சென்னை: தமிழ் சினிமாவின் வசூல் மன்னன் என்று அழைக்கப்படுபவர், நடிகர் விஜய். இவரை வைத்து படம் தயாரிக்கவும் இயக்கவும் பலர் போட்டியிட்டு வருகின்றனர். இவர் தற்போது லோகேஷ் கனகராஜ் இயக்கத்தில் ”லியோ” என்ற படத்தில் நடித்து வருகிறார். இப்படத்தின் படப்பிடிப்பு விறுவிறுப்பாக நடைபெற்று வருகிறது. இந்த ஆண்டு அக்டோபர் மாதம் ’’லியோ’’ திரைப்படம் வெளியாக உள்ளது.
இந்த நிலையில் நடிகர் விஜய் ஏஜிஎஸ் தயாரிப்பு நிறுவனத்தில் ஏற்கனவே ”பிகில்” என்ற படத்தில் நடித்திருந்தார். தற்போது நடிகர் விஜய் தனது 68ஆவது படத்தை ஏஜிஎஸ் நிறுவனத்தின் தயாரிப்பில் நடிக்க உள்ளார். இதன் அறிவிப்பு இன்று (மே 21) வெளியாகியுள்ளது. இப்படத்தை இயக்குநர் வெங்கட் பிரபு இயக்க உள்ளதாக அறிவிக்கப்பட்டுள்ளது.
தற்காலிகமாக இப்படத்திற்கு தளபதி 68 என்று பெயரிடப்பட்டுள்ளது. வெங்கட் பிரபு படங்கள் என்றாலே அதில் சுவாரஸ்யமான கதை சொல்லும் முறை இருக்கும். நிறைய புதுமையான காட்சிகள் இருக்கும். மாஸாகவும் இருக்கும். இவர் இம்முறை விஜய்யுடன் இணைந்துள்ளது ரசிகர்களுக்கு இன்ப அதிர்ச்சியை ஏற்படுத்தியுள்ளது.
இயக்குநர் வெங்கட் பிரபு, நடிகர் அஜித்தை வைத்து இயக்கிய ’’மங்காத்தா’’ திரைப்படம் இன்றுவரை கிளாசிக் மாஸ் படமாக பார்க்கப்படுகிறது. அதேபோன்று நடிகர் சிம்பு நடிப்பில் இவர் இயக்கிய ’’மாநாடு’’ திரைப்படம் பிளாக்பஸ்டர் ஹிட்டடித்தது. அதுமட்டுமின்றி, நீண்ட இடைவெளிக்குப் பிறகு விஜய் படத்திற்கு யுவன் சங்கர் ராஜா இசை அமைக்க உள்ளார். இதுவும் ஒரு எதிர்பார்ப்பை ஏற்படுத்தியுள்ளது.
இப்படம் தென்னிந்திய சினிமாவின் முன்னணி தயாரிப்பு நிறுவனமான ஏஜிஎஸ் என்டர்டெயின்மென்ட்டின் கல்பாத்தி எஸ்.அகோரம், கல்பாத்தி எஸ்.கணேஷ் மற்றும் கல்பாத்தி எஸ்.சுரேஷ் ஆகியோரின் 25ஆவது படம் என்பது குறிப்பிடத்தக்கது. 'பிகில்' திரைப்படத்தின் மாபெரும் வெற்றிக்குப் பிறகு, நடிகர் விஜய்யுடன் இரண்டாவது முறையாக அவரது 68-வது படத்திற்காக ஏஜிஎஸ் என்டர்டெயின்மென்ட் இணைகிறது.
#Thalapathy68 என்று தற்காலிகமாக அழைக்கப்படும் இத்திரைப்படமானது ஏஜிஎஸ்-ன் 25ஆவது படைப்பு என்பதோடு இதுவரை இந்நிறுவனம் தயாரித்துள்ள திரைப்படங்களிலேயே மிகப் பிரமாண்டமான வகையில் உருவாக உள்ளது என்பது குறிப்பிடத்தக்கது.
அனைத்து பார்வையாளர்களாலும் விரும்பப்படும் சிறந்த பொழுதுபோக்கு படமாக #Thalapathy68 இருக்கும். சர்வதேச தரத்தில் உருவாகவுள்ள இத்திரைப்படத்தில் முன்னணி தொழில்நுட்பக் கலைஞர்கள் பணியாற்ற உள்ளார்கள். நடிகர்கள், தொழில்நுட்பக் குழுவினர் மற்றும் படத்தலைப்பு உள்ளிட்ட அதிகாரப்பூர்வ அறிவிப்புகள் தயாரிப்பு நிறுவனத்தால் உரிய நேரத்தில் வெளியிடப்படும் என்று கூறப்படுகிறது.
கல்பாத்தி எஸ்.அகோரம், கல்பாத்தி எஸ்.கணேஷ் மற்றும் கல்பாத்தி எஸ்.சுரேஷ் ஆகியோரின் ஏஜிஎஸ் என்டர்டெயின்மென்ட் தயாரிப்பில் வெங்கட் பிரபு இயக்கத்தில் உருவாகவுள்ள #Thalapathy68 திரைப்படம் 2024ஆம் ஆண்டு வெளியாகும் என்றும் தெரிவிக்கப்பட்டுள்ளது.
இதையும் படிங்க: பிச்சைக்காரன் 2 ரிலீஸ் எஃபெக்ட் - 2000 ரூபாய் செல்லாதது குறித்து விஜய் ஆண்டனி கருத்து!
