சென்னை: சென்னையைச் சேர்ந்த தனியார் தொலைக்காட்சி நிறுவனத்தின் பெயரில் போலி மின்னஞ்சல் அனுப்பியதாகத் தொடுத்த வழக்கில், சென்னை மத்தியக் குற்றப்பிரிவு சைபர் கிரைம் காவல் துறையினர் மாரிதாஸைக் கைதுசெய்து சிறையில் அடைத்துள்ளனர்.
ஒரு நாள் காவல் துறை காவலில் மாரிதாஸை சைபர் கிரைம் காவல் துறையினர் விசாரணை நடத்தி உள்ளனர்.
பிணை கோரிய மாரிதாஸ்
இந்நிலையில், மாரிதாஸ் பிணை கோரி எழும்பூர் பெருநகரத் தலைமை குற்றவியல் நீதிமன்றத்தில் மனு தாக்கல்செய்துள்ளார். அந்த மனு மீதான விசாரணை இன்று நடந்தது. அப்போது சைபர் கிரைம் காவல் துறையினர், ஒரு குறிப்பிட்ட குழுவினரைத் தூண்டும் வகையில், மாரிதாஸ் காணொலி பதிவிட்டு வெளியிட்டதாக வாதத்தை முன்வைத்தனர்.
மேலும், பொய்யான ஆதாரங்களைக் காட்டிக் குறிப்பிட்ட குழுவினரைத் தூண்டும் வகையில் பேசியதால், 2,500-க்கும் மேற்பட்டோர், தனியார் தொலைக்காட்சிக்குக் கடிதம் அனுப்பியுள்ளது விசாரணையில் தெரியவந்துள்ளதாக சைபர் கிரைம் காவல் துறைத் தரப்பில் தெரிவிக்கப்பட்டுள்ளது.
இந்தக் காணொலி வெளியான பிறகு, மூன்று லட்ச ரூபாய்க்கும் மேலான பணம் மாரிதாஸ் சம்பாதித்து இருப்பதாகக் காவல் துறை தரப்பில் வாதத்தை முன்வைத்துள்ளனர்.
தொடர்ந்து இதுபோன்று காணொலி பதிவிட்டுச் செயல்படும் மாரிதாஸுக்குப் பிணை வழங்கக் கூடாது எனக் காவல் துறையினர் எதிர்ப்புத் தெரிவித்துள்ளனர்.
மாரிதாஸுக்கு எதிராக மனு
மாரிதாஸ் பிணையில் வெளி வந்தால் ஆதாரங்களை அழிக்க நேரிடும் என நீதிமன்றத்தில் காவல் துறை தெரிவித்துள்ளது. இதைத்தொடர்ந்து மாரிதாஸுக்குப் பிணை வழங்கக் கூடாது என இரண்டு பேர் இடையீட்டு மனு தாக்கல்செய்தனர்.
அனைத்துத் தரப்பு வாதங்களையும் ஆவணங்களையும் ஆய்வுசெய்து, 3 மணிக்குப் பிறகு பிணை மனு மீதான உத்தரவு பிறப்பிக்கப்படும் என எழும்பூர் தலைமை பெருநகரக் குற்றவியல் நீதிமன்ற நீதிபதி கோதண்டராஜ் ஒத்திவைத்தார்.
இதையடுத்து விசாரணைக்கு வந்த பிறகு இருதரப்பு வாதங்களையும் கேட்ட நீதிபதி, மாரிதாஸுக்கு நிபந்தனைப் பிணை வழங்கி உத்தரவிட்டார். பின் மாரிதாஸை சென்னை மத்தியக் குற்றப்பிரிவு சைபர் கிரைம் காவல் துறை முன் ஆஜராகி கையெழுத்திட வேண்டும் என உத்தரவிடப்பட்டுள்ளது.
இதையும் படிங்க:Sexual harassment: பள்ளி மாணவிக்கு பாலியல் தொல்லை - கார் ஓட்டுநருக்கு ஆயுள் தண்டனை
