அக்குபஞ்சர், ஆயுர்வேதம், சித்த மருத்துவம் வொர்ஸ்ட்!

சென்னை: அக்குபஞ்சர், சித்தா, ஆயுர்வேத முறையில் சர்க்கரை நோயை குணப்படுத்திவிட முடியும் என்பதை மக்கள் நம்ப வேண்டாம் என்று மருத்துவர் பன்னீர்செல்வம் தெரிவித்துள்ளார்.

சென்னை டாக்டர் எம்ஜிஆர் மருத்துவ பல்கலைகழகத்தில் சர்க்கரை நோய் குறித்த பொது மக்களுக்கான விழிப்புணர்வு நிகழ்ச்சி நடைபெற்றது. இந்நிகழ்ச்சியில் நீரிழிவு நோய் சிறப்பு மருத்துவர் பன்னீர்செல்வம் பங்கேற்று சர்க்கரை நோயை கட்டுப்படுத்தும் வழிமுறைகளையும், நோய் வந்த பின்னர் உண்ணவேண்டிய உணவு முறைகள் குறித்தும் மக்களுக்கு விளக்கினார்.

இதன் பின்னர் செய்தியாளர்களிடம் பேசிய அவர், மக்கள் அனைவரும் நோயினால் பாதிப்பு ஏற்பட்ட பின்புதான் சிகிச்சை பெற வருகின்றனர். எனவே 30 வயது அடைந்தவர்கள் தாங்களாகவே சர்க்கரை நோய் பரிசோதனை செய்துகொள்ள வேண்டும். சர்க்கரை நோய் இல்லாவிட்டாலும் தினமும் உடற்பயிற்சி செய்வது நல்லது. தமிழ்நாட்டில், போலியோ குடும்ப கட்டுப்பாடு போன்றவை குறித்து தொடர்ந்து விழிப்புணர்வை ஏற்படுத்தியதால் அவை கட்டுப்படுத்தப்பட்டுள்ளது என்று தெரிவித்தார்.

தொடர்ந்து பேசிய அவர், சர்க்கரை நோயை அக்குபஞ்சர், சித்தா மற்றும் ஆயுர்வேத முறையில் முற்றிலும் குணப்படுத்திவிடலாம் என்பது அறிவியல் பூர்வமாக நிரூபிக்கப்படாத ஒன்றாகும். அலோபதி மருத்துவத்தில் சர்க்கரை நோயை கட்டுப்படுத்த மட்டுமே முடியும். அக்குபஞ்சர் மூலம் முற்றிலும் குணப்படுத்த முடியும் என அவர்கள் நிரூபிக்க தயாரா? என கேள்வி எழுப்பினார். மேலும், சமூக வலைதளங்களில் சர்க்கரை நோய் குறித்து கூறப்படுவதை நம்பி யாரும் சிகிச்சை மேற்கொள்ள வேண்டாம். சர்க்கரை நோய் இருப்பது தெரிந்தால் தங்களது மருத்துவரின் ஆலோசனையைப் பெற்று சிகிச்சை மேற்கொள்ள வேண்டும் எனக் கூறினார்.