கொலை வழக்கில் ஒன்றில் ராதாகிருஷ்ணன், செல்வம், ஷேக்மீரான் ஆகிய மூவருக்கும் தூக்குத் தண்டனை விதித்து திருநெல்வேலி முதன்மை நீதிமன்றம் தீர்ப்பளித்தது. இந்த தீர்ப்பை எதிர்த்து மேல்முறையீடு செய்தபோது உயர் நீதிமன்றமும், உச்ச நீதிமன்றமும் தூக்குத்தண்டனையை உறுதி செய்தது. இவர்களின் கருணை மனுக்களை தமிழ்நாடு ஆளுநர் நிராகரித்ததையடுத்து குடியரசுத் தலைவருக்கு கருணை மனுக்கள் அனுப்பப்பட்டன.
இந்த மனுக்களை பரிசீலித்த மத்திய உள்துறை அமைச்சகம் எந்தவித தண்டனை குறைப்பும் இல்லாமல் ஆயுள் முழுக்க சிறை தண்டனை அனுபவிக்க வேண்டும் என்ற நிபந்தனையுடன் தூக்குத் தண்டனையை ஆயுள் தண்டனயாக குறைக்கலாம் என பரிந்துரைத்தது.
அதன் அடிப்படையில் ராதாகிருஷ்ணன், செல்வம், ஷேக்மீரான் ஆகிய மூவருக்கும் வழங்கப்பட்ட தூக்குத்தண்டனையை நிபந்தனையுடன் ஆயுள் தண்டனையாக குறைத்து குடியரசுத் தலைவர் உத்தரவிட்டார்.
இந்நிலையில், மூவரும் இந்த நிபந்தனையை ரத்து செய்து தமிழ்நாடு அரசின் அரசாணை அடிப்படையில் தங்களை முன்கூட்டியே விடுதலை செய்யக்கோரி சென்னை உயர் நீதிமன்றத்தில் மனுத்தாக்கல் செய்தனர்.
இம்மனுவை விசாரித்த நீதிபதி ஆனந்த் வெங்கடேஷ், தூக்குத் தண்டனையை ஆயுள் தண்டனையாக குறைக்கும்போது, ஆயுள் முழுக்க தண்டனை அனுபவிக்க வேண்டும் என நிபந்தனை விதிக்க குடியரசு தலைவருக்கு அதிகாரம் உள்ளது எனக்கூறி மனுக்களை தள்ளுபடி செய்து உத்தரவிட்டார்.
மேலும், தண்டனை குறைப்பு என்பது நிபந்தனையுடன் சேர்த்துதானே தவிர, தனித்தனியாக பிரிக்க முடியாது. மன்னிப்பை மட்டும் தங்களுக்கு சாதகமாக எடுத்துக்கொண்டு நிபந்தனையை எதிர்த்து வழக்கு தொடர்ந்ததை ஏற்றுக்கொள்ள முடியாது எனவும் நீதிபதி தெரிவித்துள்ளார்.
