சென்னை: அனைத்து மாவட்ட துணை சுகாதார இயக்குநர்கள், நகர் நல அலுவலர்கள் மற்றும் உணவுப் பாதுகாப்புத்துறை அலுவலர்களுடனான ஆய்வுக் கூட்டம் பொது சுகாதார இயக்குநரகத்தில் மருத்துவம் மற்றும் மக்கள் நல்வாழ்வுத்துறை அமைச்சர் மா. சுப்பிரமணியன் தலைமையில் நடைபெற்றது.
ஆய்விற்குப் பின்னர் செய்தியாளர்களிடம் பேசிய மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன், ''சட்டப்பேரவையில் அறிவிக்கப்பட்ட 106 அறிவிப்புகளை செயல்படுத்துவது குறித்து ஆலோசனை நடத்தப்பட்டது. தமிழ்நாட்டில் 2,286 ஆரம்ப சுகாதார நிலையங்கள் மற்றும் நகர்ப்புற சுகாதார நிலையங்கள் இருக்கின்றன.
8,713 துணை சுகாதார நிலையங்கள் இருக்கின்றன. 1500க்கும் மேற்பட்ட கட்டடங்கள் வாடகைக்கும், ஆயிரத்திற்கும் மேற்பட்ட கட்டடங்கள் பழமை அடைந்து பயனற்ற வகையில் இருந்து கொண்டிருக்கிறது. இந்த கட்டடங்களை சீரமைப்பதற்கு நிதிபெற்று கட்டப்பட்டு திறந்து வைக்கப்படுகிறது.
மாவட்ட சுகாதாரத்துறை அலுவலர்கள் தன்னார்வலர்களின் பங்களிப்புடன் ''நமக்கு நாமே'' என்ற திட்டம் செயல்படுத்தப்பட்டு வருகிறது. அதன் மூலம் துணை சுகாதார நிலையம், ஆரம்ப சுகாதார நிலையங்களுக்கு கட்டடம் கட்ட வேண்டும். ''மக்களைத் தேடி மருத்துவம் திட்டம்'' தொழிற்சாலைகளுக்கும் விரிவுப்படுத்தப்படுவதற்கு நடவடிக்கை எடுக்கப்பட்டுள்ளது. நாய்க்கடி, பாம்புக்கடி மருந்துகள் ஆரம்ப சுகாதார நிலையங்களில் கிடைக்கவும் நடவடிக்கை எடுக்கப்பட்டு, இருப்பதையும் உறுதிப்படுத்தப்பட்டுள்ளது.
இந்தாண்டு மாரடைப்பைத் தடுக்கும் பொருட்டு ஆரம்ப சுகாதார நிலையங்கள், துணை சுகாதார நிலையங்களிலும் இருப்பதற்கு அறிவுறுத்தப்பட்டுள்ளன. மாரடைப்பு போன்ற சிறிய அறிகுறி தென்பட்டவுடன் தருவதற்கும் அறிவுறுத்தப்பட்டுள்ளது. ஆரம்ப சுகாதார நிலையங்களில் சிசிடிவி கேமரா பொருத்த நடவடிக்கை எடுக்கப்பட வேண்டும் என அறிவுறுத்தப்பட்டுள்ளது.
ஆரம்ப சுகாதார நிலையத்தில் மாரடைப்பு மருந்து கடந்த ஆண்டு ஆரம்ப சுகாதார நிலையங்களில் ASV என்று சொல்லப்படும் பாம்புக்கடி மருந்தும், ARV என்று சொல்லப்படும் நாய்க்கடி மருந்தும் கையிருப்பு உறுதிப் படுத்தப்பட்டுள்ளது. தமிழ்நாடு முழுவதிலும் பாம்புக்கடி மருந்து தேவைக்காக நகரத்திற்கு வரும் தேவை ஏற்படாத விதம் அனைத்து ஆரம்ப சுகாதார நிலையங்களிலும் மருந்து தரப்படுகிறது.
இந்த ஆண்டு மாரடைப்பினால் ஏற்படும் உயிர் இழப்புகளைத் தடுக்கும் பொருட்டு இதய பாதுகாப்பு மருந்துகள் (Emergency Loading Dose) அனைத்து ஆரம்ப சுகாதார நிலையங்களிலும், அனைத்து துணை சுகாதார நிலையங்களிலும் இம்மருந்து தரப்படவிருக்கிறது. மேலும் அனைத்து துணை சுகாதார நிலையங்களிலும் மருந்து இருப்பினை உறுதிப்படுத்திட அனைத்து மாவட்ட நல அலுவலர்கள், அனைத்து துணை சுகாதார நிலையங்களிலும் இம்மருந்து இருக்கிறதா என்று உறுதி செய்யப்படுகிறது.
2,286 ஆரம்ப சுகாதார நிலையங்கள் மற்றும் நகர்ப்புற சுகாதார நிலையங்களில் சிசிடிவி கேமராக்கள் பொருத்த ரூ.10.17 கோடி இந்த ஆண்டிற்கான நிதிநிலை அறிக்கையில் ஒதுக்கீடு செய்யப்பட்டிருக்கிறது. இதன்மூலம் அம்மருத்துவமனைகளில் மருத்துவ சேவையைப் பாதுகாப்பாக செய்வதற்குரிய நடவடிக்கைகள் எடுக்கப்படுகிறது. அதில் பணியாற்றும் பணியாளர்கள், அவர்களுடைய பணிநேரம், பணியிருப்பு போன்றவைகளை கண்காணிப்பதற்கும் மேற்கொள்ளவிருக்கிறது.
நடப்பது நலமே, நடப்போம் நலம் பெறுவோம் என்கின்ற வகையிலும் Health Walks Streets அறிவிக்கப்பட்டிருக்கிறது. ஒவ்வொரு மாவட்டத் தலைநகரிலும் 8 கிலோ மீட்டர் நீளத்திற்கான சாலைகளை தேர்ந்தெடுத்து அந்த சாலைகளை சமன்படுத்தி இருபுறமும் மரங்களை நட்டு, மக்கள் தினந்தோறும் நடைப் பயிற்சியினை மேற்கொள்வதற்கு ஏதுவாக தயார் செய்ய வேண்டும் என்றும் அந்த சாலைகளை இவர்கள் தேர்வு செய்ய வேண்டும் என்றும் அறிவுறுத்தப்பட்டிருக்கிறது.
சாலைகளை இவர்கள் தேர்வு செய்தபிறகு அதற்குத் தேவையான பல்வேறு விஷயங்களை செய்து தருவார்கள். அந்த மாதத்தின் முதல் ஞாயிற்றுக்கிழமை அந்த Health Walks Street நடப்பவர்களுக்கு சர்க்கரை நோய்களுக்கான இரத்த மாதிரிகளை எடுத்து சர்க்கரை அளவுகளைக் கண்டறிவது, ரத்த அழுத்தம் கண்டறிவது போன்ற பல்வேறு பயிற்சிகளை செய்வார்கள். அதற்காக இன்று அந்த சாலைகளைக் கண்டறிவதற்கும், நடவடிக்கை எடுக்க அறிவுறுத்தப்பட்டிருக்கிறது.
உணவுப் பாதுகாப்புத் துறையைப் பொருத்தவரை தொடர்ச்சியாக தமிழ்நாடு மாநில அளவிலும், மாவட்ட அளவிலும் கடந்த இரண்டு ஆண்டுகளாக நிறைய விருதுகளைப் பெற்று வருகிறது. கோடைக் காலமாக இருக்கின்ற சூழ்நிலையில் பழங்களை வியாபாரிகள் ரசாயனப் பவுடர்கள் போன்ற பல்வேறு தேவையற்ற மாதிரிகள் மூலம் பழங்களைப் பழுக்க வைப்பதற்குரிய பணியினை செய்கின்றனர்.
மாம்பழங்கள், வாழைப் பழங்கள், தர்பூசணி போன்ற பழங்களைப் பழுக்க வைப்பதற்கு ரசாயன கலவைகளைப் பயன்படுத்துகிறார்கள். அதை கண்டறிந்து நடவடிக்கை எடுக்க வேண்டும் என்று அறிவுறுத்தப்பட்டுள்ளது. அதே போல் குடிநீர் மாதிரிகள் எடுத்து தரம் உள்ள வகையில் குடிநீர் தயாரிக்கப்படுகிறதா, தரமான குடிநீர் பாட்டிலில் அடைத்து விற்கிறார்களா என்பதை கண்காணிக்க அறிவுறுத்தியிருக்கிறோம்.
குட்கா, பான்பராக் போன்ற போதை வஸ்துக்களுக்கு தமிழ்நாட்டில் இருக்கிறது. எனவே, மாவட்ட அலுவலர்கள் தங்களுடைய மாவட்டத்தில் அனைத்து கடைகளையும் ஆய்வு செய்து இத்தகைய போதை வஸ்துக்கள் விற்பனை செய்யாமல் இருக்க சட்டப்பூர்வ நடவடிக்கை எடுக்க வேண்டும் என்று அறிவுறுத்தியிருக்கிறோம்.
தமிழ்நாட்டைப் பொருத்தவரை இதுவரை 6 செவிலியர் பயிற்சி கல்லூரிகள் இருக்கின்றன. 25 இடங்களில் செவிலியர் பயிற்சிப் பள்ளி இருக்கிறது. தமிழ்நாடு முதலமைச்சர் அறிவுறுத்தலைப் பெற்று, நானும் துறையின் செயலாளரும் இரண்டு மாதங்களுக்கு முன்னர் டெல்லிக்கு சென்று ஒன்றிய சுகாதாரத்துறை அமைச்சர் மன்சுக் மாண்டியாவிடம் 30 செவிலியர் பயிற்சிக் கல்லூரிகள் தமிழ்நாட்டிற்கு வேண்டும் என்ற கோரிக்கையினை வைத்திருந்தோம்.
ஒன்றிய அமைச்சர்களுடனான கூட்டத்தில் தமிழ்நாட்டிற்கு 100 பயிற்சி இடங்களுடன் 11 புதிய செவிலியர் பயிற்சி கல்லூரிகள் தொடங்க அனுமதி வழங்கப்பட்டிருக்கிறது. தமிழ்நாடு அரசின் நிதி ஆதாரத்தைப் பெற்று 11 புதிய செவிலியர்கள் பயிற்சி கல்லூரிகள் கட்டுவதற்கான இடங்கள் தேர்வு செய்யப்பட்டு கட்டுமானப் பணிகள் தொடங்கப்படும்'' எனத் தெரிவித்தார்.
இதையும் படிங்க: Fronius Skill Development Centre: ஆண்டுக்கு 500 இளைஞர்களுக்கு இலவச வெல்டிங் பயிற்சி!
