சென்னை: தமிழ்நாட்டில் முக்கிய பண்டிகைகள், விழாக்கள், அரசியல், சாதி மற்றும் மதத்தலைவர்களின் பிறந்தநாள் போன்ற நிகழ்வுகள் தொடர்ந்து நடைபெறவுள்ளது. இதுபோன்ற முக்கிய நிகழ்வுகளில் அரசியல், சாதி மற்றும் மதத்தலைவர்கள் பங்கேற்கும்போது இரு தரப்பினரிடையே மோதல் சம்பவங்கள் ஏற்படவும், சட்டம் ஒழுங்கு பிரச்னை ஏற்படவும் வாய்ப்புள்ளது.
இவ்வாறான அவசரகால பணிகளுக்காக ஆயுதப்படையினர் மற்றும் காவலர்களை தயார் நிலையில் வைக்க பல்வேறு அறிவுறுத்தல்களுடன் தமிழ்நாடு டிஜிபி சைலேந்திர பாபு அனைத்து மாநகர காவல் ஆணையர்கள் மற்றும் மாவட்ட காவல் கண்காணிப்பாளர்களுக்கு சுற்றறிக்கை ஒன்றை அனுப்பியுள்ளார்.
அதில், “ஆயுதப்படையினர் மற்றும் இளம் காவலர்களுக்கு வாரம் இரண்டு அல்லது மூன்று முறை கவாத்து பயிற்சி அளிக்க வேண்டும். அதனை ஆயுதப்படையில் உள்ள உயர் அலுவலர்கள் கண்காணிக்க வேண்டும். ஆயுதப்படையில் உள்ள துணை காவல் கண்காணிப்பாளர்கள் மற்றும் காவல் ஆய்வாளர்களுக்கு கலவரச் சம்பவங்களின்போது படையை வழிநடத்த அவ்வப்போது பயிற்சி வழங்க வேண்டும்.
ஆயுதப்படையில் உள்ள கேடயம், லத்தி, ரப்பர் தோட்டாக்கள், பிளாஸ்டிக் தோட்டாக்கள், பம்ப் ஆக்ஷன் கன், கேஸ் கன், கேஸ் செல் மற்றும் இதர ஆயுதங்கள் போதுமான அளவில் உள்ளதா எனவும், அவை சரியாக வேலை செய்கிறதா எனவும் அவ்வப்போது தணிக்கை செய்வதுடன், அவற்றை எவ்வாறு கையாள வேண்டும் என்பதை ஆயுதப்படையினருக்கு கவாத்து பயிற்சியின்போதே உரிய பயிற்சி அளிக்க வேண்டும்.
அதுமட்டுமில்லாமல் கலவரத்தை கட்டுப்படுத்த பயன்படுத்தப்படும் வஜ்ரா, வருண் மற்றும் இதர வாகனங்களை முறையாக பராமரித்து தயார் நிலையில் வைக்க அறிவுறுத்த வேண்டும். ஒலிபெருக்கிகள் மூலம் போராட்டக்காரர்களை கலைப்பதற்கும், போராட்டம் நடக்கும்போது அதனை ஒளிப்பதிவு செய்யவும் பயிற்சி அளிக்க வேண்டும்” என தெரிவிக்கப்பட்டுள்ளது.
இதையும் படிங்க: ஹலோ நான் டிஜிபி பேசுறேன்...போலீஸ் அதிகாரியிடமே 7.5 லட்ச ரூபாய் ஆன்லைனில் மோசடி
