தினகரன், சசிகலாவை இணைத்து திமுகவுடன் ஓபிஎஸ் கூட்டணி வைத்துக்கொள்ளலாம் - ஜெயக்குமார்

ஓபிஎஸ், திமுகவின் பி டீம் போல செயல்படுகிறார் எனவும்; அவர் தினகரன், சசிகலாவை இணைத்து திமுகவுடன் கூட்டணி வைத்துக்கொள்ளலாம் என முன்னாள் அமைச்சர் ஜெயக்குமார் தெரிவித்துள்ளார்.

சென்னை: ராயப்பேட்டை அதிமுக தலைமை அலுவலகத்தில் நடைபெற்ற மாவட்டச் செயலாளர்கள் கூட்டத்திற்கு பின்னர் முன்னாள் அமைச்சர் ஜெயக்குமார் செய்தியாளர்களைச் சந்தித்தார். அப்போது பேசிய ஜெயக்குமார், "சட்டத்தை கையில் எடுத்துக்கொண்டு எதிர்க்கட்சி போல் செயல்படுகிறது, திமுக. தேர்தல் காலத்தில் மக்களுக்கு அளித்த வாக்குறுதிகளை திமுக அரசு நிறைவேற்றவில்லை.

அதிமுக செய்த திட்டங்களையும், திமுக அரசின் மக்கள் விரோதப் போக்கினையும் எடுத்துச் சொல்ல இருக்கிறோம். நாடாளுமன்றத் தேர்தலுக்கு கிளைக் கழகம், தலைமைக் கழக நிர்வாகிகளின் செயல்பாடு குறித்து எடப்பாடி பழனிசாமி பேசினார்.

உட்கட்சியில் பிரச்னை இல்லை. ஓபிஎஸ் பற்றியோ, சசிகலா பற்றியோ, டிடிவி தினகரன் பற்றியோ பேசவில்லை. 20 மாத ஆட்சியில் திமுக குடும்பத்துக்கு தான் விடியல் ஏற்பட்டிருக்கிறது.

ஆதி திராவிடர்களுக்கான மத்திய அரசு நிதி 920 கோடியை அரசு செலவு செய்யாமல் திருப்பி அனுப்பியுள்ளது. எம்.ஜி.ஆர் வகுத்த விதிப்படி பொதுக்குழு நடத்தப்பட்டுள்ளது. ஓபிஎஸ் எப்படி கட்சி நடத்த முடியும். அதனால் கட்சி கொடி, லெட்டர்பேட் போன்றவற்றை பயன்படுத்தக்கூடாது என நோட்டீஸ் கொடுத்துள்ளோம். அவருடைய நோட்டீஸ் எடுபடாது.

ஆண்டிகள் கூட்டிய மடம், ஓபிஎஸ் அணி. சபாநாயகர் சட்டமன்ற விதிமுறைகளை பின்பற்ற வேண்டும். சட்டமன்ற மாண்புகளை காலில் மிதித்து விட்டு திமுக அரசு செயல்படுகிறது. ஜனநாயக கருப்பு வரலாற்றை சட்டமன்றம் கடைப்பிடிக்கிறது.

ஆதி திராவிட மக்களை வஞ்சிக்கும் செயலில் அரசு செயல்படுகிறது. மீனவர்களின் வாழ்வாதாரம் போய்விட்டது. கரும்பு விவசாயிகளுக்கு விலை இல்லை. அதிமுகவில் ஒற்றுமையாக இருக்கிறோம். திமுகவின் பி டீம் தான் ஓபிஎஸ். தினகரன், சசிகலாவை இணைத்து திமுகவுடன் ஓபிஎஸ் கூட்டணி வைத்து கொள்ளலாம்.

சி.வி. சண்முகம் பாஜகவுடன் கூட்டணி வைக்கக்கூடாது என பேசவில்லை. தேர்தல் தொடர்பான பணிகள் குறித்துதான் பேசப்பட்டது. தகவல் தொடர்பு விரிவாக்கம் குறித்துப் பேசினோம். இன்று உணர்வுப்பூர்வமான கூட்டம் நடைபெற்றது" எனக் கூறினார்.