ராணுவத்தில் கர்னலாக இருந்து ஓய்வு பெற்றவர் குமார் (72). இவர் தாம்பரத்தில் தனியார் செக்யூரிட்டி நிறுவனத்தை நடத்திவருகிறார். இவருக்கு செந்தில் குமார் என்ற நபர் அறிமுகமாகி திருப்பதி தேவஸ்தானத்தில் காவலாளி பணிக்கு 450 ஆள்கள் தேவைப்படுவதாகவும், அந்த வேலைக்கான ஒப்பந்தத்தை தங்களுடைய நிறுவனத்திற்கு வாங்கித் தருவதாக கூறியுள்ளார்.
இதையடுத்து திருப்பதி தேவஸ்தான முக்கிய தலைவர்களிடம் நெருக்கமாக உள்ள ரமேஷ் நாயுடு என்பவரை அறிமுகப்படுத்தி உள்ளார். பின்னர் இருவரும் இந்த ஒப்பந்தத்தை வாங்கிதருவதாகக் கூறி வித்யா ராணி என்பவரிடம் அழைத்துச் சென்று அறிமுகப்படுத்தி உள்ளனர்.
வித்யா ராணி திருப்பதி தேவஸ்தான போர்டு உறுப்பினராக இருப்பதாகவும், குமார் நடத்தும் செக்யூரிட்டி நிறுவனத்திற்கு ஒப்பந்தத்தை பெற்று தருவதாகவும், அதற்கு வைப்பு தொகையாக பணம் செலுத்த வேண்டும் என கூறியுள்ளார்.
இதனையடுத்து குமார் ஆன்லைன் மூலம் முதலில் பணத்தை பரிமாற்றம் செய்துள்ளார். பின்னர் 50 லட்சம் ரூபாய் பணத்தை ரொக்கமாக தர வேண்டும் என கூறியதையடுத்து, ஓப்பந்த பத்திரத்தில் எழுதி வாங்கிக்கொண்டு 50 லட்சம் ரூபாய் பணத்தை கொடுத்துள்ளார்.
இதனையடுத்து தாம்பரத்தில் உள்ள இவருடைய நிறுவனத்திற்கு தேவஸ்தான போர்டில் இருந்து ஆடிட்டர்கள் வருவதைபோல வந்து ஆவணங்களை எல்லாம் சரிபார்த்து நாடமாடி உள்ளனர். தேவஸ்தான போர்டு லஞ்ச ஒழிப்புத் துறை அலுவலர்கள் எனக் கூறி இருவர் அலுவலகத்தில் விசாரணை நடத்திச் சென்றுள்ளனர்.
ஆனால் பணம் வழங்கி எட்டு மாதங்கள் ஆகியும் உறுதி அளித்தபடி ஒப்பந்தப் பணியை பணம் வாங்கியவர்கள் வாங்கித் தரவில்லை.
இதனால் சந்தேகம் அடைந்த கர்னல் குமார், இதுகுறித்து திருப்பதி தேவஸ்தான போர்டில் விசாரணை நடத்தி உள்ளார். இதன் பின்னர் இது போன்ற செக்யூரிட்டி வேலைக்கு திருப்பதி கோயிலில் எந்த ஆட்களையும் வேலைக்கு எடுக்கவில்லை என தெரியவந்ததுள்ளது.
இதையடுத்து செந்தில் குமார், ரமேஷ் நாயுடு இவர்களை தொடர்புகொண்டு கேட்டதற்கு பணத்தை தராமல் மிரட்டல் விடுத்துள்ளனர். இதைத்தொடர்ந்து இவர்கள் திருப்பதி தேவஸ்தான போர்டில் ஒப்பந்தப் பணிகள் வாங்கி தருவதாகக் கூறி பலரிடம் மோசடி செய்து உள்ளது தெரியவந்துள்ளது.
இதுகுறித்து குமார் சென்னை மத்திய குற்றப் பிரிவு காவல்துறையினரிடம் புகார் அளித்துள்ளார். இந்த மோசடி கும்பல் குறித்து காவல்துறையினர் வழக்குப்பதிவு செய்து விசாரணையை தொடங்கி உள்ளனர்.
இதையும் படிங்க... 500 கோடி எம்.எல்.எம் மோசடி: கணவனைக் கொன்று நாடகமாடிய மனைவி கைது!
