சென்னை: சென்னை சர்வதேச ஒருங்கிணைந்த புதிய பன்னாட்டு முனையம் முதல் ஃபேஸ் 1,36,295 சதுர மீட்டர் பரப்பில் அமைக்கப்பட்டுள்ளது. இந்த புதிய முனையத்தை பிரதமர் நரேந்திர மோடி கடந்த 8-ஆம் தேதி திறந்து வைத்தார். மேலும் இந்த புதிய முனையம் சுற்றுச்சூழல் பாதிப்பு இல்லாத மாசற்ற ஒரு நவீன முனையமாக அமைக்கப்பட்டுள்ளது.
இந்தியா, தமிழ்நாட்டு கலாச்சாரம், புரதான நினைவுச் சின்னங்கள், பிரசித்தி பெற்ற கோயில்கள் போன்றவைகளின் ஓவியங்களுடனும், கலைநயத்துடனும் அமைக்கப்பட்டுள்ளது. ஏற்கனவே உள்ள சென்னை விமான நிலையத்தில் ஆண்டுக்கு 23 மில்லியன் பயணிகள் பயணிக்கின்றனர். ஆனால் இனிமேல் 30 மில்லியன் பயணிகள், பயணிப்பதற்கான வசதிகள் இதில் உருவாக்கப்பட்டுள்ளன.
மேலும் இந்த முனையம் அதிநவீன புதிய தொழில்நுட்பத்துடன், பயணிகள் பாதுகாப்பு ஏற்பாடுகள் சிறப்பாக செய்யப்பட்டுள்ளன. அதாவது இந்த புதிய முனையத்தில் பயணிகள் பாதுகாப்பு சோதனைக்காக 100 கவுன்டர்கள், குடியுரிமை சோதனைக்காக 108 கவுன்டர்கள், பயணிகள் உடமைகள் வரும் கண்வயர் பெல்ட்கள் 6, அதிநவீன லிப்ட்டுகள் 17, எஸ்கலெட்டர்கள் 17, வாக்கலேட்டர்கள் 6, பயணிகள் உடைமைகள் பரிசோதனை அதி நவீன கருவிகள் 3 அமைக்கப்பட்டுள்ளன.
விமான நிலைய ஓடுபாதை விமானம் நிறுத்தும் இடம், டாக்ஸி வே போன்றவைகளும் புதுப்பிக்கப்பட்டு, நவீனப் படுத்தப்பட்டுள்ளதால், விமானங்கள் புறப்படுவதற்கு முன்பு ஓடுபாதையில் காத்திருக்கும் நேரம் வெகுவாக குறைக்கப்பட்டுள்ளது. தற்போது இந்த புதிய ஒருங்கிணைந்த முனையத்தில் முதல் சோதனை ஓட்டம் நேற்று முதல் தொடங்கியது.
நேற்று பகல் 12:55 வங்கதேச தலைநகர் டாக்காவில் இருந்து 146 பயணிகளுடன் சென்னை வந்த யூ எஸ் பங்களா ஏர்லைன்ஸ் விமானம் முதல் விமானமாக புதிய முனையத்தில் தரை இறங்கியது. புதிய முனையத்தில் தரையிறங்கிய விமானத்திலிருந்து பயணிகள் உற்சாகத்துடன் வெளியே வந்து புதிதாக அமைக்கப்பட்டுள்ள ஏரோ பிரிட்ஜ் பாலம் வழியாக புதிய முனையத்தின் வருகை பகுதிக்கு வந்தனர்.
மேலும் விமான நிலைய உள்பகுதியில் அமைக்கப்பட்டுள்ள கலை நயத்துடன் கூடிய வண்ண ஓவியங்கள், பழமை வாய்ந்த கோயில் நினைவு சின்னங்கள் போன்றவைகளை பார்த்து ரசித்தனர். அதோடு புதிய விமான நிலையத்தில் அமைக்கப்பட்டிருந்த அதி நவீன கன்வேயர் பெல்ட்டில் மிகக்குறுகிய நேரத்தில் வந்த தங்களுடைய உடைமைகளை எடுத்துக்கொண்டு பயணிகள் மகிழ்ச்சியாக வெளியேறினர்.
அதே விமானம் பிற்பகல் 1:55 மணிக்கு புதிய முனையத்திலிருந்து சென்னை - டாக்காவிற்கு புறப்பட்டு சென்றது. இந்த விமானத்தில் 158 பயணிகள் பயணித்தனர். புதிய முனையத்தின் மேல் தளத்தில் அமைக்கப்பட்டிருந்த புறப்பாடு பகுதிக்கு நேற்று பகல் 12 மணிக்கு முன்னதாகவே வரத் தொடங்கி விட்டனர். அவர்களின் உடமைகள் புதிதாக அமைக்கப்பட்டுள்ள அதிநவீன இன் லைனர் ஸ்கேனர் மூலம் பரிசோதித்து விமானத்திற்கு அனுப்பப்பட்டன.
அதாவது கூடுதல் குடியுரிமை கவுன்டர்கள், பயணிகள் பாதுகாப்பு கவுன்டர்கள் அமைக்கப்பட்டு இருந்ததால், பயணிகள் நீண்ட வரிசையில் காத்திருக்காமல், அதிவிரைவாக அனைத்து சோதனைகளையும் முடித்துவிட்டு, விமானத்தில் ஏற தொடங்கினர். புறப்பாடு பயணிகளும் முனையத்தில் அமைக்கப்பட்டுள்ள கண்கவர் ஓவியங்களை பார்த்து ரசித்தபடி சென்றனர்.
இதைத் தொடர்ந்து மேலும் சில விமானங்கள் இந்த புதிய முனையத்தில் சோதனை அடிப்படையில் இயக்கப்பட இருக்கிறது. ஆனால் சிறிய ரக விமானங்களான ஏர் பஸ் 320, 321 மற்றும் போயிங் ரக 737,738 விமானங்கள் மட்டுமே இம்மாதம் முழுவதும் சோதனை அடிப்படையில் இங்கு வந்து செல்லும்.
சோதனை ஓட்டம் வெற்றி பெறும் நிலையில் வரும் மே மாதத்தில் இருந்து இந்த புதிய முனையத்தில் பெரிய ரக, மற்றும் நடுத்தர ரக விமானங்களும் இயக்கப்படும் என அறிவிக்கப்பட்டுள்ளது. ஏற்கனவே பழைய முனையத்தில் உள்ள ஏர்லைன்ஸ் அலுவலகங்கள், அரசுத் துறைகளான போலீஸ், பாதுகாப்பு, உளவுத்துறை உள்ளிட்ட அலுவலகங்களும் இந்த புதிய முனையங்களுக்கு முனையத்திற்கு இடமாற்றம் செய்யும் பணிகள் தற்போது நடந்து முடிந்துள்ளன.
அதோடு புதிய முனையத்தில் பயணிகள் வசதிக்காக டூட்டி ஃப்ரீ ஷாப் உணவு ஸ்டால்கள் போன்றவைகளும் அமைக்கப்பட்டு அவைகளும் இந்த புதிய முனையத்தில் செயல்பாட்டிற்கு வந்துள்ளது. மேலும் சென்னை சர்வதேச புதிய முனையத்தில் பயணித்த வருகை புறப்பாடு பயணிகளுக்கு சென்னை விமான நிலைய அதிகாரிகள் பூக்கள் கொடுத்து மகிழ்ச்சியுடன் வரவேற்றனர்.
