சென்னை: கடந்த 2016ஆம் ஆண்டு நடைபெற்ற பொதுத்தேர்தலில் திருச்செந்தூர் தொகுதியில் திமுக சார்பில் அனிதா ராதாகிருஷ்ணன் போட்டியிட்டு வெற்றிபெற்றார்.
இந்த வெற்றியை எதிர்த்து, திருச்செந்தூரைச் சேர்ந்த வழக்கறிஞர் ராம்குமார் ஆதித்தன் என்பவர் சென்னை உயர் நீதிமன்றத்தில் தொடர்ந்திருந்த தேர்தல் வழக்கில், வேட்புமனுவில் 16 குறைபாடுகள் இருந்ததால், அதனைத் தேர்தல் அலுவலர் ஏற்றுக்கொண்டது செல்லாது என அறிவிக்கக்கோரி, கடந்த 2016ஆம் ஆண்டு வழக்கு தாக்கல் செய்திருந்தார்.
வழக்கு நிலுவையில் இருந்து வந்த நிலையில், கடந்த ஆகஸ்ட் 2021இல், பதவிக் காலம் முடிந்ததால் காலாவதியாகிவிட்டது. எனவே, அதனை தள்ளுபடி செய்யக்கோரி அனிதா ராதாகிருஷ்ணன் மனு தாக்கல் செய்திருந்தார். இந்த வழக்கில் சென்னை உயர் நீதிமன்ற நீதிபதி கிருஷ்ணகுமார் இன்று(ஜூன் 24) தீர்ப்பளித்துள்ளார்.
அதில் 2016-2021 ஐந்தாண்டு பதவிக் காலம் முடிந்துவிட்டது. அதனால் தொடர்ந்து வழக்கை நடத்த எந்த முகாந்திரமும் இல்லை எனக்கூறி, அமைச்சர் அனிதா ராதாகிருஷ்ணனுக்கு எதிரான தேர்தல் வழக்கை தள்ளுபடி செய்து உத்தரவிட்டுள்ளார்.
