சென்னை: இந்து மகா சபா கட்சியின் துணைத் தலைவர் நந்தகுமார், தமிழ்ச் செல்வி, விக்கி உள்ளிட்டோர் தீபாவளி செலவுகளுக்கான சீட்டு, வீடு வாங்குதல், அரசு வேலை வாங்கித் தருவது உள்ளிட்டவற்றைக் கூறி சுமார் 1 கோடியே 20 லட்சம் ரூபாய் வரை பண மோசடியில் ஈடுபட்டு தலைமறைவானதாகக் கூறப்படுகிறது.
மோசடியானது கடந்த ஆண்டின் ஜனவரி தொடங்கி அக்டோபர் வரை நடைபெற்றதாகக் கூறப்படுகிறது.
பாதிக்கப்பட்டவர்கள் மதுரவாயல் காவல் நிலையத்தில் பலமுறை புகாரளித்தும் நடவடிக்கை எடுக்கப்படவில்லை எனக் கூறப்படுகிறது.
இதனால் ஆத்திரமடைந்த 30-க்கும் மேற்பட்டோர் மோசடியில் ஈடுபட்டவர்கள் மீது நடவடிக்கை எடுக்கக்கோரி, சென்னை - வேப்பேரியில் உள்ள காவல் ஆணையர் அலுவலகத்தில் புகார் அளிக்க வந்துள்ளனர்.
அப்போது மோசடியில் ஈடுபட்டவர்களின் புகைப்படங்கள் ஒட்டப்பட்ட பதாகைகளை கையில் ஏந்தி, முற்றுகைப் போராட்டத்தில் ஈடுபட்டனர்.
இதுகுறித்து பாதிக்கப்பட்டோர் தரப்பில் பேசுகையில், “எங்களை நம்பி உறவினர்கள், நண்பர்கள் உள்ளிட்டோர் லட்சக்கணக்கான பணத்தை நந்த குமாரிடம் இழந்து தவிக்கின்றனர்.
அனைவரும் பணத்தை திருப்பிக்கேட்பதால் பெரும் மனஉளைச்சல் ஏற்பட்டுள்ளது. பெறாத கடனுக்கு வட்டி கட்ட வேண்டிய நிலையும் ஏற்பட்டுள்ளது.
காவல் நிலையத்தில் புகாரளிப்பவர்களைத் தாக்கும் அடியாட்கள், கொலை மிரட்டல்களும் விடுக்கின்றனர். ஆகையால் தக்க நடவடிக்கை எடுத்து, இழந்த பணத்தை மீட்டுத் தர வேண்டும்” என்றனர்.
புகாரளிக்க வந்தவர்கள் காவல் ஆணையர் அலுவலகத்தை முற்றுகையிட்டுப் போராட்டத்தில் ஈடுபட்ட சம்பவம் பரபரப்பை ஏற்படுத்தியுள்ளது.
இதையும் படிங்க: அதிமுக வேட்பாளர்களை மிரட்டும் திமுக நிர்வாகி - காவல் நிலையத்தில் புகார்
