சென்னை கொளத்தூர் பூம்புகார் நகரைச் சேர்ந்தவர் சூரியகலா. இவர் கரோகி பாடகியாக உள்ளார். இவர் நேற்றிரவு (ஜூலை 29) தனது பணிமுடித்து, இருசக்கர வாகனத்தில் தனது வீட்டிற்கு திரும்பிக்கொண்டிருந்தார்.
அப்போது, அயனாவரம் அருகே வந்துகொண்டிருந்தபோது, ஆட்டோவில் வந்த அடையாளம் தெரியாத நான்கு பேர் சூரியகலா கழுத்தில் அணிந்திருந்த செயினை பறிக்க முயன்றனர். இதில் நிலைதடுமாறி சூரியகலா கீழே விழுந்தார். பின் அவரது கைப்பையை பறித்துக் கொண்டு அந்த கும்பல் தப்பிச்சென்றது. கீழே விழுந்ததில் சூரியகலாவிற்கு தலையில் காயம் ஏற்பட்டது.
இரவு ரோந்துபணியில் ஈடுபட்டிருந்த அயனாவரம் காவல் ஆய்வாளர் சூரியகலாவை மீட்டு சிகிச்சைக்காக அருகில் இருந்த தனியார் மருத்துவமனையில் அனுமதித்தனர். கைப்பையில் பணம், செல்ஃபோன், ஒரு மடிக்கணினி இருந்ததாக காவல்துறையினரிடம் சூரியகலா தெரிவித்துள்ளார். இதனையடுத்து, ஐசிஎப் காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.
