அதிமுக இணை ஒருங்கிணைப்பாளரும் சட்டப்பேரவை எதிர்க்கட்சித் தலைவருமான எடப்பாடி பழனிசாமி இன்று (ஜூன்.26) வெளியிட்டுள்ள அறிக்கையில், "நடந்து முடிந்த சட்டப்பேரவைப் பொதுத் தேர்தலில் பரப்புரையின் போது, ஆட்சிப் பொறுப்பேற்றவுடன் நீட் தேர்வு ரத்து செய்யப்படும் என்று தமிழ்நாட்டு மாணவர்களுக்கு திமுக வாக்குறுதி அளித்தது.
தமிழ்நாட்டைப் பொறுத்தவரை அரசுப் பள்ளி மாணவர்களின் மருத்துவ கல்விக் கனவை நிறைவேற்ற நீட் தேர்வு வேண்டாம் என்பதுதான் அனைவரின் நிலைபாடு. காங்கிரஸ், திமுக கூட்டணி ஆட்சியின் போது 2010ஆம் ஆண்டு கொண்டு வரப்பட்ட நாடு முழுவதும் மருத்துவ கல்விக்கான நுழைவுத் தேர்வு தமிழ்நாட்டு மாணவர்களை பொறுத்தவரை பாதிப்பை ஏற்படுத்தும்; அதை திணிக்க கூடாது என்பது தான் அதிமுக அரசின் நிலைப்பாடு.
இதற்காக அதிமுக அரசு உச்சநீதிமன்றம் வரை சென்று போராடியது; விலக்கும் பெற்றது. ஆனால் உச்சநீதிமன்றத்தில் மறு சீராய்வு மனு தாக்கல் செய்யப்பட்டு, இந்தியா முழுவதும் நீட் தேர்வு நடைபெறும் என்ற ஆணை பிறப்பிக்கப்பட்டது.
நீட் தேர்வை அதிமுக அரசு கடுமையாக எதிர்த்த போதும், அது இருக்கும் வரை, தமிழ்நாடு அரசுப்பள்ளிகளில் படிக்கும் மாணவ, மாணவியரை அத்தேர்வுக்கு தயார்படுத்தும் பணியையும் அதற்கு ஏற்றார் போன்ற பாடத் திட்டங்களை மாற்றி அமைத்ததோடு மாவட்டந்தோறும் நீட் தேர்வுக்காக அரசு மேல்நிலைப் பள்ளிகளில் சிறப்புப் பயிற்சியும் அளிக்கப்பட்டது. மேலும் நீட் தேர்வு குறித்த புரிதலுக்காக வல்லுநர்களைக் கொண்டு ஒரு சிறப்பு கையேடும் தயாரிக்கப்பட்டு மாணவர்களுக்கு வழங்கப்பட்டது.
இவ்வித நடவடிக்கைகள் மட்டுமல்லாமல் அரசுப் பள்ளி மாணவர்கள் பெருமளவு மருத்துவக் கல்லூரியில் சேரவேண்டும் என்பதற்காக அதிமுக அரசால் 7.5 விழுக்காடு இட ஒதுக்கீடும் கொண்டு வரப்பட்டது. இதனால் சுமார் 435 மாணவ, மாணவியர் மருத்துவம், பல்மருத்துவம் படிப்பில் சேர்ந்து படித்து வருகின்றனர். இவர்களது 5ஆண்டுக்கான மருத்துவக் கல்விச் செலவினை அதிமுக அரசே ஏற்றுக்கொண்டது.
நடந்து முடிந்த சட்டப்பேரவைக் கூட்டத்தில், நான் பேசும்பொழுது, ஆட்சிக்கு வந்தவுடன் நீட் தேர்வை ரத்து செய்வேன் என்று மாணவர்களுக்கு வாக்குறுதி அளித்தீர்களே, என்ன நடவடிக்கை எடுத்தீர்கள் என்று கேள்வியெழுப்பினேன். அதற்கு நீதியரசர்.ஏ.கே ராஜன் தலைமையில், நீட் பின் விளைவுகளை அறிவதற்கு கமிஷன் அமைக்கப்பட்டுள்ளது. கமிஷனின் பரிந்துரைகளின் மீது மேல்நடவடிக்கை எடுக்கப்படும் என முதலமைச்சர் பதில் அளித்தார்.
அதைத்தொடர்ந்து நான் பேரவையில், நேரடியாக இந்தாண்டு நீட் தேர்வு உண்டா? இல்லையா? என கேள்வியெழுப்பினேன். நீட் இருப்பின் மாணவர்கள் இதற்கு தயாராக வேண்டுமா? வேண்டாமா? என கேட்டபொழுது, முதலமைச்சர் இதற்கு நேரடியாக பதிலளிக்கவில்லை.
தற்போதைய அரசின் இந்த முடிவால் நடப்பு ஆண்டு நீட் தேர்வு தமிழ்நாட்டில் நடைபெறுமா? நடைபெறாதா? என்ற குழப்பம் மாணவர்கள் மத்தியிலும் பெற்றோர்கள் மத்தியிலும் எழுந்துள்ளது. நீட் தேர்வுக்கு மாணவர்கள் தயராக வேண்டுமா? வேண்டாமா? என்று புரியாமல் தவித்து வருகிறார்கள்.
உச்ச நீதிமன்றத்தின் வழிகாட்டுதலின்படி, இந்த ஆண்டு ஒன்றிய அரசு நீட் தேர்வை நாடு முழுவதும் நடத்தியே தீரும் என்று அகில இந்திய மருத்துவக் கல்விக் கழகம் அறிவித்துள்ளது. தமிழ்நாட்டு மாணவர்களுக்கு நீட் தேர்விலிருந்து விலக்கு பெற்றே தீருவோம் என்று வாக்குறுதி தந்த இந்த அரசு நியமித்துள்ள நீதியரசர் ஏ.கே. ராஜன் தலைமையிலான கமிஷன் பரிந்துரைகள் வருவதற்கு முன்பு, தமிழ்நாட்டு மாணவர்கள் நீட் தேர்வில் பங்கேற்பதா? வேண்டமா? என்பதைத் தெளிவுபடுத்த வேண்டும் என்று கேட்டுக்கொள்கிறேன்" என அறிக்கையில் குறிப்பிடப்பட்டுள்ளது.
இதையும் படிங்க: உதயநிதி - ஏ.கே.ராஜன் சந்திப்பில் நடந்த ருசிகரம்!
