சென்னை: தமிழ்நாட்டில் உள்ள மாணவர்களின் தமிழ் இலக்கியத் திறனை அறிவதற்காக ஆண்டுதோறும் தமிழ் மாெழி இலக்கியத் திறனறிவுத் தேர்வு நடத்தப்படுகிறது. அந்த வகையில் இந்தாண்டிற்கான தமிழ் மொழி இலக்கியத் திறனறிவுத் தேர்வுக்கு, நாளை முதல் 20ந் தேதி வரையில் விண்ணப்பிக்கலாம் என அறிவிக்கப்பட்டுள்ளது. மேலும் இந்த தேர்விற்கு சில தகுதி அடிப்படையின் கீழ், 1500 மாணவர்கள் தேர்வு செய்யப்படுவர். தகுதி அடிப்படையின் கீழ் தேர்வாகும் மாணவர்களுக்கு மாதம் தலா 1,500 ரூபாய் கல்வி உதவித்தொகையாக வழங்கப்படும் எனவும் தெரிவிக்கப்பட்டுள்ளது.
இது குறித்து, அரசுத் தேர்வுத்துறை இயக்குநர் சேதுராமவர்மா வெளியிட்டுள்ள செய்திக்குறிப்பில், "பள்ளி மாணவர்கள் அறிவியல், கணிதம் சார்ந்த ஒலிம்பியாட்டு தேர்வுகளுக்குப் பெருமளவில் தயாராகி பங்கு பெறுவதைப் போன்று, தமிழ் மொழி இலக்கியத் திறனை மாணவர்கள் மேம்படுத்திக் கொள்ளும் வகையில் தமிழ் மொழி இலக்கிய திறனறித் தேர்வு ஆண்டுதோறும் நடத்தப்படுகிறது.
2023-2024 ஆம் கல்வியாண்டிற்கான தமிழ் மொழி இலக்கிய திறனறித் தேர்வு வருகின்ற அக்டோபர் 15ந் தேதி (ஞாயிற்றுக்கிழமை) அன்று நடத்தப்படவுள்ளது. இத்தேர்வில் 1500 மாணவர்கள் தேர்வு செய்யப்பட்டு, அவர்களுக்குப் பள்ளிக் கல்வித் துறை வழியாக மாதம் ரூபாய் 1500 வீதம் ஊக்கத்தொகையாக இரண்டு வருடங்களுக்கு வழக்கப்படும். இத்தேர்வில் 50 சதவீதம் அரசுப் பள்ளி மாணவர்களும், மீதமுள்ள 50 சதவீதம் அரசுப் பள்ளி மாணவர்கள் உள்ளிட்ட பிற தனியார் பள்ளி மாணவர்களும் தேர்வுச் செய்யப்படுவார்கள்.
மேலும் தமிழ்நாடு அரசின் பத்தாம் வகுப்பு நிலையிலான பாடத்திட்டத்தின் அடிப்படையில் கொள்குறி வினா வகையில் தேர்வு நடத்தப்படும். அனைத்து மாவட்டங்களிலும் மாவட்டத் தலைநகரங்களில் இந்த தேர்வு நடத்தப்படும். 2023-2024 கல்வியாண்டில் தமிழகத்தில் உள்ள அங்கீகாரம் பெற்ற அனைத்து வகை பள்ளிகளில் பயிலும் (CBSE / ICSE உட்பட) 11 ம் வகுப்பு மாணவர்கள் அக்டோபர் 15ந் தேதி (ஞாயிற்றுக்கிழமை) அன்று நடைபெறவுள்ள இத்தேர்விற்கு விண்ணப்பிக்கலாம் என அறிவிக்கப்படுகிறது.
மாணவர்கள் இத்தேர்விற்கு விண்ணப்பிக்க www.dge.th.gov.in என்ற இணையதளம் மூலம் செப்டம்பர் 5 ந் தேதி முதல் 20 ந் தேதி வரை விண்ணப்பங்களைப் பதிவிறக்கம் செய்து பூர்த்தி செய்யப்பட்ட விண்ணப்பத்துடன் தேர்வுக் கட்டணத் தொகை ரூ.50 சேர்த்து சம்பந்தப்பட்ட பள்ளித் தலைமையாசிரியரிடம் அல்லது முதல்வரிடம் ஒப்படைக்குமாறு அறிவுறுத்தப்படுகிறது. பூர்த்தி செய்யப்பட்ட விண்ணப்பங்களைச் செப்டம்பர் 20ந் தேதிக்குள் சமர்பிக்க வேண்டும்" என அதில் கூறியுள்ளார்.
இதையும் படிங்க: G20 மாநாட்டில் அதிபர் ஜி ஜின்பிங் பங்கேற்கவில்லை என சீன வெளியுறவுத்துறை அறிவிப்பு!
