முன்னாள் மத்திய அமைச்சர் ப.சிதம்பரத்தின் மகனும், சிவகங்கை மக்களவை உறுப்பினருமான கார்த்தி சிதம்பரம், கடந்த 2015ஆம் ஆண்டு முட்டுக்காடு பகுதியில் உள்ள தங்களுக்குச் சொந்தமான சொத்துக்களை விற்பனை செய்ததன் மூலம் கிடைத்த ஏழு கோடியே 37 லட்சம் ரூபாய் வருமானத்தை மறைத்ததாகக் கூறி கார்த்தி சிதம்பரம், அவரது மனைவி ஸ்ரீநிதி ஆகியோருக்கு எதிராக வருமான வரித்துறை கடந்த 2018ஆம் ஆண்டு வழக்கு தொடர்ந்தது.
இந்த வழக்கில் இருந்து தங்களை விடுவிக்கக் கோரி கார்த்தி சிதம்பரமும், அவரது மனைவி ஸ்ரீநிதியும் தாக்கல் செய்த மனுக்களை சென்னை எம்.பி., எம்.எல்.ஏ-க்களுக்கு எதிரான வழக்குகளை விசாரிக்கும் சிறப்பு நீதிமன்றம் தள்ளுபடி செய்து உத்தரவிட்டது.
இந்த உத்தரவை எதிர்த்து கார்த்தி சிதம்பரமும், ஸ்ரீநிதியும் தாக்கல் செய்த மனுக்கள், இன்று (நவ. 6) நீதிபதி சதீஷ்குமார் முன் விசாரணைக்கு வந்தபோது, கார்த்தி சிதம்பரம் சார்பில் ஆஜரான மூத்த வழக்கறிஞர் கபில் சிபல், வருமான வரித்துறை நடைமுறைகள் எதையும் முறையாக பின்பற்றவில்லை.
கடந்த 2015-2016ஆம் ஆண்டுக்கான வருமான வரி கணக்கில் சொத்து விற்பனை மூலம் கிடைத்த வருமானத்தை கணக்கில் காட்டவில்லை என்று குற்றம் சாட்டும் வருமான வரித் துறை, அந்த ஆண்டுக்கான வருமான வரிக் கணக்கு தொடர்பாக எந்த உத்தரவும் பிறப்பிக்காமல் நிலுவையில் வைத்துள்ளதாக குறிப்பிட்டார். மேலும், கணக்கு தாக்கலில் ஏதேனும் தவறுகள் இருந்தால், சம்மந்தப்பட்ட அலுவலர் தான் வழக்கு தொடர முடியும் என்பதால், வருமான வரித்துறை துணை இயக்குநர் தாக்கல் செய்த வழக்கை தள்ளுபடி செய்ய வேண்டும் எனவும் வாதிட்டார்.
இதை பதிவு செய்த நீதிபதி சதீஷ்குமார், வருமான வருத்துறை தரப்பு விசாரணைக்காக வழக்கை நவம்பர் 10ஆம் தேதிக்கு தள்ளிவைத்தார்.
இதையும் படிங்க...தேர்வர்கள் ஆதார் எண் பதிவேற்றம் செய்ய வேண்டும் - அரசுப் பணியாளர் தேர்வாணையம் அறிவுரை!
