சென்னை: 2023-ஆம் ஆண்டில் தமிழ்நாட்டு பல்வேறு சாதனைகளை படைத்திருந்தாலும், ஒட்டுமொத்த தமிழ்நாட்டையே திரும்பி பார்க்க வைத்தது சாதிய வன்கொடுமைகள். அமைதிப்பூங்கா என்று புகழப்பட்ட தமிழ்நாட்டில் தொடர்சியாக நடந்தேறிய சாதிய வன்கொடுமைகளால், அஞ்சாதோர் யாருமிலர்.
திருவண்ணாமலை மாவட்டம் தண்டராம்பட்டு அடுத்த தென்முடியனூர் கிராமத்தில் பழமையான முத்துமாரியம்மன் கோயிலில் 70 ஆண்டுகளுக்குப் பின் சுவாமி தரிசனம் செய்ய பட்டியலின மக்கள் அனுமதிக்கபட்டனர். அதைத்தொடர்ந்து, இந்தாண்டு வாச்சாத்தி வழக்கில் சென்னை உயர் நீதிமன்றம் செப்டம்பர் 29ஆம் தேதி அன்று வழங்கிய தீர்ப்பு பரவலான வரவேற்பைப் பெற்றது. இப்படி, ஒரு பக்கம் பட்டியலின மக்களுக்கான நியாயங்கள் கிடைத்தாலும் தமிழ்நாட்டில் பல இடங்களில் இன்னும் சாதிய வன்கொடுமைகள் தலைதூக்கி வருவது வேதனைக்குரிய ஒன்றே.
இந்தாண்டு தொடக்கச் சம்பவமாக தென் மாவட்டங்களின் ஒன்றான தூத்துக்குடி மாவட்டத்தில் உள்ள நடுவக்குறிச்சி என்னும் கிராமத்தில் ஆரம்பித்தது. இந்த கிராமத்தில் உயிரிழந்த 72 வயது மதிக்கத்தக்க பட்டியலின சமூகத்தைச் சேர்ந்தவரின் உடல் பொது பாதையில் எடுத்துச் செல்ல அந்த கிராமத்தில் உள்ள மற்றொரு சமூகத்தினர் மறுப்பு தெரிவித்து வெடித்த சம்பவம் இந்தாண்டின் துவக்க சம்பவமாக அமைந்தது.
குறிப்பாக படித்து முன்னேற்றம் காண வேண்டிய மாணவர்களின் கண்களில் சாதிய வன்கொடுமை நிரம்பியிருப்பது கூடுதல் வேதனையை அளிக்கிறது. குழந்தைகளை திருத்திவிடலாம் என்று மனதை அமைதிப்படுத்தினால், இவ்வழக்கங்களை கற்றுக்கொடுக்கும் பெற்றோரின் செயல் எத்தகையானது..? அப்படி ஏற்றுக்கொள்ள முடியா சம்பவமாக நடந்தது தான் வேங்கைவயல் சம்பவம்.
கடந்த 2022ஆம் ஆண்டு இறுதியில் வேங்கைவயல் பகுதியில் குடிக்கும் தண்ணீரில் மனிதக்கழிவை கலந்த சம்பவம் தமிழ்நாடு முழுவதும் அதிர்வலைகளை உண்டாக்கியது. நீதிபதி சத்திய நாராயணன் தலைமையில் தனி நபர் ஆணையம் அமைத்து விசாரணை தீவிரப்படுத்தப்பட்டு வந்த நிலையிலும் இதற்கு யார் காரணம் என்பது இன்று வரை மறைவாகவே இருந்து வருகிறது.
இதன் காயம் ஆறும் முன்னே திருநெல்வேலியில் தலைதூக்கியது சிறார்களின் வெறிச்செயல். திருநெல்வேலி நாங்குநேரியில் பள்ளியில் படிக்கும் மாணவரை சகமாணவர்களே கொலை செய்ய முயற்சித்து, சாதிய வன்கொடுமையின் பிடியில் சிக்கினர் பள்ளி சிறார்கள். தாக்கப்பட்ட மாணவர் மருத்துவமனையில் அனுமதிக்கப்பட்டு அரசின் பார்வையில் சிகிச்சைப் பெற்றுவந்தார். குற்றத்தில் ஈடுபட்ட சிறார்களின் எண்ணத்தில் மாற்றம் கொள்ள சீர்திருத்தப்பள்ளியின் உதவியை நாடியது தமிழ்நாடு அரசு.
இதைத்தொடர்ந்து, அடுத்த சம்பவமாக அதே மாவட்டத்தில் மூர்த்தீஸ்வரத்தைச் சேர்ந்த பட்டியலின சமூகத்தைச் சேர்ந்த இரு இளைஞர்கள் தாமிரபரணியில் குளிக்கச் சென்ற போது மாற்று சமூகத்து இளைஞர்கள் சிலரால் நிர்வாணமாக்கப்பட்டு, சிறுநீர் கழித்து தாக்கப்பட்டனர். இந்தச் சம்பவம் மாநிலம் முழுவதும் அதிர்வலையை ஏற்படுத்தியது.
கல்வி, உணவில் தலைதூக்கிய சாதியப் பாகுபாடு: போதுமப்பா என்று யோசித்து அமர்வதற்குள் கரூரில் அரங்கேறியது அடுத்தொரு சம்பவம். கரூர் மாவட்டம் வேலன்செட்டியூர் கிராமத்தில் உள்ள பள்ளிக்கூடத்தில் காலை உணவை பட்டியலின சமூகத்தைச் சேர்ந்த பெண் ஒருவர் சமைத்த காரணத்தால் குழந்தைகள் உண்ண அவரது பெற்றோர் மறுப்பு தெரிவித்தது இன்றளவும் வடுவாக நெஞ்சில் நிற்கின்றது.
இதைத்தொடர்ந்து மாவட்ட ஆட்சியர் சம்பவம் நடைபெற்ற பள்ளிக்கு நேரடியாகச் சென்று அங்கு பெற்றோர்கள் உடன் பேச்சுவார்த்தை நடத்திய போது, "பட்டியலின பெண் சமைப்பதை எங்களின் குழந்தைகள் சாப்பிட முடியாது" என்று திட்டவட்டமாகக் கூறினார்கள். இதேப்போல் கோவில்பட்டி அருகே முதலமைச்சரின் காலை உணவு திட்டத்தில் பட்டியலின பெண் சமைத்த உணவை மாணவர்கள் புறக்கணித்துள்ளனர். விசாரணையில் இதற்கு பெற்றோர்களின் உந்துதலேக் காரணம் என்றும் கூறப்படுகிறது.
இதையடுத்து, கரூர் உப்பிடமங்கலம் அரசு பள்ளியில் பட்டியலின மாணவர், பேருந்தில் பள்ளிக்குச் சென்று வீடு திரும்பும்போது, மற்றொரு சமூகத்தைச் சேர்ந்த மாணவர் ஒருவர் பட்டியலின மாணவரின் சாதி பெயரைச் சொல்லி திட்டியுள்ளார். இதை அந்த மாணவர் அவரது பாட்டியிடம் கூறியிருக்கிறார். மாணவரின் பாட்டியோ அந்த 12ஆம் வகுப்பு மாணவரை பேருந்து நிறுத்தத்தில் வைத்து கேட்டிருக்கிறார். இதனால், ஆத்திரமடைந்த அந்த மாணவர் அவரது ஊரில் இருந்து ஆட்களை அழைத்துச் சென்று, 10ஆம் வகுப்பு மாணவர் மற்றும் அவரது பாட்டியையும் கடுமையாக தாக்கியுள்ளனர்.
சட்டம் கூறுவது என்ன?: மேலும், கிருஷ்ணகிரி மாவட்டம் சோக்கடி கோயில் கட்டுமானப் பணியின் போது, ஏற்பட்ட தகராறில் இருதரப்பினரும் கற்களை வீசி தாக்கிக் கொண்டதாக கூறப்படுகிறது. இந்த விவகாரத்தில் பட்டியலின பெண் ஒருவரின் வீட்டின் முன்பாக தீவைக்கப்பட்டதாக குற்றம்சாட்டப்படுகிறது.
இது குறித்து தமிழ்நாடு மாநில அரசு ஆதிதிராவிடர் மற்றும் பழங்குடியினர் ஆணையத்தின் உறுப்பினர் கோ.ரகுபதி ஈடிவி பாரத் தமிழ் செய்தியாளர் சாய் வெங்கடேஷ் இடம் கூறுகையில்,
"தலித் மக்கள் மீதான வன்கொடுமைகள் தினமும் நடந்துக் கொண்டு தான் இருக்கிறது. இதை கூறுவதானலும், இல்லை செய்தியாக பதிவு செய்வதன் மூலமாகவும் நிறுத்த முடியாத ஒன்றாக இருந்து வருகிறது. உதரணமாக தினமும் நிறைய விபத்துகள் நடக்கிறது. அது செய்தியாய் போடுவதனால் அல்லது தொலைக்காட்சியில் வருவதனாலும் விபத்து நடக்கமால் இருக்கிறதா என்று கேட்டால் இல்லை. ஆனால் சாதிய வன்கொடுமை என்பது சாதிய சமூக கட்டமைப்புகளால் தொடந்து வன்முறைகள் நடைபெற்று வருகின்றன.
இந்த கட்டமைப்பு இருக்கும் வரை தீண்டாமைகள் கோரத்தாண்டவம் சாதிய வன்கொடுமையின் பிடியில் தான் இருக்கும். பட்டியலின மக்களை பாதுக்காக்கவும், அவர்களின் மீது நடைபெறும் வன்முறைகளை தடுக்கவும், பி.ஓ.ஏ. (SC/ST Prevention of Atrocities Act - 1989) சட்டம் என ஒன்று இருக்கிறது. ஆனால் இந்தச் சட்டத்தால் 1% சதவீதம் கூட வன்முறையைத் தடுக்க முடியவில்லை.
அம்பேத்கர் கூறும் வகையில், ஒரு சட்டம் இருந்தாலும் அந்த சட்டமானது சமூக்கத்தால் ஏற்றுக் கொள்ள வேண்டும். மேலும் அரசாங்கத்தால் மட்டுமே இந்த சாதிய வன்கொடுமைகளை தடுக்க முடியாது. அதில் மக்களின் பங்களிப்பு முதன்மை வாய்ந்தாக இருக்க வேண்டும். மக்கள் அந்த சட்டத்திற்கு பயந்து மதிக்க வேண்டும். ஆனால் பி.ஓ.ஏ. சட்டத்தை யாரும் ஏற்றுகொள்ளாமல், அது வெறும் காகிதமாக பார்ப்பதன் விளைவாக தான் வன்முறைகள் தொடர்ந்து நடைபெற காரணமாக இருந்து வருகிறது" எனத் தெரிவித்தார்.
இப்படி இந்த வருடத்தில் தொடர்ச்சியாக சாதிய வன்கொடுமைகள் தலைவிரித்து ஆடியுள்ளது. இப்படியான கொடுமைகள் தலைதூக்கினாலும்,
பிறப்பொக்கும் எல்லா உயிர்க்கும் சிறப்பொவ்வா
செய்தொழில் வேற்றுமை யான்
என்ற ஐய்யன் திருவள்ளுவரின் வார்த்தைகளுக்கு இணங்க பிறப்பினால் அனைவரும் சமம், செய்யும் தொழிலில் மற்றும் காட்டுகின்ற திறமையில் மட்டுமே வேறுபாடு காண வேண்டும் என்பதை வலியுறுத்தி வன்கொடுமைகளை மறத்துப்போகச்செய்யும் அளவிற்கு அரசாலும், சமூக சீர்திருத்தவாதிகளாலும், சமூக நலனில் அக்கறை கொண்டவர்களாலும் இதனை தடுத்து நிறுத்துவதற்கான நடவடிக்கைகளும் எடுக்கப்பட்டும் போதிக்கப்பட்டும் வருகின்றது.
இதையும் படிங்க: வேங்கைவயல் விவகாரம்..! ஓராண்டாகியும் நியாயம் கிடைக்கவில்லை என மக்கள் வேதனை..!
