சென்னை: அதிமுக சார்பில் வரும் ஆகஸ்ட் 20ஆம் தேதி மதுரையில் நடைபெற உள்ள மாநாட்டில் நிறைவேற்றப்பட (AIADMK conference in Madurai) உள்ள தீர்மானங்கள் தொடர்பாக சென்னை ராயப்பேட்டையில் உள்ள அதிமுக தலைமை அலுவலகத்தில் மாநாட்டு தீர்மானக்குழு உறுப்பினர்களின் ஆலோசனைக் கூட்டம் இன்று (ஜூலை 12) நடைபெற்றது. இந்த ஆலோசனைக் கூட்டத்தில் முன்னாள் அமைச்சர்கள் பொன்னையன், ஜெயக்குமார், ஓ.எஸ்.மணியன், பெஞ்சமின், செம்மலை, பாலகங்கா உள்ளிட்ட பலரும் பங்கேற்றனர். இதில், ஆகஸ்ட் 20ஆம் தேதி நடைபெற உள்ள 'மதுரை மாநாடு' குறித்து ஆலோசனை மேற்கொள்ளப்பட்டன.
ஓபிஎஸ், சசிகலா, டிடிவி தினகரன் அதிமுகவில் இணைய வாய்ப்பா? அதிமுகவின் பொதுச்செயலாளராக எடப்பாடி பழனிசாமியை தேர்தல் ஆணையம் அங்கீகரித்த நிலையில், அதனை தனது இணையதளத்திலும் தேர்தல் ஆணையம் வெளியிட்டது. இதனால், அதிமுகவில் நிலவி வந்த உட்கட்சி பிரச்னை ஒருவழியாக முடிவுக்கு வந்தது. இதனையடுத்து, கட்சியில் இருந்து நீக்கம் செய்யப்பட்டவர்கள் அதிமுகவின் பொதுச்செயலாளர் எடப்பாடி பழனிசாமியிடம் மன்னிப்புக் கடிதம் கொடுத்து, மீண்டும் கட்சியில் இணைந்து கொள்ளலாம் என அதிமுக சார்பில் நேற்று (ஜூலை11) அறிவிப்பு வெளியானது. இந்த மன்னிப்புக் கடிதம் ஓபிஎஸ், சசிகலா, டிடிவி தினகரன் ஆகியோருக்கு பொருந்துமா? என கேள்வி எழுந்தது.
முடிவு எடப்பாடி பழனிசாமி கையில்: இதுகுறித்து பதிலளித்த முன்னாள் அமைச்சர் ஜெயக்குமார், ''கட்சியில் இருந்து நீக்கம் செய்யப்பட்டவர்கள் மன்னிப்புக் கடிதம் கொடுத்தால் கட்சியில் சேர்த்துக் கொள்ளப்படுவார்கள் என எடப்பாடி பழனிசாமி அறிவித்துள்ளார். இந்த அறிவிப்பு ஓபிஎஸ், சசிகலா, டிடிவி தினகரன் உள்ளிட்ட மூன்று பேருக்கும் அது பொருந்தாது. ஆனால், கட்சியில் சேர்ப்பது குறித்து பொதுச்செயலாளர் தான் முடிவு செய்வார். ஓ.பி.எஸ் திமுகவின் கைக்கூலி, இவர் கட்சிக்கு களங்கம் ஏற்படுத்த என்ன முயற்சி செய்தாலும் முடியாது'' எனக் கூறினார்.
அமைதி இழந்த தமிழ்நாடு: தொடர்ந்து செய்தியாளர்களின் பல்வேறு கேள்விக்கு பதிலளித்த முன்னாள் அமைச்சர் ஜெயக்குமார், '' அதிமுக பொதுச்செயளாலர் எடப்பாடி பழனிசாமி தலைமையில் எழுச்சியான மாநாடு நடைபெற உள்ளது. அணியாக அணியாக அனைவரும் பங்கேற்று ஆர்ப்பரிக்கும் கூட்டமாக இருக்க வேண்டும் என அண்ணா தொழிற் சங்க கூட்டத்தில் ஆலோசிக்கப்பட்டது. தமிழ்நாடு அமைதிப் பூங்காவாக இல்லை; அமளி பூங்காவாக இருக்கிறது. அமைதியான வாழ்க்கை அதிமுக ஆட்சியில் உறுதிபடுத்தப்பட்டது. தற்போது பெட்ரோல் குண்டு கலாசாரங்கள் தலைதூக்கியுள்ளன.
இரும்புக்கரம் கொண்டு சட்டம் ஒழுங்கை பேணுக: 'கொலை கொலையா முந்திரிக்கா' மாதிரி தமிழ்நாட்டில் கொலை கொலையாக நடந்துகொண்டு இருக்கிறது. முதலமைச்சர் சட்டம் ஒழுங்கை கட்டுப்படுத்தி மக்கள் அமைதியாக வாழ வழிவகை செய்யாமல், எதிர்க்கட்சித்தலைவர் உள்ளிட்டோர் போராட்டம் நடத்திய பிறகு தான், முதலமைச்சர் விழித்து தற்போது ஆலோசனைக் கூட்டம் நடத்துகிறார். இவற்றை இரும்புக்கரம் கொண்டு அடக்கி ஒடுக்கி அமைதியை ஏற்படுத்தி தருவது அரசின் கடமை. அந்த கடமையில் இருந்து முதலமைச்சர் பின்வாங்கி விட்டார். தொடர்ச்சியாக குற்றச்சம்பவங்கள் நடைபெற்று வருகின்றன.
ராயபுரம் பகுதியில் 1044 குடியிருப்புகள் கொண்ட கட்டடம் அதிமுக காலத்திலேயே கட்டி முடிக்கப்பட்டது. தற்பொழுது முதலமைச்சர் மு.க.ஸ்டாலின் திறந்து வைத்துள்ளதால் அதற்கு அடிக்கல் நாட்டப்பட்டபோது வைக்கப்பட்ட கல்வெட்டை எடுத்துள்ளனர். மேலும், 2021ஆம் ஆண்டு குடியிருப்பு கட்டி முடிக்கப்பட்டாலும் தேர்தல் பணிகளின் காரணமாக திறக்கப்படாமல் இருந்தது. ஆனால், திமுக அரசு பொறுப்பேற்று உடனடியாக திறக்காமல் 2 ஆண்டுகள் தாமதமாக அதனைத் திறந்துள்ளது. திமுக அரசே இந்த கட்டடத்தை கட்டியது போன்ற பிரம்மையை ஏற்படுத்த தற்பொழுது திறந்துள்ளது. அப்பகுதி மக்களுக்கு அந்த குடியிருப்பை வழங்காமல் வெவ்வேறு பகுதிகளை சேர்ந்தவர்களுக்கு வழங்குகிறது'' என அவர் தெரிவித்துள்ளார்.
தக்காளி விலை உயர்வுக்கு ஜெயக்குமார் சொல்லும் வழி!: இன்றைக்கு விலைவாசி உயர்ந்துள்ளதால், தக்காளியை கண்ணில் பார்க்க முடிகிறதா? சின்ன வெங்கயம், இஞ்சி உள்ளிட்ட அத்தியாவசியப் பொருட்கள் இல்லாத சமையலை கற்றுக்கொடுக்க ஒரு தனி துறையே அமைக்க வேண்டும் என்று கூறிய அவர், வேலைக்கு செல்பவர்கள் காலையிலேயே குடித்தால் தமிழ்நாடு விளங்குமா? என்று சாடினார்.
திமுக களையும்: மேலும் பேசிய அவர், வரும் 18ஆம் தேதி நடைபெற உள்ள தேசிய ஜனநாயக கூட்டணியின் கூட்டத்தில் அதிமுக சார்பில் பொதுச்செயலாளர் எடப்பாடி பழனிசாமி பங்கேற்பார் என்றும்; திமுக கூட்டணிக்குள் கடுமையான அதிருப்தி உள்ளதாகவும் கூறினார்.
அக்கட்சியில் எரிமலை எப்போது வெடிக்கும் என்பது போல் குமுறலில் இருப்பதாகவும், தேர்தலுக்கு இன்னும் காலம் இருக்கும் நிலையில், திமுக கூட்டணியில் இருப்பவர்கள் அதிமுக கூட்டணிக்கு வர வாய்ப்புள்ளதாக முன்னாள் அமைச்சர் ஜெயக்குமார் தெரிவித்துள்ளார்.
இதையும் படிங்க: senthil balaji: ஆட்கொணர்வு மனு மீது மூன்றாவது நீதிபதி இரண்டாவது நாள் விசாரணை!
