சென்னை: பிரதமர் மருத்துவக் காப்பீடு திட்டத்தில் முறைகேடுகள் நடைபெற்றுள்ளதாக சிஏஜி அறிக்கையில் கூறப்பட்டுள்ளது குறித்தும், இறந்தவர்களுக்கும், திட்டம் நடைமுறைக்கு வராதா காலத்திற்கு முன்பே சிகிச்சை வழங்கப்பட்டதாகவும் முறைகேடுகள் நடைபெற்றுள்ளது குறித்தும் விசாரணை நடத்திட வேண்டும் என சமூக சமத்துவத்திற்கான டாக்டர்கள் சங்கம் வலியுறுத்தி உள்ளது.
இது குறித்து சமூக சமத்துவத்திற்கான டாக்டர்கள் சங்கத்தின் பொதுச்செயலாளர் ரவீந்தரநாத் கூறியதாவது, "அரசு ஆரம்ப சுகாதார நிலையங்களில் பணிபுரியும் ஆர்.சி.எச் தூய்மை பணியாளர்கள் நீண்ட காலமாக ரூ.1500 மட்டுமே மாதத் தொகுப்பூதியமாக பெற்றுக் கொண்டு, தற்காலிக அடிப்படையில் பணியாற்றி வருகின்றனர்.
அவர்களுக்கு ஊதிய உயர்வு வழங்கிட வேண்டும் என்ற கோரிக்கையை நீண்ட காலமாக வலியுறுத்தி வந்தோம். இந்நிலையில் தமிழ்நாடு அரசு மாதந்தோறும் ரூ.15,000 ஊதியம் கிடைத்திடும் வகையில் அவர்களை பல்நோக்கு மருத்துவப் பணியாளர்களாக பணிநியமனம் செய்து உதவியுள்ளது.
பல்நோக்கு மருத்துவப் பணியாளர்களுக்கான காலிப் பணியிடங்கள் உருவாகும் பொழுது, எஞ்சியுள்ள தூய்மை பணியார்களையும் பல்நோக்கு மருத்துவப் பணியாளர்களாக பணி நியமனம் செய்து ஊதிய உயர்வு வழங்குவதாக தமிழ்நாடு அரசு உறுதி அளித்துள்ளது.
எம்பிபிஎஸ் படிப்பிற்கு நெக்ஸ்ட் தேர்வை திணிப்பது போல் பல் மருத்துவ படிப்பிற்கும் மத்திய அரசு நெக்ஸ்ட் தேர்வை திணிப்பது கடும் கண்டனத்திற்குரியது. மருத்துவப் படிப்புகளில் மாநில உரிமைகளை பறிப்பது சரியல்ல. எனவே, நெகஸ்ட் தேர்வை திணிக்கும் முயற்சியை மத்திய அரசு முற்றிலுமாக கைவிட வேண்டும்.
பிரதமர் மருத்துவக் காப்பீடு திட்டத்தில் முறைகேடுகள் நடைபெற்றுள்ளதாக இந்திய தலைமை கணக்காயர் அறிக்கையில் கூறப்பட்டுள்ளது. இறந்தவர்களுக்கு சிகிச்சை வழங்கியதாகவும், திட்டம் நடைமுறைக்கு வராதா காலத்திற்கு முன்பே சிகிச்சை வழங்கப்பட்டதாகவும் முறைகேடுகள் நடைபெற்றுள்ளன.
ஒரே கைபேசி எண்ணில் பல லட்சம் பேருக்கு, மருத்துவக் காப்பீடு பதிவு செய்யப்பட்டுள்ளது. பல பயனாளிகளுக்கு, மருத்துவமனைகளில் இருந்து விடுவிக்கப்பட்ட பிறகு (discharge) அறுவை சிகிச்சைகள் செய்யப்பட்டுள்ளதாக குறிப்பிடப்பட்டு, அவ்வறுவை சிகிச்சைக்களுக்காவும் காப்பீட்டு நிறுவனங்களில் இருந்து காப்பீட்டுத் தொகை பெறப்பட்டுள்ளது.
இது போன்று ஏராளமான முறைகேடுகள் நடைபெற்றுள்ளதாக இந்திய தலைமைக் கணக்காயர் அறிக்கையில் கூறப்பட்டுள்ளது. எனவே, இந்த ஊழல் முறைகேடுகள் குறித்து நேர்மையான விசாரணைக்கு உத்தரவிட வேண்டும்.
தமிழ்நாடு அரசின் கட்டுப்பாட்டில் உள்ள இளநிலை மருத்துவக் கல்வி இடங்களுக்கு நீட் தேர்விலிருந்து விலக்கு பெறுவதற்கான நீட் விலக்கு மசோதாவிற்கு குடியரசுத் தலைவரின் ஒப்புதலை மத்திய அரசு உடனடியாக பெற்றுக் கொடுத்திட வேண்டும்.
ஜெனிரிக் மருந்துகளை மட்டுமே மருத்துவர்கள் பரிந்துரைக்க வேண்டுமென்ற தேசிய மருத்துவ ஆணையம் புதிய நெறிமுறைகளை உருவாக்கியுள்ளது. ஜெனிரிக் மருந்துகளை மட்டுமே பரிந்துரைக்க வேண்டும் என மருத்துவர்களை வலியுறுத்துவதைவிட, மருந்து உற்பத்தி நிறுவனங்கள் ஜெனிரிக் மருத்துகளை மட்டுமே உற்பத்தி செய்யவும் விற்கவும் வேண்டும் என மத்திய அரசு சட்டம் கொண்டுவந்துவிட்டால், பிரச்சினையை முழுமையாக தீர்த்துவிடலாம்.
எனவே, மத்திய அரசு மருந்துகளுக்கான வணிகப் பெயர்களை தடை செய்ய வேண்டும். பொதுத்துறை நிறுவனங்கள் மூலம் ஜெனிரிக் மருந்துகளை தரமான முறையில் அதிக அளவில் உற்பத்தி செய்து குறைந்த விலையில் வழங்கிட மத்திய அரசு நடவடிக்கை எடுத்திட வேண்டும்.
அரசு உதவி பெறும் பள்ளி மாணவர்களுக்கும், தமிழ்வழியில் படித்த மாணவர்களுக்கும் மருத்துவப் படிப்பு உள்ளிட்ட தொழிற் கல்லூரிகளில் தனி உள் இடஒதுக்கீட்டை தமிழ்நாடு அரசு வழங்க வேண்டும்.
இயற்கை பிரசவம் என்ற பெயரில், வீட்டிலேயே யூ டியூபை பார்த்து பிரசவம் பார்க்கும் விபரீதமான போக்கு தமிழ்நாட்டில் அதிகரித்து வருகிறது. இதனால் தாய்-சேய் உயிர்ச் சேதங்கள் ஏற்படுகின்றன. இது மிகுந்த கவலை அளிக்கிறது.
எனவே, வீட்டிலேயே பிரசவம் பார்ப்பதால் ஏற்படும் ஆபத்துக்கள், பாதிப்புகள் குறித்து மக்களிடையே தமிழ்நாடு அரசு விழிப்புணர்வை மேலும் அதிகரிக்க வேண்டும். மருத்துவ அறிவியல் குறித்து, அறிவியலுக்குப் புறம்பான கருத்துக்களை சமூக ஊடகங்கள் உள்ளிட்ட பல்வேறு வழிகள் மூலம் மக்கள் மத்தியில் பரப்புவோர் தமிழ்நாடு அரசு மீது கடும் நடவடிக்கைகளை எடுத்திட வேண்டும்" என தெரிவித்தார்.
இதையும் படிங்க: மனைவிக்கு You tube பார்த்து பிரசவம் செய்த இயற்கை ஆர்வலர்.. பரிதாபமாக உயிரிழந்த மனைவி..
