சென்னை: மத்திய அரசின் வேளாண் சட்டங்களுக்கு எதிர்ப்பு தெரிவித்து டெல்லியில் போராடிவரும் விவசாயிகளுக்கு ஆதரவாகவும், புதிய மின்சார திருத்தச் சட்டத்தைத் திரும்பப் பெற வலியுறுத்தியும், திமுக தலைமையில் தோழமைக் கட்சித் தலைவர்கள் இன்று (டிச. 18) ஒரு நாள் அடையாள உண்ணாவிரதத்தில் ஈடுபட்டுவருகின்றனர். காலை 9 மணிக்கு தொடங்கிய உண்ணாவிரதம் மாலை 5 மணிக்கு நிறைவுபெற உள்ளது.
இந்த உண்ணாவிரதப் போராட்டத்தில் பேசிய கம்யூனிஸ்ட் கட்சியைச் சேர்ந்த மதுரை நாடாளுமன்ற உறுப்பினர் சு.வெங்கடேசன், "மத்திய அரசின் இந்த சட்டங்கள் உழவர்களுக்கு எதிரானது. மாநில சுயாட்சிக்கும் எதிரானது. 130 கோடி இந்திய மக்களின் உணவு உரிமைக்கு எதிரான சட்டம்.
இந்த சட்டத்தின் மீது விவாதம் நடந்த பொழுது மானமுள்ள ஒரு அமைச்சர் மறுநிமிடமே ராஜினாமா செய்து வெளியேறினார். ஆனால், சிலர் இந்த நிமிடம் வரை சட்டத்திற்கு ஆதரவளிக்கின்றனர். இச்சட்டம் குறித்த மூன்று மணி நேர விவாதத்தில் இரண்டு மணி நேரம் ஆளும் பாஜக அரசும் அதன் கூட்டணி கட்சிகளும் ஆதரவு தெரிவிக்கவே ஒதுக்கினர். ஆனால், இந்த அரசை 20 மணிநேரம் பேச்சுவார்த்தையில் உட்கார வைத்த பெருமை இந்தியாவின் விவசாயிகளுக்கும் இந்தியாவின் ஜனநாயகத்தை பாதுகாக்கும் அரசியல் கட்சிகளுக்கும் சாரும்.
அதுமட்டுமின்றி, எங்கே போராட வேண்டும், என்ன பேசவேண்டும் என்பதையும் அதிகார திமிருடன் நடப்பவர்களுக்கு உணர்த்தியுள்ளனர். மேலும், 18 பக்கம் கொண்ட மூன்று சட்டங்களில் என்னவெல்லாம் திருத்தம் செய்யவுள்ளோம் என அனுப்பியக் கடிதம் 19 பக்கங்களைக் கொண்டுள்ளது.
பிரிட்டிஷ் ஆட்சியின் போது கூட டெல்லியின் டிசம்பர் மாத கடுங்குளிரில் வீடற்ற வழியில் 5 லட்சம் மக்கள் போராட்டத்தை நடத்தியது கிடையாது. அதைவிட ஒரு பேயாட்சி இன்று நடந்து கொண்டிருக்கிறது.
ஒரு வருடத்திற்கு 16 லட்சம் கோடி மதிப்பு கொண்ட இந்தியாவின் விவசாய சந்தையை, அதானிக்கும், அம்பானிக்கும் கொடுத்து பல லட்சம் கோடியை கொள்ளை அடிக்க துடித்துக் கொண்டிருக்கிறார்கள். இந்த துடிப்புக்கு எதிராக மக்களுடைய பேரெழுச்சி இந்த சட்டங்களை பின் வாங்க வைக்கும் .
விவசாயிகளின் உரிமையை ,எங்கள் மாநிலத்தின் உரிமையை ,130 கோடி மக்களின் உரிமையை ஒருபோதும் தாழவிட மாட்டோம் என்பதற்கு மீண்டும் தமிழ்நாடு இந்தியாவிற்கு வழிகாட்டும் வழிகாட்டும் என்பதை உறுதியளிக்கிறேன்" என்றார்.
இதையும் படிங்க: ‘3 வேளாண் சட்டங்களும் திரும்பப் பெறப்படும் வரையில் போராட்டம் தொடரும்’ - ஸ்டாலின்
