சென்னை: ஆவடி காவல் ஆணையர் எல்லைக்கு உட்பட்ட பகுதியில் கடந்த ஆகஸ்ட் மாதம் அதிமுக பிரமுகர் பார்த்திபன் கொலை செய்யப்பட்ட வழக்கில், முக்கிய குற்றவாளிகளான கூலிப்படைத் தலைவன் முத்து சரவணன் மற்றும் அவரது கூட்டாளி சதீஷ் ஆகியோரை போலீசார் தீவிரமாக தேடி வந்தனர். இதில் ரவுடி முத்து சரவணன் என்பவர் மீது 6 கொலை வழக்குகளும், சதீஷ் மீது ஐந்து கொலை வழக்குகளும் நிலுவையில் உள்ளன.
இந்நிலையில், இவ்விரு குற்றவாளிகளும் சோழவரம் அருகே பாழடைந்த வீட்டில் பதுங்கி இருந்ததாக கிடைத்த ரகசிய தகவலின் அடிப்படையில், ரவுடிகளை போலீசார் பிடிக்க முற்பட்டபோது துப்பாக்கியால் போலீசாரை தாக்க முயற்சித்துள்ளனர். இதனால் போலீசார் எதிர் தாக்குதல் நடத்தியதில், இரண்டு ரவுடிகளையும் போலீசார் என்கவுண்டர் செய்ததாக போலீசார் தரப்பில் தெரிவிக்கப்பட்டுள்ளது.
இதையடுத்து, இருவரின் உடல்களையும் மீட்டு ஸ்டான்லி அரசு மருத்துவமனைக்கு கொண்டு செல்லப்பட்டது. ஆனால், உயிரிழந்தவர்களின் குடும்பத்தார் இருவரின் உடல்களையும் வாங்காமல் சிபிஐ விசாரணை நடத்த வேண்டும் என கூறி வருகின்றனர். மேலும், ரவுடிகள் தாக்கியதில் காயம் அடைந்த மூன்று காவலர்களை டிஜிபி சங்கர் ஜிவால் மருத்துவமனைக்கு சென்று நலம் விசாரித்தார்.
இந்நிலையில் சம்பவம் தொடர்பாக ஆர்.டி.ஓ விசாரணை நடத்தப்பட்டு வருகிறது. சம்பவ இடத்திற்கு நேரடியாக சென்று ஆய்வு மேற்கொண்ட பின்பு ஆர்.டி.ஓ முன்னிலையில் ஸ்டான்லி அரசு மருத்துவமனையில் உடற்கூறு ஆய்வு செய்யப்பட உள்ளது. இதையடுத்து இருவரின் குடும்பத்தாரிடம் பேச்சுவார்த்தை நடத்தப்பட்டு உடல்கள் ஒப்படைக்கப்படும் எனவும் போலீசார் தரப்பில் தெரிவிக்கப்பட்டுள்ளது.
முன்னதாக, நேற்று என்கவுன்டர் நடைபெற்ற சம்பவ இடத்தில் ஆவடி மாநகர காவல் ஆணையர் சங்கர் நேரில் ஆய்வு செய்தார். அதனைத் தொடர்ந்து செய்தியாளர்களைச் சந்தித்துப் பேசிய அவர், “கடந்த ஆகஸ்ட் மாதம் அதிமுக பிரமுகர் பார்த்திபன் ஓட ஓட வெட்டி கொலை செய்யப்பட்ட சம்பவம் தொடர்பாக தனிப்படை அமைத்து தீவிர தேடுதல் வேட்டை நடைபெற்று வந்தது.
இதனையடுத்து, குற்றவாளிகள் இருவர் சம்பவ இடத்தில் பதுங்கி இருப்பதாக கிடைத்த தகவலின் பெயரில், பூவிருந்தவல்லி உதவி ஆணையர் ஜவகர் தலைமையில குற்றவாளிகளை பிடிக்க வந்தபோது, மறைத்து வைத்திருந்த துப்பாக்கியால் எதிரிகள் போலீசாரை நோக்கி சுட்டதில் மூன்று காவலர்கள் காயமடைந்தனர்.
எனவே, தற்காப்புக்காக காவல் துறையினர் எதிரிகளை நோக்கி சுட்டதாகவும், தொடர்ந்து துப்பாக்கியால் சுடப்பட்ட முத்து சரவணன், சண்டே சதீஷ் ஆகிய இருவரையும் அருகில் உள்ள மருத்துவமனைக்கு கொண்டு சென்றபோது அவர்கள் இறந்து விட்டதாக மருத்துவர்கள் உறுதி செய்துள்ளனர்.
மேலும், பொதுமக்களை மிரட்டி பணம் பறிப்பதும், பணம் கொடுக்காதவர்களை கொலை செய்வதுமே இவர்களின் முக்கிய தொழிலாக இருந்து வந்துள்ளது. ஆவடி மாநகர காவல் எல்லையில் ரவுடிசம் இரும்பு கரம் கொண்டு ஒடுக்கப்படும்” என்று ஆவடி மாநகர காவல் ஆணையர் சங்கர் தெரிவித்தார்.
இதையும் படிங்க: கரூரில் புதிய கல்குவாரிகள் அமைக்க எதிர்ப்பு.. ஆட்சியர், காவல் கண்காணிப்பாளர் மீது நடவடிக்கை எடுக்க வலியுறுத்தல்!
