நீதிமன்றம் சம்மன் அனுப்பினால் கூட லீனா மணிமேகலை ஆஜராகமாட்டார்; சுசி கணேசன் தரப்பு குற்றச்சாட்டு

இயக்குநர் லீனாமணிமேகலை மீது பல வழக்குகள் நிலுவையில் இருப்பதால், சென்னை உயர் நீதிமன்றம் சம்மன் அனுப்பினால்கூட நேரில் ஆஜராகமாட்டார் என இயக்குநர் சுசி கணேசன் தரப்பில் குற்றம்சாட்டியுள்ளார்.

சென்னை: நடிகைகள், பாடகிகள் என சினிமா பிரபலங்கள் தங்கள் மீதான பாலியல் தொந்தரவுகள் குறித்து கடந்த 2018ஆம் ஆண்டு ‘‘மீ டூ’’ ஹேஷ்டேக் மூலம் ட்விட்டரில் பதிவு செய்தனர். அப்போது, பிரபல இயக்குநர் சுசிகணேசனுக்கு எதிராக இயக்குநர் லீனா மணிமேகலையும் ’மீ டூ' குற்றச்சாட்டு சுமத்தியிருந்தார். அதுதொடர்பாக லீனா மணிமேகலைக்கு எதிராக பொய்யான குற்றஞ்சாட்டு எனக்கூறி, சென்னை சைதாப்பேட்டை நீதிமன்றத்தில் சுசி கணேசன் அவதூறு வழக்கு தொடர்ந்திருந்தார்.

இந்நிலையில் அந்த அவதூறு வழக்கு விசாரணை நடைமுறையில் தவறு நடக்கிறது என்றும் குற்றம்சாட்டி, விசாரணை நடத்தி வரும் மாஜிஸ்ட்ரேட் வழக்கை முறையாக விசாரிக்கவில்லை. எனவே, வழக்கை வேறு மாஜிஸ்ட்ரேட்க்கு மாற்றி உத்தரவிடக்கோரி லீனா மணிமேகலை மனுதாக்கல் செய்திருந்தார். இந்தப் புகாருக்கு எந்த ஆதாரமும் இல்லை என்று கூறி சென்னை முதன்மை அமர்வு நீதிமன்றம் வழக்கை தள்ளுபடி செய்தது.

இந்த உத்தரவை எதிர்த்து லீனா மணிமேகலை உயர் நீதிமன்றத்தில் மேல்முறையீடு செய்திருந்தார். இந்த வழக்கு நீதிபதி சதீஷ்குமார் முன்பு விசாரணைக்கு வந்தபோது, இயக்குநர் சுசிகணேசன் தரப்பில், மூன்று ஆண்டுகளுக்கும் மேலாக வழக்கு விசாரணையை லீனா மணிமேகலை இழுத்தடித்து வருவதாகவும், விசாரணைக்கு முழு ஒத்துழைப்பு வழங்கவில்லை எனவும் தெரிவிக்கப்பட்டது.

ஏற்கெனவே இந்த வழக்கில் உச்ச நீதிமன்றம் நான்கு மாதத்திற்குள் வழக்கை முடிக்க வேண்டும் என்று விதித்த காலக்கெடு ஜூன் மாதத்துடன் முடிந்துவிட்டதாகவும் சுட்டிக்காட்டப்பட்டது. மேலும் லீனா மணிமேகலைக்கு எதிராக, புகைப்பிடிப்பது போன்ற ’காளி’ பட போஸ்டர் சர்ச்சை தொடர்பாக டெல்லி, உத்தரப்பிரதேசம் உள்ளிட்ட மாநிலங்களில் வழக்குப்பதிவு செய்யப்பட்டுள்ளதாகவும் அவர், இந்தியா பாதுகாப்பு இல்லாத நாடு என்றும் இந்திய சட்டத்தின் மீது நம்பிக்கை இல்லை எனவும் கூறியுள்ளதாக சுசி கணேசன் சார்பில் சுட்டிக்காட்டினர்.

ஏற்கெனவே, லீனா மணிமேகலைக்கு எதிராக நீதிமன்ற அவமதிப்பு வழக்கு சென்னை உயர் நீதிமன்றத்தில் நிலுவையில் உள்ளது என்று குறிப்பிட்டனர். மேலும் இந்த நீதிமன்றம் சம்மன் அனுப்பினால்கூட ஆஜராக மாட்டார் என்றும் தெரிவித்தனர்.

லீனா மணிமேகலை தரப்பில் அவதூறு வழக்கை விரைந்து முடிக்க ஒத்துழைப்பதாக பிரமாணப்பத்திரம் தாக்கல் செய்யப்பட்டது. இருதரப்பு வாதங்களையும் கேட்ட நீதிபதி, உத்தரவு ஏதும் பிறப்பிக்காமல் வழக்கமான நடைமுறையில் வழக்கு விசாரணைக்கு வரட்டும் என்று கூறி நான்கு வாரத்துக்கு ஒத்தி வைத்தார்.

இதையும் படிங்க: சுசி கணேசன் குறித்து கவிஞர் லீனா மணிமேகலை தொடர்ந்து கருத்துக்கள் வெளியிட்டு வருவது ஏன்? சென்னை உயர் நீதிமன்றம்