அண்ணா பல்கலைக்கழகத்திற்குள்பட்ட 500-க்கு மேற்பட்ட இணைப்புக் கல்லூரிகள், உறுப்புக் கல்லூரிகள், அதன் வளாக கல்லூரிகளுக்கான பருவத் தேர்வுகள் நேற்று தொடங்கியது. பருவத் தேர்வின் முதல் நாளான நேற்று (நவம்.6) தமிழ்நாடு முழுவதும் உள்ள பொறியியல் கல்லூரிகளில் வேதியியல் தேர்வுகள் தொடங்கின.
ஆனால், தேர்வு தொடங்கும் முன்னரே வேதியியல் வினாத்தாள் முன்கூட்டியே வெளியானதாகக் குற்றச்சாட்டு எழுந்ததையடுத்து புதிய வினாத்தாள் இணையதளம் மூலம் அனுப்பப்பட்டு தேர்வு நடத்தப்பட்டது.
காலையில் நடைபெறவிருந்த தேர்வு பிற்பகலுக்கு மாற்றப்பட்டு தேர்வுகள் நடத்தப்பட்டன. அண்ணா பல்கலைக்கழகத்தில் கடந்த ஆண்டும் நவம்பர் மாத நடைபெற்ற பருவத் தேர்வின்போது கணித பாடத்திற்கான வினாத்தாள் முன்கூட்டியே வெளியானதையடுத்து கணிதத் தேர்வு ரத்து செய்யப்பட்டது.
இந்த இரண்டு ஆண்டுகளில் வினாத்தாள் மறு மதிப்பீட்டு விவகாரம், தேர்வு வினாத்தாள்கள் லீக்கான விவகாரம் தொடர்பாக உறுப்புக் கல்லூரிகளைச் சேர்ந்த 37 தற்காலிகப் பணியாளர்கள் பணி நீக்கம், தேர்வு கட்டுப்பாட்டுத் துறை அலுவலர்கள் பணியிடை நீக்கம் உள்ளிட்ட அண்ணா பல்கலைக்கழக தேர்வு கட்டுப்பாட்டுத் துறை தொடர்பாக அடுக்கடுக்கான புகார்கள் நீடிக்கின்றன.
ஆனால், தேர்வு கட்டுப்பாட்டுத் துறை தொடர்பாக பல புகார்கள் எழுந்தாலும் அவற்றை கட்டுப்படுத்த முடியாமல் அண்ணா பல்கலைக்கழகம் திணறிவருவது ஏன் என்ற கேள்வி எழுந்துள்ளது.
