முன்னாள் பிரதமர் ராஜிவ் காந்தி கொலை வழக்கில் கைதான எழுவரில் ஒருவரான பேரறிவாளனை இன்று உச்ச நீதிமன்றம் விடுதலை செய்யக்கோரி உத்தரவிட்டது. இதனையடுத்து, அரசியல் தலைவர்கள் மற்றும் நட்சத்திரங்கள் இது குறித்து கருத்து தெரிவித்து வருகின்றனர். இந்நிலையில், தேமுதிக-வின் தலைவர் விஜயகாந்த் இதுகுறித்து அறிக்கை ஒன்றை வெளியிட்டுள்ளார்.
அதில், “ முன்னாள் பிரதமர் ராஜிவ் காந்தி கொலை வழக்கில் கைது செய்யப்பட்டு சுமார் 31 ஆண்டுகளாக சிறைவாசம் அனுபவித்து வந்த பேரறிவாளனை விடுதலை செய்து உச்சநீதிமன்றம் அளித்த தீர்ப்பை மனதார வரவேற்கிறேன். தனது பாதி காலத்தை சிறையிலேயே அவர் அனுபவித்து விட்ட நிலையில் பேரறிவாளனின் விடுதலை அவரது தாயார் அற்புதம்மாளின் சட்டப்போராட்டத்திற்கு கிடைத்த வெற்றி, அற்புதம்மாளின் விடா முயற்சியால் இன்று தனது மகனை மீட்டெடுத்துள்ளார்.
அவருக்கு எனது பாராட்டுக்களைத் தெரிவித்துக் கொள்கிறேன். பேரறிவாளனின் தண்டனை காலத்தை மேலும் நீட்டிக்காமல் அவரை விடுதலை செய்த உச்ச நீதிமன்ற நீதிபதிகளுக்கும் தேமுதிக சார்பில் எனது பாராட்டுகளைத் தெரிவித்துக் கொள்கிறேன். அதேபோல் ராஜிவ்காந்தி கொலை வழக்கில் சிறையில் உள்ள நளினி உள்ளிட்ட மேலும் 6 பேரையும் விரைவில் விடுவிக்க வேண்டும் எனக் கேட்டுக் கொள்கிறேன்” எனத் தெரிவித்துள்ளார்.
இதையும் படிங்க: Perarivalan release: வாயில் வெள்ளை துணி கட்டி காங்கிரஸ் நாளை போரட்டம்!
