தமிழ்நாடு மருத்துவம் மற்றும் மக்கள் நல்வாழ்வுத் துறை சார்பில், ’மக்களைத் தேடி மருத்துவம்’ என்ற திட்டம் தொடங்கப்பட்டு, வீடுகளுக்கே சென்று மருத்துவ உதவிகள் வழங்கப்பட்டு சிறப்பாக செயல்படுத்தப்பட்டு வருகிறது.
கடந்த ஆகஸ்ட் 5ஆம் தேதி தொடங்கப்பட்ட இத்திட்டமானது, அனைவருக்கும் நல்வாழ்வு திட்டத்தின் கீழ் உள்ள 50 ஊரக வட்டாரங்களிலுள்ள 1,172 அரசு துணை சுகாதார நிலையங்கள், 189 ஆரம்ப சுகாதார நிலையங்கள், 50 மேம்படுத்தப்பட்ட ஆரம்ப சுகாதார நிலையங்களில் செயல்படுத்தப்பட்டது.
மேலும் மூன்று மாநகராட்சிகளில் (சென்னை, கோயம்புத்தூர், திருநெல்வேலி) தலா ஒரு மண்டலத்திலுள்ள 106 பகுதிகளைச் சேர்ந்த சுகாதார நிலையங்களிலும், 21 நகர ஆரம்ப சுகாதார நிலையங்களிலும் தொடங்கப்பட்டது. முதற்கட்டமாக தமிழ்நாடு மகளிர் கழக மேம்பாட்டு நிறுவனத்தில் பயிற்சி பெற்ற 1,264 பெண் சுகாதாரத் தன்னார்வலர்களும், 50 இயன்முறை மருத்துவர்களும், 50 நோய் ஆதரவு சிகிச்சை செவிலியர்களும், இல்லம் தேடி வரும் இச்சேவையில் ஈடுபடுத்தப்பட்டுள்ளனர்.
இந்தத் திட்டம், படிப்படியாக இந்த ஆண்டு இறுதிக்குள், மாநிலத்தின் பிற கிராமப்பகுதிகளில் 385 வட்டாரங்களிலுள்ள 8,713 துணை சுகாதார நிலையங்கள் வழியாக மக்களைச் சென்றடையும் வகையில் விரிவுப்படுத்தப்படும்.
நகர்ப் புறப்பகுதிகளில் 460 நகர்ப்புற சுகாதார நிலையங்கள் வழியாக மக்களைச் சென்றடையும் வகையில் இத்திட்டம் உரிய பணியாளர்களுடன் விரிவுப்படுத்தப்படும். இத்திட்டத்தினை ஊரக மற்றும் நகர்புறங்களில் செயல்படுத்துவதற்காக 258 கோடி ரூபாய் ஒதுக்கீடு செய்யப்பட்டது.
இத்திட்டம் தொடங்கப்பட்டு இதுவரை நீரிழிவு நோய்க்கு 13,579 நபர்களுக்கும், உயர் ரத்த அழுத்த நோய்க்கு 20,852 நபர்களுக்கும், நீரிழிவு மற்றும் உயர் ரத்த அழுத்த நோய் உள்ளவர்களுள் 9,359 நபர்களுக்கு மருந்துப் பெட்டகம் வழங்கப்பட்டது.
மேலும் 1,384 நபர்களுக்கு நோய் ஆதரவு சிகிச்சையும் 1,392 நபர்களுக்கு இயன்முறை சிகிச்சையும் வழங்கப்பட்டது. இதைத் தவிர்த்து 16 சிறுநீரக நோயாளிகளுக்கு சுய டயலிஸ் செய்துகொள்வதற்கு தேவையான பைகள் வழங்கப்பட்டுள்ளது.
இந்நிலையில், இத்திட்டத்தின் கீழ் இன்று (ஆக.11) காலை 10 மணி வரையில் 46,582 நபர்கள் பயனடைந்துள்ளதாகத் தெரிவிக்கப்பட்டுள்ளது.
இதையும் படிங்க: திமுக அரசின் பழிவாங்கும் நடவடிக்கை - ரெய்டு குறித்து எஸ்.பி. வேலுமணி கருத்து
