தமிழ்நாடு அரசால் தடைசெய்யப்பட்ட குட்கா, பான் மசாலா உள்ளிட்ட போதைப்பொருள்கள் காவல் துறை உதவியோடு விற்பனை செய்யப்படுவதாக குற்றஞ்சாட்டி, அரசின் கவனத்திற்கு கொண்டுவருவதற்காக எதிர்க்கட்சித் தலைவர் ஸ்டாலின் உள்ளிட்ட 21 திமுக எம்எல்ஏக்கள் சட்டப்பேரவைக்குள் 2017ஆம் ஆண்டு குட்கா பாக்கெட்டுகளைக் கொண்டுசென்றனர்.
இது தொடர்பாக பேரவைத் தலைவர் அனுப்பிய பரிந்துரையின்படி, சட்டப்பேரவை உரிமைக்குழு எடுத்த நடவடிக்கையில் அனுப்பப்பட்ட உரிமை மீறல் குழு நோட்டீஸை ரத்து செய்யக்கோரி ஸ்டாலின் உள்ளிட்ட 21 திமுக எம்எல்ஏக்களும் 2017ஆம் ஆண்டு செப்டம்பர் 7ஆம் தேதி வழக்குத் தொடர்ந்தனர். ஜெ. அன்பழகன், கே.பி.பி. சாமி ஆகியோர் மரணமடைந்த நிலையில், கு.க. செல்வம் கட்சியை விட்டு நீக்கப்பட்டதாக தெரிவிக்கப்பட்டிருந்தது.
இந்தச் சூழலில் மற்றவர்கள் மீதான வழக்கை தலைமை நீதிபதி ஏ.பி. சாஹி அமர்வு விசாரித்து இந்த ஆண்டு ஆகஸ்ட் 25ஆம் தேதி தீர்ப்பளித்தது. அதில், 2017ஆம் ஆண்டு அனுப்பப்பட்டநோட்டீஸ் நடைமுறையில் அடிப்படைத் தவறுகள் உள்ளதால், அதை ரத்துசெய்து உத்தரவிட்டது. மேலும், பேரவை உரிமைக்குழு விருப்பப்பட்டால் புதிய நோட்டீஸ் அனுப்பலாம். திமுக எம்எல்ஏக்களின் கருத்துகளை அக்குழுவிடம் முன்வைக்கலாம் என்றும் கூறியிருந்தனர்.
இந்நிலையில், இந்த விவகாரத்தில் உரிமைக்குழு இரண்டாவது முறையாக செப்டம்பர் 7ஆம் தேதி பொள்ளாச்சி ஜெயராமன் தலைமையில் கூடியது. அதன்படி, திமுக தலைவர் ஸ்டாலின் உள்ளிட்ட 18 எம்எல்ஏக்களுக்கு நோட்டீஸ் அனுப்பப்பட்டு, சட்டப்பேரவை தொடங்கவுள்ள செப்டம்பர் 14ஆம் தேதியன்று பதிலளிக்க உத்தரவிட்டது.
இதனை எதிர்த்து ஸ்டாலின் உள்ளிட்ட 18 பேரும் மீண்டும் சென்னை உயர் நீதிமன்றத்தில் வழக்குத் தொடர்ந்தனர். அதில், "சட்டப்பேரவைக் கூட்டத்தொடர் தொடங்கவுள்ள நிலையில் தங்களை பங்கேற்கவிடாமல் தடுக்கப்பதற்காகவும், கரோனா வைரஸ் தடுப்பு நடவடிக்கைகளில் அரசு தவறாகக் கையாண்ட விவகாரத்தைச் சட்டப்பேரவையில் எழுப்புவதை தடுக்கும் வகையில் உரிமைக்குழு நோட்டீஸ் அனுப்பியுள்ளதால் அதை ரத்துசெய்ய வேண்டும்" எனக் குறிப்பிட்டுள்ளனர்.
இந்த மனு அடுத்த வாரம் விசாரணைக்கு வர வாய்ப்புள்ளது என எதிர்பார்க்கப்படுகிறது.
இதையும் படிங்க: வாய் பேச முடியாத காதல் ஜோடி தற்கொலை - வெளியான வீடிேயா
