சென்னை: 'மக்களுக்கு சேவைகளை வழங்கும் அரசு அலுவலகங்கள் எல்லாம் மக்கள் எளிதில் அணுகி சேவைகளை பெறக்கூடிய ஒரு இடமாக இருக்க வேண்டும். தாமதங்களும் வீண் அலைக்கழிப்புகளும் கட்டாயம் தவிர்க்கப்பட வேண்டும்' என தமிழ்நாடு முதலமைச்சர் மு.க.ஸ்டாலின் தெரிவித்துள்ளார். சென்னை தலைமைச் செயலகத்தில் இன்று (ஜூலை 13) 'முதல்வரின் முகவரி துறை'யின் (Muthalvar Mugavari Thurai) செயல்பாடுகள் குறித்து ஆய்வு மேற்கொண்டு உரையாற்றினார்.
அரசின் சேவை கிடைப்பதை உறுதி செய்க: அப்போது பேசிய அவர், இந்த அரசு பல்வேறு நலத்திட்டங்களையும் பெரிய பல திட்டங்களையும் நீண்ட கால தொலைநோக்கோடு செயல்படுத்தி வந்தாலும், மக்களின் அன்றாட தேவைகளை அவர்களது கோரிக்கைகளை நாம் நிறைவேற்ற வேண்டியது மிகவும் முக்கியமானதாகும். அரசின் சேவைகள் குறிப்பிட்ட காலத்திற்குள் அவர்களுக்கு கிடைப்பதை உறுதி செய்ய வேண்டியது ஒவ்வொரு துறையின் பொறுப்பாகும் என்றார்.
பல்வேறு துறை அலுவலர்கள் மாவட்ட அளவிலும் மாநில அளவிலும் பெறப்படும் கோரிக்கைகளை முறையாக பரிசீலித்து உரிய தீர்வுகளைக் கண்டு பொதுமக்களுக்கு அதன் விவரத்தை தெரிவிக்காத காரணத்தினாலேயே தான் மக்கள் 'முதலமைச்சரின் முகவரி துறைக்கு' மனுக்களை அனுப்புகிறார்கள் எனத் தெரிவித்த முதலமைச்சர் மு.க.ஸ்டாலின் இதன் காரணமாகத்தான் இன்று குறிப்பாக, காவல்துறை மற்றும் வருவாய்த்துறை ஆகிய இரு துறைகளும் ஆய்வுக்கு எடுத்துக்கொள்ளப்பட்டுள்ளன என்று கூறினார்.
சான்றிதழ்களை ஆன்லைனில் வழங்குங்கள்: இந்த இரு துறைகளிலும் மனுக்கள் அதிக எண்ணிக்கையில் பெறப்படுகிறது. காரணம், மக்களுக்கு அதிக அளவில் இத்துறைகளின் சேவை தேவைப்படுகிறது. ஆனால், அவை அவர்களை முழுமையாக அடையவில்லை என்பதுதான் முக்கியக் காரணம். அரசின் சேவைகள் சான்றிதழ்கள் போன்றவை கூடுமானவரை தொழில்நுட்பத்தைப் பயன்படுத்தி ஆன்லைன் மூலமாக வழங்கப்படுவதை உறுதி செய்ய வேண்டும் என்று வருவாய்த்துறையை கேட்டுக்கொள்கிறேன் எனத் தெரிவித்தார்.
வீட்டுமனைப்பட்டா: தற்போது ஆன்லைன் முறை இருப்பதாக கூறப்பட்டாலும் நடைமுறையில் பார்க்கும்போது, அதில் பல சிக்கல்கள் உள்ளதாக அறிகிறேன். அதனைக் கண்டறிந்து சரிசெய்ய வேண்டும் எனக் குறிப்பிட்ட முதலமைச்சர், வீட்டுமனைப்பட்டா கோரி வரும் பெரும்பாலான மனுக்களில் இடைநிலை பதில்களே வழங்கப்படுகின்றன. மனுதாரரை உரிய முறையில் விசாரணை செய்து தகுதியிருப்பின் உரிய நடவடிக்கையை உடனே மேற்கொள்ள வேண்டும் என வலியுறுத்தினார்.
தனிப்பிரிவு மனுக்களுக்கு முன்னுரிமை: ஆதிதிராவிடர் மற்றும் பழங்குடியினர் நலத்துறை மற்றும் பிற்படுத்தப்பட்டோர் மிகவும் பிற்படுத்தப்பட்டோர் நலத்துறைகளில் நில எடுப்பு செய்யப்பட்ட நிலங்களில் தனிப்பிரிவு மனுக்களுக்கு முன்னுரிமை அளிக்க வேண்டும் எனவும்; பட்டா மேல்முறையீட்டு மனுக்கள் மீதான விசாரணையை சம்பந்தப்பட்ட மாவட்ட வருவாய் அலுவலர்/வருவாய் கோட்டாட்சியர்கள் விரைவான விசாரணைக்குட்படுத்தி தீர்வு வழங்குவதை உறுதி செய்யவேண்டும் எனவும் தெரிவித்தார்.
சான்றிதழ்கள் நிராகரிக்கப்படும் இனங்களில் உயர் அலுவலருக்கு மேல்முறையீடு செய்ய இ-சேவையில் உரிய வசதி ஏற்படுத்த வேண்டும் எனவும்; சிறப்பு பட்டா மாறுதல் முகாம்கள், சான்றிதழ் தொடர்பான முகாம்கள் நடத்த நடவடிக்கை மேற்கொள்ளவேண்டும் எனவும் அறிவுறுத்தினார்.
அரசு அலுவலகங்கள்; எளிதில் சேவை பெறும் இடங்களாக வேண்டும்: விரைவான தீர்வு மட்டுமல்லாமல் சரியான வகையில் தீர்வு செய்வதை உறுதிபடுத்த துறைத்தலைவர்கள், மாவட்ட ஆட்சியர் உள்ளிட்ட அதிகாரிகள் வாரந்தோறும் கட்டாயம் குறிப்பிட்ட எண்ணிக்கையிலான மனுதாரரிடம் தொடர்பு கொண்டு மனுவின் தீர்வு முறையை அறிந்து மதிப்பீடு செய்ய நடவடிக்கை எடுக்க வேண்டும் எனத் தெரிவித்த அவர்,
மக்களுக்குச் சேவைகளை வழங்கும் அரசு அலுவலகங்கள் எல்லாம் மக்கள் எளிதில் அணுகி சேவைகளை பெறக்கூடிய ஒரு இடமாக இருக்க வேண்டும் என்றார்.
வீண் அலைக்கழிப்பைத் தவிர்க்கவும்: தாமதங்களும் வீண் அலைக்கழிப்புகளும் கட்டாயம் தவிர்க்கப்பட வேண்டும். மக்களும் அவர்கள் அளிக்கும் மனுக்களும் அலுவலகங்களில் மதிக்கப்பட்டு மனுக்களுக்கு தீர்வு காணப்பட்டால் தான் அரசு தன் கடமையை, பணியை முறையாக ஆற்றுவதாக கருதப்படும் என அவர் தெரிவித்தார். காவல்துறையைப் பொறுத்தவரையில், பொதுவாக மனுக்களை ஆய்வு செய்ததில் பண மோசடி, குடும்பப் பிரச்னை, வாடகைதாரர் பிரச்னை மற்றும் நிலப் பிரச்னை போன்றவையே அதிகம் இடம்பெற்றுள்ளன எனக் குறிப்பிட்டார்.
முதலமைச்சரின் தனிப்பிரிவில் குவியும் புகார்கள்: மாவட்டங்களில் கூடுதல் காவல் கண்காணிப்பாளர்கள் (தலைமையிடம்) முதலமைச்சர் தனிப்பிரிவின் ஒருங்கிணைப்பாளராக நியமிக்கப்பட்டிருந்த போதிலும் மனுக்கள் விபரங்கள் அமைச்சு பணியாளர்கள்/பிரிவு காவலர்களால் கையாளப்படுவதாகவே தெரிகிறது. ஆகவே, இந்நிலை தவிர்க்கப்பட வேண்டும். உள்ளூர் காவல் நிலையங்களில் முறையான விசாரணை மேற்கொள்ளப்படாததாலேயே மக்கள் முதலமைச்சரின் தனிப்பிரிவை நாடி வருகின்றனர்.
பொதுமக்கள் உள்ளூர் காவல் நிலையங்களை அணுகும்போதே முறையாக மனு ரசீது கொடுக்கப்பட்டு, விசாரணையில் முகாந்திரம் இருப்பின் முதல் தகவல் அறிக்கை பதிவு செய்தும் முகாந்திரம் இல்லையெனில் அவ்விவரத்தை மனுதாரருக்கு தெரிவிக்கப்படுமேயானால், அவர்கள் உயர் அதிகாரிகளையும் முதலமைச்சரின் மனுக்கள் பிரிவையும் நாட வேண்டிய அவசியம் இருக்காது எனத் தெரிவித்தார். நீதிமன்றம் மூலம் மட்டுமே தீர்வு காண முடியும் என்ற பிரச்னைகளுக்கு தக்க எழுத்துப்பூர்வமான அறிவுரையுடன் நீதிமன்றத்தை அணுக அறிவுறுத்த வேண்டும் என்ற அவர் பொருளாதார குற்றங்களால் தான் மக்கள் அதிகமாக பாதிக்கப்படுவதை அறிகிறேன் என்றார்.
குற்றங்களை துப்பறியும் நுண்ணறிவுப் பிரிவு: மக்கள் முழுமையாக பாதிக்கப்பட்டதை உணர்ந்தபின் கொடுக்கப்படும் மனுக்களின் அடிப்படையில் தான் வழக்குப் பதிவு செய்யப்பட்டு நடவடிக்கை எடுக்கப்படுகிறது. மேலும், இதனைத் தவிர்க்கக் கூடுதல் காவல்துறை இயக்குநர் பொருளாதார குற்றப்பிரிவின் கீழ் நுண்ணறிவுப் பிரிவு ஒன்றைத் தொடங்கி, அதன் மூலம் ஒரு நிறுவனம் தொடங்கும் போதே முறையானது தானா என்பதை அறிந்து, தொடக்கத்திலேயே நடவடிக்கை எடுக்கப்பட வேண்டும் என அறிவுறுத்தினார்.
பொதுமக்களுக்கு விழிப்புணர்வு: மேலும், இதுபோன்ற நிறுவனங்களால் ஏமாற்றப்படுவதைத் தடுக்க மக்களுக்கு தொடர்ந்து தக்க விழிப்புணர்வு நிகழ்ச்சிகள் நடத்தப்பட வேண்டும். சில காவல் அதிகாரிகள் குறிப்பிட்ட இடைவெளியில் முதலமைச்சர் மனுக்கள் மேளா வைப்பதையும் கீழ்மட்ட விசாரணையில் திருப்தியில்லாதவர்கள் மனுக்கள் மாவட்ட/நகர காவல் அதிகாரிகளால் நேரடியாக விசாரணை செய்யப்பட்டு தீர்வு காண்பதை அறிகிறேன். இதே நடைமுறையை மற்ற அதிகாரிகளும் பின்பற்றி நடைமுறைபடுத்த வேண்டும்.
அரசின் மீதான நம்பிக்கையை உறுதிப்படுத்துங்கள்: அதிக மனுக்களை முடிவு செய்வது அல்ல நம் நோக்கம். நியாயமான தீர்வுகளும் மக்கள் திருப்தியுமே இவ்வரசின் குறிக்கோள். இறுதியாக உதவி ஆய்வாளர் மற்றும் ஆய்வாளர் மட்டத்தில் செய்யப்படும் முறையான நியாயமான விசாரணை மட்டுமே மக்களுக்கு அரசின் மீதான நம்பிக்கையை உறுதிப்படுத்தும் என்பதை மனதில் கொண்டு காவல் துறை உயர் அதிகாரிகள் தொடர் ஆய்வுகளை மேற்கொண்டு சார்பு நிலை அலுவலர்களுக்கு தக்க அறிவுரை வழங்கவும் கேட்டுக்கொள்கிறேன் எனத் தெரிவித்தார்.
முதல்வரின் முகவரி துறையின் மனுக்களுக்கு விரைந்து தீர்வு: எனவே, தலைமைச் செயலாளர் மற்றும் காவல் துறை தலைவர் தங்களது மாதாந்திர ஆய்வுக் கூட்டங்களில் முதல்வரின் முகவரி துறை மனுக்கள் முறையாகவும் விரைவாகவும் தீர்வு காணப்படுகிறதா? என்பதை ஆய்வு செய்ய வேண்டும் என்று கேட்டுக்கொள்கிறேன் என்ற அவர், அது மட்டுமல்ல அனைத்து அரசு துறைச் செயலர்களும், துறைத் தலைவர்களும், மாவட்ட ஆட்சியர்களும் தங்கள் துறை மற்றும் மாவட்டங்களில் பெறப்படும் மனுக்களை கவனமாக ஆய்வு செய்து முறையாக தீர்வு செய்யப்படுவதை உறுதி செய்ய வேண்டும் எனத் தெரிவித்தார்.
சிறப்பாக பணியாற்றுபவர்களுக்கு நன்றி: இப்பணியில் சிறப்பாக பணியாற்றிய அரசு செயலர்கள், துறை தலைவர்கள், மாவட்ட அளவில், வட்ட அளவில் பணியாற்றிய அனைத்து அலுவர்களுக்கும் என் பாராட்டினை தெரிவித்துக் கொள்கிறேன் என்றார்.
இப்பணியில் சற்று பின்தங்கியுள்ள சில துறைகளும் மாவட்டங்களும் தங்கள் பணியினை முடுக்கிவிட்டு மக்கள் தேவையினை விரைந்து பூர்த்தி செய்வார்கள் என நம்புகிறேன். அதனை தலைமைச் செயலாளர் அவர்களும், காவல் துறை இயக்குநர் அவர்களும் உறுதி செய்ய வேண்டும் என அறிவுறுத்தினார்.
இதையும் படிங்க: Liquor Prohibition:மதுவிலக்கு குறித்த பொது வாக்கெடுப்புக்கு அரசு தயாரா? - ராமதாஸ் கேள்வி
