. இதையடுத்து, 2019 பிப்ரவரி 1ஆம் தேதி முதல் இந்தச் சட்டம் அமலுக்கு வரும் எனவும் தமிழ்நாடு அரசு அறிவிப்பு வெளியிட்டது.
இதனை எதிர்த்து சென்னை ஹோர்டிங்ஸ் சங்கம் உள்ளிட்ட சங்கங்களின் சார்பில் சென்னை உயர் நீதிமன்றத்தில் வழக்குத் தொடரப்பட்டது. இந்த வழக்குகளைத் தலைமை நீதிபதி ஏ.பி. சாஹி, சுப்பிரமணியம் பிரசாத் அடங்கிய அமர்வு விசாரித்தது.
தனியார் நிலங்களில் விளம்பரப் பலகைகள் வைப்பதற்குத் தடைவிதிக்கும் வகையில் கொண்டு வரப்பட்டுள்ள இந்தச் சட்டத்திருத்தம் தங்கள் தொழில் உரிமையை பாதிப்பதாக மனுதாரர்கள் தரப்பில் வாதிடப்பட்டது. காளான போல பெருகிவரும் விளம்பரப் பலகைகளைக் கட்டுப்படுத்துவதற்கு பொது நலனை கருத்தில்கொண்டு இந்தச் சட்டத்திருத்தம் கொண்டுவரப்பட்டதாக அரசு தரப்பில் தெரிவிக்கப்பட்டது.
இருதரப்பு வாதங்களையும் கேட்ட நீதிபதிகள், தனியார் நிலங்களில் வைக்கப்படும் விளம்பர பலகைகளைக் கண்காணிக்க மாநகராட்சி அலுவலர்களால் இயலவில்லை என்ற காரணத்திற்காக தனியார் நிலங்களில் விளம்பரப் பலகைகள் வைக்கத் தடைவிதிக்க முடியாது எனக் கூறி, தமிழ்நாடு அரசின் சட்டத் திருத்தத்தை ரத்துசெய்து தீர்ப்பளித்தனர்.
மாநகராட்சி நிலங்களில் மட்டும் விளம்பரப் பலகைகள் வைக்க அனுமதிப்பதன் மூலம் விதிமீறல்கள் நடைபெறாது என யூகிக்க முடியாது என்று குறிப்பிட்ட நீதிபதிகள், விளம்பரங்களுக்கு உரிமம் வழங்குவது தொடர்பாக ஒரு மாதத்தில் உரிய விதிகளை கொண்டுவர வேண்டும் எனவும் தங்களது தீர்ப்பில் குறிப்பிட்டுள்ளனர்.
இதையும் படிங்க: நடிகர் சங்கத் தேர்தலுக்கு 35 லட்ச ரூபாய் செலவு - புதிய தேர்தலுக்கு இடைக்கால தடை
