"தமிழ்நாட்டில் சட்டவிரோத கருக்கலைப்பு குறைந்துள்ளது" - அமைச்சர் மா.சுப்பிரமணியன்!

மக்கள் தொகை பெருக்கத்தை கட்டுப்படுத்துவது தொடர்பாக விழிப்புணர்வு ஏற்படுத்தப்பட்டு வருவதாகவும், இது தொடர்பாக 4,000 பேருந்துகளில் விழிப்புணர்வு வாசகங்களை ஒட்டும் பணி தொடங்கப்பட்டுள்ளதாகவும் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்தார். தமிழ்நாட்டில் சட்டவிரோத கருக்கலைப்பு குறைந்துள்ளது என்றும் தெரிவித்தார்.

சென்னை: உலக மக்கள் தொகை தினத்தையொட்டி இன்று(ஜூலை 11) சென்னை ஓமந்தூரார் அரசு பன்னோக்கு உயர் சிறப்பு மருத்துவமனையில் விழிப்புணர்வு நிகழ்ச்சிகள் நடைபெற்றன. அதன் ஒரு பகுதியாக மக்கள் தொகை பெருக்கத்தை கட்டுப்படுத்த வேண்டியதன் அவசியத்தை வலியுறுத்தும் வகையில் விழிப்புணர்வு பேரணி நடத்தப்பட்டது. மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தலைமையில் நடைபெற்ற இந்த பேரணியில், சுமார் 500 செவிலிய மாணவர்கள் கலந்து கொண்டனர்.

பின்னர் அரசு பேருந்துகளில் விழிப்புணர்வு ஸ்டிக்கர் ஒட்டும் நிகழ்வை அமைச்சர் மா. சுப்பிரமணியன் தொடங்கி வைத்தார். இந்த நிகழ்வில் மருத்துவம் மற்றும் மக்கள் நல்வாழ்வுத்துறை முதன்மைச் செயலாளர் ககன்தீப் சிங் பேடி, மருத்துவ கல்வி இயக்குனர் சாந்தி மலர், பொது சுகாதாரத்துறை இயக்குனர் செல்வ விநாயகம் உள்ளிட்டோர் கலந்து கொண்டனர்.

இந்த நிகழ்ச்சியைத் தொடர்ந்து செய்தியாளர்களிடம் பேசிய அமைச்சர் மா.சுப்பிரமணியன், "37வது உலக மக்கள் தொகை தினத்தையொட்டி இன்று விழிப்புணர்வு ஏற்படுத்தும் நிகழ்வுகள் நடைபெறுகிறது. தமிழ்நாடு முழுவதும் 4,000 பேருந்துகளில் 14 வகையான வாசகங்களை ஒட்டும் பணி தொடங்கப்பட்டது. இன்று முதல் அவை பேருந்துகளில் இடம்பெறும். முன்னர் தமிழ்நாட்டில் 41 சதவீதம் பேர் மட்டுமே பேருந்துகளை பயன்படுத்தினர். மகளிர் இலவச பயணம் அறிவிக்கப்பட்ட பின்னர் 60 சதவீதம் பெண்கள் பேருந்துகளில் பயணிக்கின்றனர். இதனால்தான் மகளிர் அதிகம் பயணிக்கும் பேருந்துகளில் விழிப்புணர்வு வாசகங்களை ஒட்டியுள்ளோம். துண்டு பிரசுரங்களிலும் பல்வேறு விழிப்புணர்வு வாசகங்கள் வெளியிடப்பட்டன.

இந்திய மக்கள் தொகை 142 கோடி என்கின்றனர். பாரதியார் ஒரு பாடலில் 30 கோடி முகமுடையார் என்று பாடியிருப்பார். 100 ஆண்டுகளுக்கு முன்னால் 30 கோடி, தற்பொழுது 142 கோடி. ஆண்டுக்கு ஒரு கோடி அளவிற்கு மக்கள் தொகை உயர்ந்து வருகிறது. பிறக்கின்ற எல்லோரும் சிறப்பாக வாழவேண்டும். அதற்காகத்தான் இது போன்ற விழிப்புணர்வு நிகழ்ச்சி நடைபெறுகிறது. இந்தியாவில் முதன்முறையாக கருவுற்ற ஒரு சில மாதங்களிலேயே கருவின் நிலையை முறையாக ஆய்வு செய்து குறை இருப்பினும், அதனை என்ன செய்யலாம் என்பதை பெற்றோர் முடிவெடுக்கும் வகையில் ஆய்வகம் தொடங்கி வைக்கப்பட்டுள்ளது. தமிழ்நாட்டின் பிறப்பு விகிதம் 13.8 சதவீதமாக உள்ளது. மருத்துவக் கட்டமைப்பில் தமிழ்நாடு முதலிடத்தில் உள்ளது" என்றார்.

சட்டவிரோத கருக்கலைப்பு குறித்த செய்தியாளர்களின் கேள்விக்கு பதிலளித்த அமைச்சர், "கருக்கலைப்பு தொடர்பான ஆய்வகங்கள் தொடர்ந்து கண்காணிக்கப்படுகிறது. சட்ட விரோத கருக்கலைப்பு, பிறக்கவிருக்கும் குழந்தை ஆணா? பெண்ணா? என்ற பாலினம் குறித்து தெரிவிக்கக் கூடாது என்பது குறித்த விழிப்புணர்வு வாசகங்கள் ஆய்வகங்களில் வைக்கப்பட்டு உள்ளன. முறையான அனுமதியில்லாத கருக்கலைப்பு ஆய்வகங்களுக்கு சீல் வைக்கப்படுகிறது. சட்டவிரோத கருக்கலைப்பு குறைந்துள்ளது" என்று கூறினார்.