தமிழ்நாட்டில் உள்ள 109 அரசு கலை மற்றும் அறிவியல் கல்லூரிகளில் மாணவர் சேர்க்கைக்கான விண்ணப்பங்கள் இந்த ஆண்டு இணையதளம் மூலம் பெறப்பட்டன.
அரசு கலை அறிவியல் கல்லூரியில் சேர்வதற்கு மூன்று லட்சத்து 16 ஆயிரத்து 795 மாணவர்கள் விண்ணப்பம் செய்தனர். அவர்களில் இரண்டு லட்சத்து 18 ஆயிரத்து 810 மாணவர்கள் கட்டணம் செலுத்தியுள்ளனர்.
மேலும் ஒரு லட்சத்து 35 ஆயிரத்து 832 மாணவர்கள் சான்றிதழ்களைப் பதிவேற்றம் செய்துள்ளனர். மாணவர்கள் விண்ணப்பித்துள்ள கல்லூரிகளில் அவர்களுக்கான தரவரிசைப் பட்டியல் நேற்று (ஆக. 26) வெளியிடப்பட்டுள்ளது. மேலும் அவர்களுக்கு ஒதுக்கப்பட்ட இடங்கள் குறித்த விவரமும் மாணவர்களுக்குத் தெரிவிக்கப்பட்டுள்ளது.
அனைத்துக் கல்லூரி முதல்வர்களுக்கும் கல்லூரி கல்வி இயக்குநர் அனுப்பியுள்ள கடிதத்தில், "2020-21ஆம் கல்வி ஆண்டிற்கான மாணவர் சேர்க்கையை துரிதப்படுத்த வேண்டும்.
மாணவர்களுக்கான தரவரிசைப் பட்டியல், தேர்வுப் பட்டியலை கல்லூரிகள் வெளியிட்டு மாணவர் சேர்க்கையை உறுதிப்படுத்த வேண்டும். முதலாமாண்டு மாணவர்களுக்கு ஆகஸ்ட் 31ஆம் தேதி முதல் பாடங்களைக் கற்பிக்கும்வகையில் ஆன்லைன் வகுப்புகளைத் தொடங்க வேண்டும்.
மேலும் 2019-20ஆம் கல்வியாண்டில் பெறப்பட்ட கல்வி கட்டணத்தையே, நடப்பு 2020-21ஆம் கல்வியாண்டிலும் மாணவர்களிடமிருந்து பெற வேண்டும்" எனத் தெரிவித்துள்ளார்.
