சென்னை பல்லவன் சாலையில் இயங்கி வரும் கரோனா பரிசோதனை மையத்தை ஆய்வு செய்த பின் செய்தியாளர்களைச் சந்தித்த அவர், "கரோனாவால் பாதிக்கப்படுவோர் எண்ணிக்கை அதிகரித்து வருகிறது. 15 மண்டலங்களில் நியமிக்கப்பட்ட ஐஏஎஸ் அலுவலர்களுடன் நோய்க் கட்டுப்படுத்துவது தொடர்பாக ஆலோசனை நடத்தப்பட்டது. அதில் அலுவலர்களுக்கு அறிவுரைகள் வழங்கப்பட்டன.
கரோனா அறிகுறி இருப்பவர்களுக்குப் பரிசோதனை செய்யப்பட்டு, முடிவு வருவதற்கு இரண்டு நாள்கள் ஆகிறது. அதற்குள் அவர்களுக்குத் தொற்று இருந்தால் மற்றவர்களுக்குப் பரவ அதிக வாய்ப்பு உள்ளது. இதனால், அறிகுறி இருப்பவர்களை கரோனா பாதிக்கப்பட்டவர் எனக் கருதி அவருக்கு உரிய சிகிச்சை அளிக்கப்படும்.
கரோனா பாதிக்கப்பட்டவர்கள் அல்லது அறிகுறி உள்ளவர்கள் ஒரே வீட்டில் இருக்கவேண்டாம் என்றும்; அருகிலுள்ள கரோனா பாதுகாப்பு மையத்திற்குச் சென்று சிகிச்சை பெற்றுக் கொள்ள வேண்டும், இதுதொடர்பாக மக்களுக்கு விழிப்புணர்வு ஏற்படுத்துமாறு அலுவலர்களுக்குக் கூறினார்.
மேலும் மருத்துவப் படிப்பு இறுதி ஆண்டு படிப்பவர்கள், 200 நபர்கள் பணிக்கு எடுக்கப்பட்டு, 15 மண்டலங்களிலும் வீட்டில் தனிமைப்படுத்தப்பட்டவர்களை கண்காணிக்க உள்ளோம்.
மக்கள் முகக் கவசம், தகுந்த இடைவெளியைக் கடைப்பிடிக்க வேண்டும் என்றும்; அவர்கள் ஒத்துழைப்பு வழங்கினால் மட்டுமே ஊரடங்கு சற்று பயன்தரும் என்றும் கூறினார்.
முதல் தவணை தடுப்பூசி செலுத்தப்பட்டவர்களுக்கு இரண்டாவது தவணையை சரியாக செலுத்துகிறார்களா என்பதைக் கண்காணிக்க அலுவலர்களை அறிவுறுத்தி உள்ளோம்.
மேலும் தடுப்பூசி போட்டுக் கொள்ள ஒரே இடத்தில் அதிக அளவில் மக்கள் கூடினால், அங்குள்ள மண்டல அலுவலர், அங்கு வந்து அதற்கேற்றார்போல நடவடிக்கை எடுக்க வேண்டும்.
சென்னையிலிருந்து 300 ஆக்ஸிஜன் செறிவூட்டிகள் பல்வேறு மருத்துவமனைக்கு அனுப்பப்பட்டுள்ளது.
மேலும் 2 ஆயிரத்து 743 ஆக்ஸிஜன் செறிவூட்டிகளை ஆர்டர் செய்துள்ளோம். அது விரைவில் வந்தடைந்துவிடும். அதுமட்டுமின்றி சென்னையில் இயங்கி வரும் 19 கரோனா பாதுகாப்பு மையங்களை கரோனா சிகிச்சை மையங்களாக மாற்றம் செய்யப்படும். அனைத்து இடங்களிலும் 5 முதல் 10 லிட்டர் ஆக்ஸிஜன் செறிவூட்டிகள் அமைக்கப்படும்" எனத் தெரிவித்தார்.
இதையும் படிங்க: நகைச்சுவை நடிகர் நெல்லை சிவா காலமானார்
