சென்னை: காவிரி வைகை குண்டாறு இணைப்பு தொடர்பான திட்ட பணிகளை விரைவுப் படுத்த வேண்டும் என்று அவசர பொது முக்கியத்துவம் வாய்ந்த நிகழ்வு குறித்து, எதிர்க்கட்சித் தலைவர் எடப்பாடி பழனிசாமி, முன்னாள் அமைச்சர்கள் விஜயபாஸ்கர், கே.பி. முனுசாமி உள்ளிட்டோர் சிறப்பு கவன ஈர்ப்பு தீர்மானத்தை பேரவையில் கொண்டு வந்தனர். இதுகுறித்து விஜயபாஸ்கர் பேசும்போது, இந்த திட்டத்தை விரைவுப்படுத்த வேண்டும் எனக் கேட்டுக்கொண்டார்.
இதற்கு பதிலளித்த நீர்வளத்துறை அமைச்சர் துரைமுருகன், முன்னாள் அமைச்சர் விஜயபாஸ்கர் இந்த திட்டத்தை எதிர்க்கட்சி தலைவர் எடப்பாடி பழனிசாமி மட்டுமே கொண்டு வந்தது போலவும், வேறு யாரும் இந்த திட்டத்திற்காக முயற்சிக்கவில்லை என்றும் சொல்லுகிறார். காவேரி குண்டாறு இணைப்பு திட்டத்தை 165 கோடி ரூபாய் மதிப்பீட்டில் மறைந்த முன்னாள் முதலமைச்சர் கருணாநிதி தான் கொண்டு வந்தார்.
இந்த திட்டத்திற்கு 9.5.2008 அன்று ரூ. 254 கோடி ஒதுக்கப்பட்டது. காவேரி குண்டாறு இணைப்பு திட்டத்திற்காக கால்வாய் வெட்டுவதற்கும் நிலம் எடுப்பதற்கும் நிதி ஒதுக்கப்பட்டது. அதிமுக ஆட்சியில் 2020 ஆம் ஆண்டு 600 கோடி ரூபாய் ஒதுக்கப்பட்டது. ஆனால், 34. 31 கோடி மதிப்பீட்டில் நிலம் எடுக்கப்பட்டு 71. 6 ஏக்கர் நிலம் மட்டுமே கையகப்படுத்தப்பட்டது. மீதி பணம் திரும்ப ஒப்படைக்கப்பட்டது.
ஆனால், திமுக ஆட்சியில் 2021-22, 22-23 ஆண்டுகளில் ரூ.312 கோடி ஒதுக்கப்பட்டு 698. 97 ஏக்கர் நிலம் கையகப்படுத்தப்பட்டு மீதி பணம் நீர்வளத் துறையே டெபாசிட்டாக வைத்துக்கொண்டுள்ளது. 2023 -24 ஆம் ஆண்டு நில எடுப்பு பணிக்காக ரூ. 554.7 கோடி ஒதுக்கப்பட்டுள்ளது.
கால்வாய் வெட்டும் பணிக்காக 2020- 21 ஆம் ஆண்டில் அதிமுக அரசு எந்த பணியையும் செய்யவில்லை. 2021 - 22 ஆம் ஆண்டு ரூ.177.9 கோடியில் கால்வாய் வெட்டும்பணி நடைபெற்றுள்ளது. 64 சதவீத பணிகள் முடிக்கப்பட்டுள்ளது. 2023- 24 ஆம் ஆண்டில் ரூ.111.5 கோடி செலவில் கால்வாய் வெட்டும் பணி வேகமாக நடைபெற்று வருகிறது. இந்த ஆட்சியிலேயே காவிரி குண்டாறு இணைப்பு திட்டம் செயல்படுத்தப்படும் என தெரிவித்தார்.
இதையும் படிங்க: தமிழகத்தில் புதிதாக 8 மாவட்டங்கள் குறித்து பரிசீலனை - வருவாய்த்துறை அமைச்சர் தகவல்
