சென்னை: 2024 நாடாளுமன்ற தேர்தலுக்கு இன்னும் சரியாக ஒராண்டு மட்டுமே உள்ள நிலையில் அதிமுகவிற்கும், பாஜகவிற்கும் இடையில் கருத்து மோதல்கள் வெடித்து கொண்டே வருகிறது. பாஜகவின் மாநில நிர்வாகியாக இருந்த நிர்மல்குமார் அதிமுகவில் இணைந்த போது அதிமுக - பாஜக என இரண்டு கட்சியின் இரண்டாம் மற்றும் மூன்றாம் கட்ட தலைவர்களிடம் கருத்து மோதல் ஏற்பட்டது.
அதிமுக-பாஜக கூட்டணி தொடர்கிறது என உள்துறை அமைச்சர் அமித்ஷா கூறியதால் அது சற்று தனிந்தது. அதிமுகவுடனான கூட்டணியை முடித்து கொண்டு தனியாக பாஜக தலைமையில் ஒரு கூட்டணி அமைக்க வேண்டும் என்று அண்ணாமலை தொடர்ந்து செயல்பட்டு வருகிறார். கடந்த ஏப்ரல் 14-ஆம் தேதி திமுகவின் உள்ள முக்கிய பிரமுகர்களின் சொத்துப் பட்டியலை அண்ணாமலை வெளியிட்டிருந்தார். ஆனால் அதில் திமுக தலைவர்களை கடந்து அதிமுகவில் உள்ள தலைவர்கள் எதிர்வினையாற்ற தொடங்கியுள்ளனர். இரண்டாம் கட்ட, மூன்றாம் கட்ட தலைவர்கள் பேசுவது பெரிதாக எடுத்துக் கொள்ளப்படாது.
ஆனால் அதிமுகவின் பொதுச்செயலாளர் எடப்பாடி பழனிசாமி, "தன்னை முன்னிலை படுத்திக்கொள்ள நினைக்கும் அண்ணாமலை குறித்து இனி என்னிடம் கேள்வி கேட்காதீர்கள்" என அண்ணாமலை கடுமையாக விமர்சனம் செய்தார். முதல் முறையாக அண்ணாமலையை எடப்பாடி பழனிசாமி கடுமையாக தாக்கியுள்ளார். இதன் மூலம் அண்ணாமலை வேறு, பாஜக வேறு என்ற கோணத்தில் அதிமுக தலைவர்கள் அண்ணாமலையை விமர்சனம் செய்து வருகின்றனர். இதனால் அதிமுக - பாஜக கூட்டணி தொடருமா என்று கேள்வி எழுந்துள்ளது.
இந்த நிலையில் நேற்று(ஏப்ரல் 16) நடைபெற்ற இப்தார் நோன்பு திறப்பு நிகழ்ச்சியில் பேசிய எடப்பாடி பழனிசாமி, "எங்களது கொள்கை என்பது வேறு, கூட்டணி என்பது வேறு. ஒரு சில கட்சிகளைப் போல சிறுபான்மை மக்களின் வாக்குகளைப் பெறுவதற்காக கவர்ச்சிகரமாக பேசி, பொய்யான வாக்குறுதிகளைச் சொல்லி, சிறுபான்மை மக்களை ஏமாற்றுகிற இயக்கமல்ல அதிமுக. உங்களோடு உண்மையான அன்போடு, உரிமையோடு, உணர்வோடு தோள் கொடுக்கின்ற இயக்கம் அதிமுக" என்றார்.
மேலும், "கொள்கை என்பது ஒருவரது இனிஷியலைப் போன்றது. அதை யாராவது மாற்ற முடியுமா? முடியாது. எங்களது இனிஷியல் எம்.ஜி.ஆர், ஜெயலலிதா ஆகியோர் வகுத்தது. அந்த வழியில் சிறுபான்மையினருக்கு பாதுகாவலனாய், உற்ற தோழனாய் அதிமுக என்றுமே திகழும். இந்தக் கொள்கை என்றென்றும் மாறாது. கூட்டணி என்பது வேறு. எனவே சிறுபான்மை மக்களின் உண்மை பாதுகாவலர்களாக நாங்கள் உங்களோடு என்றென்றைக்கும் உறவாக நிற்போம். எல்லாம் வல்ல இறைவனின் அருள் இந்நாளில் எல்லோருக்கும் நிறைவாக அருளப்பட பிரார்த்திக்கிறேன்" எனக் கூறினார்.
பாஜக கூட்டணியை அதிமுக விரும்புகிறது. ஆனால் அண்ணாமலையை அதிமுக விரும்பவில்லை. இதன் மூலம் அண்ணாமலையா? அல்லது அதிமுகவா? என்று முடிவெடுக்கக்கூடிய நிலைக்கு பாஜக தேசிய தலைமை தள்ளப்பட்டுள்ளது என அரசியல் நோக்கர்கள் தெரிவிக்கின்றனர்.
இதையும் படிங்க: "மு.க.ஸ்டாலின் ரொம்ப பேசினால் அரசு கவிழ்ந்துவிடும்" - ஹெச்.ராஜா எச்சரிக்கை
