சென்னை: மாணவர்களின் எதிர்காலத்தை நிர்ணயிப்பது பள்ளி பொதுத்தேர்வு தான். பத்தாம் வகுப்பு பொதுத் தேர்வில் எடுக்கும் மதிப்பெண்கள் அடிப்படையில் தான்11-ஆம் வகுப்பில் பாடப்பிரிவுகள் ஒதுக்கீடு செய்யப்படுகின்றன. பொறியியல், சட்டம், மீன்வளம் சார்ந்த பட்டப் படிப்புகள், வேளாண்துறை சார்ந்த பட்டப் படிப்புகள் என்று பல வகையான உயர்கல்விக்கு, 12-ஆம் வகுப்பு பொதுத் தேர்வில் எடுக்கும் மதிப்பெண்கள் கணக்கில் எடுத்துக் கொள்ளப்படுகின்றன. இளங்கலை மருத்துவப் படிப்பு சேர்க்கைக்கு மட்டுமே நீட் தேர்வு மதிப்பெண் மூலம் நடத்தப்படுகிறது.
இதனால், 12-ம் வகுப்பு பொது தேர்வுகளில் அதிக மதிப்பெண்கள் பெற வேண்டியது முக்கியமானதாக இருக்கிறது.
தமிழகத்தில் ஒவ்வொரு ஆண்டும் தோராயமாக 8 லட்சம் மாணவர்கள் 12-ஆம் வகுப்பு பொது தேர்வு எழுதும் நிலையில், கடந்த சில ஆண்டுகளாக மாற்றுத்திறனாளி மாணவர்கள் எண்ணிக்கை மட்டும் அதிகரித்துக் கொண்டே வருகிறது. தமிழ்நாட்டில் குழந்தைகளுக்கு ஏற்படும் மாற்றுத் திறனை தடுப்பதற்கு பல்வேறு நடவடிக்கை எடுக்கப்பட்டு வருகிறது என மருத்துவத்துறை கூறி வருகிறது.
ஆனால், பொதுத் தேர்வு எழுதும் மாற்றுத்திறனாளி மாணவர்களின் எண்ணிக்கை ஒவ்வொரு ஆண்டும் அதிகரிப்பது அதிர்ச்சியை ஏற்படுத்தி வருகிறது. இதற்கான காரணங்களை கல்வித்துறை அதிகாரிகள் கூறும்போது, கற்றலில் குறைபாடு உள்ள மாணவர்கள் என்றால், அவர்களுக்கு தேர்வில் ஒரு மணி நேரம் கூடுதலாக சலுகை வழங்கப்படுகிறது. மத்திய அரசு உத்தரவின்படி 16 வகையான உடல்நல குறைபாடுகளுக்கு பலவகையான சலுகைகளை அரசுத் தேர்வுத்துறை அளிக்கிறது.
பார்வையற்ற மாணவர்களாக இருந்தால், கூடுதலாக ஒரு மணி நேரம் மற்றும் மாணவர்களின் விடைகளை எழுதுவதற்கு தனியாக ஒரு ஆசிரியர் நியமனம் செய்யப்படுகிறது. மேலும், சம்பந்தப்பட்ட பாடத்தேர்வின்போது, அந்த பாட ஆசிரியர்களே நியமனம் செய்யலாம் என்ற சலுகை அளிக்கப்படுகிறது.
காது கேட்காத பேச முடியாத மாணவர்கள் என்றால், மொழிப் பாடத்தில் இருந்து விலக்குடன், ஒரு மணி நேரம் கூடுதலாக தேர்வு எழுத அனுமதி வழங்கப்படுகிறது. விபத்தில் கை கால் முறிவுகள் ஏற்பட்டால், அந்த மாணவர்களுக்காக அவர்கள் சொல்வதை எழுதும் வகையில், விடைகளை எழுத பாட ஆசிரியர் ஒருவர் நியமனம் செய்வதோடு, கூடுதலாக ஒரு மணி நேரம் வழங்கப்படுகிறது. மேலும், மனநல குறைபாடுகள் என்றால் மொழிபாட தேர்வில் இருந்து விலக்கும், கூடுதலாக ஒரு மணி நேரம் மற்றும் விடைகளை எழுதுவதற்கு பாட ஆசிரியர் நியமிக்கப்படுகிறார். இதுபோன்று பல வகையான சலுகைகள் அளிக்கப்படுகின்றன.
இதில் மனநல குறைபாடு, கற்றலில் குறைபாடு, கைகளால் எழுத முடியாத அளவிற்கு பாதிப்பு போன்ற பிரிவுகளின் கீழ் முறைகேடுகள் அதிக அளவில் நடக்கின்றன என கல்வித்துறையில் இருந்து ஓய்வு பெற்ற அதிகாரிகள் கூறுகின்றனர். உடலில் 40 விழுக்காடு அளவிற்கு ஊனம் இருந்தால் அவர்களுக்கு தமிழ்நாடு அரசு மாற்றுத்திறனாளி என்று சான்றிதழ் வழங்குகிறது. மாணவர்களை பொறுத்த அளவில் அந்தந்த மாவட்டத்தில் இருக்கக்கூடிய அரசு மருத்துவர்கள் அடங்கிய குழுவினர் சான்றுகளை அளிக்கின்றனர். ஆனால், கடைசி நேரத்தில் , தேர்வு நெருக்கத்தின்போது அந்தந்த மாவட்ட முதன்மை கல்வி அலுவலர்களே நேரடியாக மாற்றுத்திறனாளி என்று குறிப்பிட்டு மாணவர்களுக்கு சான்றுகளை அளிக்கலாம் என தேர்வுத்துறை தெரிவித்திருக்கிறது. இதனை பயன்படுத்தியும் பல முறைகேடுகள் நடப்பதாக கூறப்படுகிறது.
2022-ஆம் ஆண்டு மட்டும், 3095 மாற்றுத்திறனாளிகள் 12-ஆம் வகுப்பு பொதுத் தேர்வு எழுதியதில், 91.24 சதவீதம் மாணவர்கள் தேர்ச்சி பெற்றிருக்கின்றனர். இவர்கள் அனைவரும் அதிகமான மதிப்பெண்களை பெற்றிருப்பதாகவும் கூறப்படுகிறது. இதே போன்று, கடந்த ஆண்டு பத்தாம் வகுப்பு பொதுத் தேர்வில் 7,470 மாற்றுத்திறனாளி மாணவர்கள் தேர்வுக்கு பதிவு செய்த நிலையில் , 6016 மாணவர்கள் தேர்வு எழுதி இருக்கின்றனர். இவர்களில், 5424 மாணவர்கள் தேர்ச்சி பெற்றிருக்கின்றனர். தேர்ச்சி சதவீதம் 91.06 என உள்ளது. இதுவே, இந்த ஆண்டு 12-ஆம் வகுப்பு தேர்வில் மாற்றுத்திறனாளி மாணவர்கள் எண்ணிக்கை 5206 என்றும், பத்தாம் வகுப்பு தேர்வில் 13,151 எனவும் அதிகளவில் உயர்ந்து இருக்கிறது.
மாணவர்கள் சொல்ல சொல்ல விடைகளை அந்த பாட ஆசிரியர், எழுதுபவர் என்ற நிலையில் அதிக அளவிலான முறைகேடுகள் நடக்கின்றன. ஆசிரியர்களே முழுமையாக விடைகளை எழுதி முடித்து விடுகின்றனர் என்பதும் குற்றச்சாட்டாக இருக்கிறது. அதுமட்டுமல்லாமல், நன்றாக இருக்கக் கூடிய மாணவர்களுக்கும் மாற்றுத்திறனாளி சான்றிதழ் அளித்து இதுபோன்ற தேர்வை எழுத வைப்பதாகவும், இதில் தனியார் பள்ளிகள் அதிகளவில் ஈடுபடுகின்றன என்ற தகவல்களையும் கல்வித்துறை வட்டாரங்கள் தெரிவிக்கின்றன.
இந்த ஆண்டு திருப்பூர், கோயம்புத்தூர், ஈரோடு போன்ற மாவட்டங்களில் அதிக அளவில் மாற்றுத்திறனாளி மாணவர்கள் தேர்வை எழுதுவதாக தகவல்கள் வெளியாகி உள்ளன. ஆனால், இது குறித்த விவரங்களை தெரிவிப்பதற்கு தேர்வுத்துறை மறுத்துவிட்டது. மாற்றுத்திறனாளி மாணவர்கள் பெறக்கூடிய மதிப்பெண்கள் என்ன? உண்மையிலேயே தகுதியான மாணவர்களுக்கு மாற்றுத்திறனாளி சான்றிதழ் அளிக்கப்படுகிறதா? என்பது குறித்து அரசுத் தேர்வு துறை மற்றும் கல்வித்துறை நேரடியாக ஆய்வு செய்ய வேண்டும் என்று கோரிக்கை எழுந்திருக்கிறது.
மாற்றுத்திறனாளி மாணவர்களின் மதிப்பெண் சான்றிதழ்களில் கடந்த காலங்களில் மாற்றுத்திறனாளி மாணவர் என்ற வாசகம் அச்சடிக்கப்பட்டது. ஆனால், பள்ளிக்கல்வித்துறை முதன்மை செயலாளராக உதயச்சந்திரன் இருந்தபோது, இந்த வாசகம் அகற்றப்பட்டுவிட்டது.
சலுகைகளை அனுபவிப்பதற்கு மாற்றுத்திறனாளி மாணவர் என்ற சான்றுகள் மட்டும் பெற்றால் போதும். ஆனால், மாணவருடைய எந்த வகையான சான்றிதழ்களிலும் அவர் மாற்றுத்திறனாளி மாணவர் என்ற வாசகம் இடம்பெறாது என்பதால், தைரியமாக இந்த முறைகேடுகளில் பலரும் ஈடுபடுகின்றனர் என்பது கல்வித்துறை அதிகாரிகளின் குற்றச்சாட்டாக இருக்கிறது.
இதையும் படிங்க: தென்காசியிலிருந்து கேரளாவிற்கு கனிம வளக் கடத்தல் - கண்காணிக்க சிறப்பு தனிப்படை அமைப்பு!
