சென்னை அரும்பாக்கத்தைச் சேர்ந்த சுதர்சன் (22) , பொறியாளராகப் பணியாற்றி வருகிறார். இவர், கடந்த சில தினங்களுக்கு முன்பு சமூக வலைதளமான ஹலோ செயலியில், தமிழ்நாடு முதலமைச்சர் எடப்பாடி பழனிச்சாமி குறித்தும், துணை முதலமைச்சர் ஓ. பன்னீர் செல்வம் குறித்தும், அவதூறாக பதிவிட்டதோடு மட்டுமின்றி அமைச்சர் தங்கமணியையும் கரோனா வைரசுடன் ஒப்பிட்டு வீடியோ, புகைப்படங்களைப் பதிவிட்டிருந்தார்.
இதேபோன்று அமைச்சர் எஸ்.பி.வேலுமணி குறித்தும், அவதூறாக சித்தரித்தும், கேலி செய்தும் வீடியோ, புகைப்படங்களைப் பதிவிட்டிருந்தார். இதுதொடர்பாக, கோவை அதிமுக தகவல் தொழில்நுட்பப் பிரிவு மாவட்ட துணைச் செயலாளர் ரியோஷ்கா, சரவணம்பட்டி காவல் நிலையத்தில் புகார் அளித்தார்.
இப்புகாரின் பேரில், சுதர்சனை கைது செய்த காவல் துறையினர் தொடர்ந்து அவரிடம் விசாரணை நடத்தினர். விசாரணையில், "தனது திமுக நண்பர் ஒருவர் அதிமுக குறித்து சமூக வலைதளங்களில் பதிவிடுமாறு கேட்டுக்கொண்டதால், ஹலோ செயலில் இவ்வாறு பதிவிட்டேன்" என்று காவல்துறையினரிடம் தெரிவித்துள்ளார்.
இதைத் தொடர்ந்து, அவர் மீது மூன்று பிரிவுகளின் கீழ் வழக்குப்பதிவு செய்து நீதிமன்றத்தில் ஆஜர்படுத்தி, கோவை மத்திய சிறையில் அடைத்தனர். மேலும், இந்த வழக்கில் தொடர்புடைய சுதர்சனின் நண்பரான திமுக பிரமுகரை கைது செய்யும் முயற்சியில் காவல்துறையினர் தீவிரமாக ஈடுபட்டுள்ளனர்.
இதையும் படிங்க: இந்திய வனவிலங்கு சரணாலயங்களில் உஷார்!
